| عشگ المداح | ' باللهجة العراقية '

مشهد

#عشگ المداح
#بقلم الراوية
# مشهد

بسم الله الرحمن الرحيم 🌹

صلوا على محمد و آل محمد ❤

.

الغرفة ظلمه..بس بصيص خفيف يجي من الشباك من خلف الستائر..بسبب اضوية الحديقة

ايديه على اذاناتي و اني اسمع اصواتهم العاليه برا..جايه من الحديقة

عيوني گامت تصب الدمع و اني احس بلحظات خوف من الي ديصير..اول مرة اعيش هاي الأجواء
اجواء غريبه عليه و كُلش..

انفتح باب الغرفة..الي اتخذتها مسكن من ما يقارب الشهر
دخلت المراة و صوت عكازها يضرب على الارض

شغلت الضوء و انتفضت بمكاني..باوعت الها
و هي ابتسمت الي ابتسامه بشوشه
لابسه دشداشة سودة و حجاب ابيض
وجهها ابيض و عيونها عسليه فاتحه..و ملامح مرسومه عليها و بدقة ما يشبه الوشوم تتسمى ب " الدگات "

تقدمت الي و گالت بنبرة تطغيها الحنيه

- ناز

مسحت دموعي و گلت بشفة ترجف

- ها جده

- ليش گاعده هين..گومي وياي

- لا اريد انام

- وين تنامين و الساعة بعدها بال٨

حچتها و هي تتقرب الي..ابتسمت و مدت ايدها عليه
و اني لزمتها ايدها الي اثار الكبر مرسومه عليها..

وگفت يمها و اخذتني وياها برا الغرفة...بالممر الي چانت بنهايته غرفتي او غرفة الجده

و غرفتين وحده لابنها و وحده لبنتها..
عند الدرج چان اكو شباك مطل على الحديقة..كل ما اتقرب يزيد الصوت الي جاي منها..
باوعت ل " تقيه " اصغر بنات الجده..تباوع من ورا الشباك ابتسمت الي بس اجاها صوت من جوا چان لزوجة الابن الاكبر ف نزلت تركض..

باوعت للجده الي گالت و هي تأشر على الشباك

- كلهم برا..تعاي حدري جوه

- لا جده هنا مرتاحه

- يا يمه ليش تظلين فوگ..جوه كلهم يحبونچ و يريدون راحتچ..

ما عرفت شنو اجاوبها..سكتت
و هي تنهدت و گالت ورا لحظات..

- انتظري هين..اروح اجيب سبحتي و اجيچ

- اني اروح اجيبها

حچيتها و ابتسمت الها..رجعت للغرفة و دورت للسبحه..لگيتها على المراية اخذتها..و باوعت للشباك
ترددت انو اروح و اباوع لبرا..ورا لحظات قليله
تقدمت بخطوات متردده
وگفت يم الشباك و وخرت البرده..حبست نفسي من صار هو گدامي..گاعد على واحد من الكراسي المصفوفه واحد بصف الاخ..
لابس دشداشه بيضه و مخلي اشماغ و عقال على راسه..و گدامه المايكرفون..

شوية راح خوفي..و اني اغمض عيوني و اسمع صوته و هو يمدح..
اشياء ما چنت اعرفها اصلاً شنو..كلها تعلمتها هنا
و من ظمنها المديح..الدراويش..السادة
كلها مسميات چنت اجهلها..

من فتحت عيوني و رجعت اباوعله..رجعت خطوات ليورا بخوف..من انتبه الي و بحركة صغيره من راسه فهمت منها انو اسد البردة..

عضيت على شفتي و اني اجيت ابچي من الموقف المحرج ألي صار..و كالعادة هو لازم يكون موجود
لو هو سبب إحراجي

.

المشهد 2

رفعت راسي ل تقيه الي تباوعلي و عاگده حاجبي..بلعت ريگي من تقربت الي و گالت و عيونها مغورقة

- ناز الله يخليچ..ارفضيه
ارفضي محمد..تعرفيني احبو

- تقيه من كل عقلچ اوافق

- ليش ما توافقين..شو جمال و اخلاق
و هذا الي يدوره محمد

بچت و هي تخلي ايدها على وجهها و هي تگول بغصة

- جمال الي ما املكه..لگاه بيچ

بللت شفتي و اني اگول بنبرة حاولت تكون موزونه

- تقيه لا تفكرين او تعتقدين انو اني اوافق على
محمد او غير شخص

.

السلام عليكم شلونكم حبايبي

ان شاء الله الكل بخير ☹❤

طبعاً مثل ما تشوفون قصة جديده
او نگول مشهد من قصة ان شاء الله راح انشرها عن قريب

اتمنى المشهد عجبكم 🤔😘

اول شي خلي نتفق..
الرواية مو هسا انشرها..و يمكن حتى ما انشرها بهاي الفترة
لان نزلت مشهدين من قصتين..هاي و بعد وحده
اذا عجبكم روحوا اقروا و شوفوا..

و اكثر مشهد يحصل على تفاعل راح ابدي بكتابتها
و فترة يمكن اطول شهر..يلا ابدي انشر..

ثاني شي..القصة مستواحه من قصة حقيقيه
بعدين اكول الهم شنو الحقيقي الي بيها مع سير الاحداث 😬
لأن اني عرفت اساس القصة من اخويه
و مع الاسف ما اعرف التفاصيل ..و اذا عرفت الباقي اكيد اكول الكم 👀❤