| عشگ المداح | ' باللهجة العراقية '

البارت الاول

#عشگ المداح
#بقلم: الراوية
#البارت الاول

بسم الله ❤
اللهم صل على محمد ❤

.

عبدالله..

و اني بالطريق الرابط بين بغداد_ انبار بالربـع ساعة و اصل بيتي و الدنيا مغرب..و بدت تظلم و تتوارى الشمس
رفعت صوت القرآن من راديو السيارة..بديت اخفف شويه شويه من لمحت سيارة طابگه

من صرت قريب منها..شفت زلمة فاتح البنيد و يمكن عطلانه و گاعد يصلح بيها..طبگت سيارتي على مسافة من سيارته و حدرت..

من فتت من يم السيارة ما دحگت إذا احد بيها لو لا
سلمت على الزلمه..و هو اول ما سمع صوتي جفل

ابتسمت حتى اطمنه و هو ارتسمت عليه الراحه

- شلونك خويه..سلامات خوما اكو شي ؟

- السيارة فجاة وگفت..و احاول اسويها

- محتاج مساعده؟

- إذا ماكو زحمة

حچها و اني كفيت اردانات دشداشتي ليفوگ و دنگت للبنيد
ادحگ اذا بيها شي ظليت اتفحص بيها..اخر شي رفعت راسي للزلمه و گلت

- وياك احد ؟

- ايي بنتي

زفرت و اني اگول

- عمي والله سيارتك عطلها چبير..و اني مو هذاك الي يعرف

تأفف الرجال و هو يمسح على وجهه
دحگتلو و گلت

- انتوا وين تريدون

- لسوريا

- بهالاوضاع ؟

- يعني منها نطلع لتركيا

عگدت حاجبي و هو بين عليه التردد
دحگت للسيارة و گلت

- سيارتك ما توصلك للمكان الي تريدو..
اخوية امشي وياي هالليله انتَ و اهلك و الصباح رباح

- لا لا ما حاجه

اعترض بسرعة و اني انزعجت من رفضو الي اجا بطريقه مو حلوه..هو تنهد و رجع يحچي باعتذار

- اقصد هسا بلكتن اگدر اصلحها

- شتصلحها يا يابه..
الدنيا ليل..فرضاً ما صارت تظل انتَ و اهلك بالچول ؟

هو دحگ لـبعيد..و شكلو مهموم و يفكر
و اني قاطعة تفكيرو من رجعت احچي

- اني عندي واحد من اهلي فيترچي..من باچر الصبح تلگاه هين ..بس هسا مو راهمه ظلتك انتَ و اهلك
و بعدين بيوتنا مفتوحه الك..و إذا ما شالك البيت العين تشيلك

- تسلم ما تقصر

هز راسه بـاي و هو يتشكر مني..راح لسيارتو

ورا لحظات طلع بس مو وحدو..وياه بنيه
طلع الجنطه و سد باب سيارتو و مشوا وياي لسيارتي صعدت البنيه ليورا و هو ليگدام انداريت للزلمه و گلت