| عشگ المداح | ' باللهجة العراقية '

البارت الحادي عشر

#عشگ المداح
#بقلم: الراوية
#البارت الحادي عشر

بسم الله ❤
اللهم صلِ على محمد و آل محمد❤

.

ناز..

نطق ياسر كلمته..و كلها التفت عليه و هما مصدومين من كلامه
باوعت للحجيه الي التفتت للجهة الثانيه و هي تگول بهمس بس الكل سمعه..يمكم هي رادت هالشي..

- تخبل الولد..تخبل والله يعينكم يا ولد ممدوح

گام سيد على حيله..و اني باوعتله شلون ساكت
و لا مبينه على ملامحه اي ردة فعل..وگف گدامه و گال

- شنو أستاذ ياسر

- الي سمعتو ..كلكم كرهوتني و اني ما اظل هين بعد

كتف ايديه ل صدره و گال ببرود

- تريد تروح ؟ انگلع الباب يوسع جمل
عود لا يومين و ترجع..الي يطلع من هذا البيت ما يرد عليه

- مو بيتك..بيت ابويه

حچاها ياسر بعصبيه..و إني انتفضت من مكاني و رحت يم الحجيه..
گام عمار على حيله و گال و هو يوخر سيد من گدام ياسر

- ياسر تعوذ من الشيطان و ارجع لغرفتك..

- عمار ما ارجع..اريد اطلع من هالبيت
و محد الو شغل بيه

حچه هيچ..لو سيد تخبل من مكانه
تقدم ل ياسر و سحبه من ياخة دشداشته و صاح بيه بعصبيه

- لا النا شغل و نص..اسمع ياسر اني ساكت لحد هسا مو لخاطر سواد عيونك..بس عيب مني اهينك گدام مرتك و البنوات ف اسكت و ابلع لسانك و إذا تريد تولي ولي محد يكمش ايدك و يترجاك تظل

وخر ياسر سيد منه و صاح و هو يرجع ليورا

- هو هاي الي فالحين بي انتَ و اخوك..اكسر راس و اهين و تريدوني اظل يمكن لا والله ما اظل و الدنيا زرگه

- صارلك سنين گاعد يمنا و ساكت..هسا ما تتحملنا

حچتها الحجيه و هو سكت..اني باوعتله و عرفت كلامها بي معنى..بسرعة خطرت على بالي حنين
باوعتلها شلون ساكته و ما نطقت كلمه
و المصيبه ما مبينه راضيه على الوضع لو رافضه

گام محمد و اخيراً من مكانه..و اخذ سيد على جهة و سيد بس يباوع ل ياسر الي ما ادري شبي عبالك تبدل و هو يباوع بكل برود و لا كانو صاير شي..

تقرب عمار ل ياسر و گال

- ياسر خويه تعال وياي للصاله

- عمار..خليني اروح

- سؤال واحد اسألك اياه..احد طردك ! البارحه مو حچينا و تصافينا ليش هسا مقرر تروح

سكت ياسر و ما جاوبه..و يمكن ما عنده جواب لهذا السؤال
مثل ما عنده تبرير ل طلعته من البيت

تنهد ياسر و لزم عمار ايده من معصمه و اخذه للصاله
و بقى سيد گاعد و هو يزفر و مرة يستغفر ربه