| عشگ المداح | ' باللهجة العراقية '

البارت الثامن عشر

#عشگ المداح
#بقلم: الراوية
#البارت الثامن عشر

بسم الله ❤
اللهم صلِ على محمد و آل محمد❤

.

ناز..

نطقت كلمتي..و هو رفع تك حاجب مستغرب من كلامي
كلامي الي بقيت ارتب بي و بالاخير طلع بهذا الشكل..من وگفنا بالمطبخ و حچينا..بديت افكر و اقلب الكلام براسي..اني خوما ابقى طول عمري اتهرب منه !
اي هو لحد هسا ما اعترفلي بس تصرفاته چانت كافيه..يمكن لو غير شخص چان من زمان اجا و رجعني..بس سيد يختلف عنهم..و هو گال هالشي بعظمة السانه..

و اتخذت قراري..اخذت ملابسي و رجعتهن للكنتور و بقيت انتظره..و هو طول يلا رجع..گلت ابدي صفحة جديده و اتغلب على خوفي..و ما اگدر اتلغب اذا ما اوجهه

هو تحمحم و مسح على جبينه..و ما حچه شي
نزع الاشمغ و الساعة من ايده..و خلاهن على الميز طلع التلفون و المحفظه
و التفتت عليه و گال

- تفاجئت من لگيتچ هين

- يعني تريديني اطلع

ضحك هو و تقدم عليه..حاوط وجهي بيديه اثنينهن و اني تحاشيت اباوع بعيونه..و هو أردف بصوت خافت

- يولي خليني اكمل كلامي..على گد تفاجئي فرحت بيچ..ناز اني صح و لا مرة گايلچ كلمة غزل
بس يشهد عليه ربي انو محد أخذ مكانه بگلبي مثل ما اخذتي انتي

دنگت و عيوني دمعت و هو رجع يحچي..و إصبعه الابهام يتحرك على خدي بلطف

- ما اگلچ طيلة الشهر عفتچ لأن ردتچ تأخذين وگتچ و يروح خوفچ..بس لأن اني همين چنت ضايج و گلت انتي تجين بالوكت الي تحسين نفسچ متقبليتني

رفعت راسي اله و گلت بنفس نبرة صوته

- و إني اخذت وقتي..و عرفت انو إذا ما أواجه خوفي ما راح اگدر اتغلب عليه

ابتسم و أردف بصوت خافت

- يعني ما راح تنهزمين !

ما جاوبته..بقيت ساكته
و هو اخذ نفس و گال مرة الخ

- ناز..لا تتوقعين انو بيوم اجبرچ على شي
الله شاهد ما تقربتلچ الا انو شفتچ مستلمه..و من خفتي ردت بس اطمنچ بس إنتي ما صدگتيني و طلعتي وي امي

- سيد..اترك هذا الموضوع
ها هي..إني رجعت هنا و كلي قناعة

- ناز..مو إذا ما عجبنا شي گلنا سد هالموضوع..لازم اني و انتي كل واحد يحچي الي بگلبو حتى ما يظل كاتم و لا سامح الله بعدين تصير مشاكل

هزيت راسي ب أي..كلامه صحيح إذا بقينا ساكتين و احنا مطنشين الموضوع يمكن نفهم بعض خطا..

لزمني من أيدي..و اخذني للسرير گعدت و گعد بصفي.
و گال بهدوء

- هسا لازم نحچي

- بخصوص شنو ؟

- بخصوص الحچي الي چان لازم نحچيه من زمان