| عشگ المداح | ' باللهجة العراقية '

البارت العشرون

#عشگ المداح
#بقلم: الراوية
#البارت العشرون

بسم الله ❤
اللهم صلِ على محمد و آل محمد❤

.

عبدلله..

حچيت كلمتي و هي ظلت صافنه و ادحگلي باستغراب..
كمشتها من ايدها و گعدتها على التخت و گعدت يمها و گلت

- ناز..تتذكرين من اتصل بيه خالچ !
وراها بأربعة ايام رجع الرقم يدگ عليه..جيت اطنشو گلت هسا همين يگوم يلوص بحچيو و يغثني..بس بالاخير فتحت الخط چانت امچ مو خالچ

- ايي

تسألت و دمعتها بطرف عينها..تنهدت و اني امسح على ايدها بحنيه

- حچت وياي..و حچت شگد هي مشتاگتلچ
و ميته على شوفتچ

- يا عمري

حچتها و هي تحط ايدها على شفتها و تبچي
و إني مديت ايدي و مسحت دمعتها و گلت

- هسا المفروض تفرحين لأنو راح تشوفيها

رفعت راسها عليه و گالت

- اشوفها

ابتسمت و اني اگوللها بهدوء

- طلبت مني انو اجيبچ عليها تا تشوفچ

- و خوالي !

- ما راح يدرون !..راح نتقابل بمطعم لو بمكان و تگدر تشوفچ

- يعني تگدر تطلع من يمهم ؟

هزيت راسي ب أي..و هي تنهدت
اني سحبتها ل حظني و مسحت على شعرها و گلت

- يلا يعمري..گومي بدلي نروح إني و عمار وياچ

هزت راسها ب اي..و وخرت عني باستني من خدي و گالت

- شكراً شكراً سيد

- ما بينا شكر..بس يلا عجلي

گامت طلعت هدوم و اندارت عليه و گالت

- انت ما تبدل ؟

- هسا ابدل بس كملي انتي بالاول..احدر اشيك على السيارة
هزت راسها ب اي و اني طلعت

امي درت بالخبر..و ايدتني بالي اريد اسوية
رغم متخوف من شوفتها لأمها بس شلون اعوفها محترگه بنار شوفتها !

شيكت على السيارة و شفت البانزين  احنا
طالعين على طريق..و كلشي يصير

شفت عمار مكمل..الساعة چانت بال٩ و نص
صعدت فوگ و لگيتها متحظره و مكمله..دحگتلها چانت لابسه بنطرون و عليه قميص طويل و عريض..اكثر شي يعجبني  ب ناز انفتاحها و تقبلها للكلام و شخصية المقابل..ما حچيت و لا گلتلها لا تلبسين گصيف هي من حالها سوت هالشي.. عرفت انو اني ما ارضى على الملابس الضيقه و الي تبين الجسم ف هي دائماً تختار المناسب

بدلت هدومي و لبست بنطرون و قميص..صحيح متعوده على الدشداشه بس اليوم گلت اغير شوية..
طلعت ناز..و گلت يمكن تحتاج شي برا..شوية و طبت و اني چنت البس بساعتي
رفعت راسي عليها و عگدت حاجبي و تفاجئت من وگفت گدامي و هي شايله شال اسود