| عشگ المداح | ' باللهجة العراقية '

البارت الخامس و العشرون

#عشگ المداح
#بقلم: الراوية
#البارت الخامس و العشرون

بسم الله ❤
اللهم صلِ على محمد و آل محمد❤

.

عبدلله..

حسيت الرؤية مغوشه..اريد افرزن منو الي گدامي
اسنع صوت الدكتور الي يحچي عربي بس مو مضبوط و هو يسألني..

غمضت عيوني و رجعت فتحتهن و اني اريد اركز..بس كلشي مغوش

شهر تقريباً اني على هذا الحال احس نفسي ضايع..احس بعجز و اني بهذا الوضع
انقهر و اضوج..بس ارجع و اگول هاي حكمة رب العالمين
چنت اظن انو الاعمى يشوف ظلام بس او لون اسود..بس لا طلع مو هيچ..فراغ فقط شلون تخلي وحده من ايديك على عينك و الثانيه تشوف بيها.. و من تحول تركيزك على الي مغطيها..بلحظتها ما راح تشوف شي حتى الون الأسود..يمكن هذا اقرب مثال للعمى..

رجع الدكتور گالي غمض..و سويت نفس ما گال
و طلب مني اظل مغمض كم دقيقة
رجعت مددت و اني اتنهدت ..لحظات و حسيت بيد تكمش ايدي..
جيت افتح بس تذكرت كلام الدكتور..عرفت منو الي كمش ايدي.. چانت منو غيرها ناز

الي ما اعرف شلون اجازيها..تحملت وضعي و عصبيتي و انفعالاتي..ما اشوفها اي
بس احسها تعبت و حيل بسبب الي صار..من هين ولدت و من هين اني انعميت
چانت تحير على من تندار..على بنتنا ريان لو عليه

ظليت بال٦ دقايق مغمض..اسمع ياسر يحچي و يا الدكتور..آخر شي گالي الدكتور اگعد

من گعدت بمساعدة ناز حسيت بوجع براسي
بس شوية و خف..
من گالي فتح عيونك..لزمت ايد ناز بقوة و اني احاول استمد منها القوة و الطمئنينه..

بديت افتحهن شوية شوية..الرؤية شوية اوضح بدت تصير
اول ما وگعت عيني و وضحت لگيت ياسر واگف و گدامه الدكتور گاعد گدامي

-ها واضح

- شوية احسن

جاوبته باعتياديه..ما ادري ليش ما حسيت بهذيچ الهفه انو اشوف..بس من سمعت شهگت ناز..تذكرت ليش چنت منتظر هالعملية..

التفتت و دحگت ل ناز الي حاطه ايدها على شفتها و هي تبچي..ابتسمت و گلت

- ناز

حچيت كلمتي و ما حسيتها الا حاظنتني و هي تبچي و تنوح..ضحك الدكتور و گال بشقة

- هسا انت تشافيت

دفنت راسها بكتفي  و هي تگول تشوفني

وخرتها عني شوية..وهي مسحت دموعها..جه ياسر و هو الثاني شبكني..و هو يتحمد الي بالسلامة..
وخر و الدكتور سلم عليه و تحمدلي بالسلامه..و تشكرت منه..

وراها گعد ينطي نصائح..صح الرؤية مغوشه بس بدت توضح شوية شوية
گال ممنوع ادحگ ل شي بتركيز حيل..من التلفون للتلفزيون..و الشمس مو زين عليه هاي الفترة
لازم البس نظرات من اطلع
طلع هو و ياسر تا يكتبلو ادوية و قطرات..من طلعوا و ظلينا اني و ناز الي رجعت حظنتني و هي تگول بغصة