بحر الذكريات

كبرياء زائف

وفاء:
بهذيج الفترة كانت حرب الكويت وتبعت احداث ٩١ انكسار للجيش وللقادة ووحشيتهم تجاه الشعب وحتى على اهلهم انصب غضبهم ...موت ابني ومرضي شوفهم اللي عانيته بحياتي الزوجية ..كنت من كل ناحية اتحارب ..عمتي وحجيها عن خلفة البنات وهي تريد ولد عبالك الولد بيدي لو بيدها ؟؟بناتها وخاصه دلال اللي جابت ولدين توأم متماثل وكامت تسمعني كلام واشوف مازن طاير باولادها ويجيب الهم ويحبهم هوايه مثل حبه لامهم وما ضجت بالعكس افرح هو خالهم ومن اشوفه هيج حنين عليهم وعلى بناتي اسكت ...وسماح هم صار الها ولد وامهن تكلي بس اني ما بيج خير ...وكل هاي واسكت ...مازن وكلامه المثل السم ووكعتي بذاك اليوم وعلى اثرها ضليت ايام طريحة فراش وصلت للموت بسبب حمى النفاس ...جدي وصل لحقيقة خطأ ارتباطي بمازن وحس بذنب لان جبرني وانطاني اله 

كعدت لكيته متعارك وطاردهم كلهم وشامر بناتي الهم وحالف ما يردني الهم ومازن وموقفه بالضد وعناده ...متصاعد الكلام والمشكلة بيناتهم ...

كعدت من ازمتي لكيت كل شي محسوم وجدي طارده وبناتي ماكو اجيت اروح ونهلة كمشتني بيومها
نهلة:ولج ما يستاهل خل يولي

-بناتي نهلة
-وين رايحات بناتج بينج وبينهن حايط بس لا تصيرين فاهية اخذي موقف منه ..هو يجي ويرجعج ويراضي جدو ما شفتي انت يكول يريد يتزوج الحقير على حجاية امه لان تكول وحيد ومرته ما تجيب ولد وهو يايدها خل يولي امه ما جابت بنات يعني

-هو كال هيج
-اي والله وروح بابا
-اني استاهل

-لا ما تستاهلين شمسويه وتستاهلين ... لا تاخذين حجيهم وفاء يريدج يجي ويرجعج معززة مكرمه مو يكول اذا كعدت وعجبها تلحكني واذا ما اجت اني متزوج غيرها....وسماح اخذها وياه
-عزاا وهي شعليها 

-ما تعرفين شسوى جدي بعد لو يوكف على ايده ما يرجعج اله
-بناتي
-ما عليهن شي مو يريد يكمشج من ايدج التوجعج خليهن يمه

-اخاف ما يرجعني شلون
-كافي وفاء كافي تعبتينا مو هذا اللي جنت ما تطيقيه
-صار زوجي وابو جهالي بعد
-خل يعرف قيمتج حصلج بلا قيمة خل يعرف قيمتج

سمعت كلامهم وبقيت بمكاني واسبوع وما اجه وتبعه اسبوع ثاني وهو ماكو ولا سأل بديت اضعف واريد اروح ..بس بيوم تغير كل شي

طلعت وره البيت اشر الملابس وجان وقت الظهر واكيد هو ماكو ...الباب الفاصل انفتح ..انداريت وهو يتقدم بعصبية جرني من ايدي حسيتها انخلعت وضربني راشدي دمعت عيوني لقوته
-ولج منو انت وتعاندين ولج..ترجعين مثل الخوش ادميه لو والله بعد بناتج تحلمين تشوفيهن وفاء لا توكفين بوجهي اذيج

كل مره اتوسل بي وابجي هالمره سكتت ما سويتها ما حجيت ولا نطقت كان حاقد عليه عبالك اني عدو ما رديت وخليته يكمل اللي عنده كله
-ما ارجع مازن وبناتي ما تكدر تحرمني منهن لو شيصير
جرني من ثوبي بقوة ويعيط فاقد عقله بس ما كان مخمور وعرفت قدري عنده بحق
-لج انت اكطعج هسه ما ابرد.......امشي كدامي هسه لبيتج واعقلي..دفعني باتجاه الباب بقوة ردت اوكع بس استعدلت رجعت باتجاه البيت ماشية خلص بعد كنت اكول الذنب مني وحدي ..هذا هو مازن ما ينعدل ابد