| عشگ المداح | ' باللهجة العراقية '

البارت الثاني

#عشگ المداح
#بقلم: الراوية
#البارت الثاني

بسم الله ❤
اللهم صلِ على محمد و آل محمد❤

.

عبدالله..

ورا ما راح الزلمه طبيت جوه و اني اتذكر حچيه..انطاني رقمو حتى اخاف يصير شي..فتت للربعه و فات ورايه محمد الي وگف و گال

- و  عساس نروح وياه ؟

- ما قبل..گال ما اريد افوتكم بمصايبي

سكت محمد لحظات و رجع گال بتساؤل

- سيد ما عرفت شبيهم ؟

گعدت و هو ظل واگف فوگ راسي..تنهدت و گلت

- علمود سالفة فلوس..هو و اهل مرتو بينهم مشاكل

- هاا..بس شعجب ما اخذ بنتو ؟

- محمد مو چثير تسأل

ضحك و گال

- لا والله مو چثير..بس انتَ ما تحب الاسئلة

ابتسمت و گلت

- ما طول هيچ تعرف عليش تسأل ؟

دحگتلو و هو يحك لحيتو قبل لا يگول

- مو استغربت شلون أمن على بنتو يمنا

- الزلمه شافنا شلون تعاملنا وياه و أمن عليها..و ثاني شي هو شكلو خايف عليها و ما رايدها تروح وياه

ما اقتنع محمد بكلامي..و شكلو جا يريد يحچي و يسأل بس دخول الحجيه قطع عليه كلامو..فاتت و گبل طلع محمد ورا ما استأذن
زفرت الحجيه و گالت

- هذا شبي طلع عبالك مگروص بس شافني

ابتسمت و اني اگوم على حيلي..و اكمش ايدها و اخليها تگعد بمكاني و گلت

- يمه انتوا اليوم تكاونتوا مو ؟

- اخوك تصرفاتو ما تعجبني..يعني يحچي بالنقال وي واحد جدام البنيه و يگول يشبه جاموس عوفه

- و هسا انتي زعلانه علمود حچه جدام البنيه لو علمود جاموس حجيه عوفه ؟

سكتت لحظات و هي تخلي ايد على ايد و تگول

- على جاموس عوفه

گوه سكتت نفسي و ما ضحكت جدامها..عوفه بنت اختها..و ساكنه ليغاد عنا
و عدها حلال و دجاج و طليان و جاموس واحد..و على گولتها هذا أنيسها الوحيد
لأن ما عدها بس بنيتين و متزوجات و هي ساكنه وحدها وي ابن اخوها و رجلها متوفي..

دحگتلي بطرف عينها و گالت

- عليش ساكت اضحك..ادري انتوا مسوين بنت اختي منصبه و بس تقلدون و تعيبون عليها

تعدلت بگعدتي و اني اگول

- استغفر الله حجيه..شهل الحچي لا نقلد و لا نعيب
اولاً حرام و ما يصير ناخذ غيبتها..و شي ثاني ترا محمد صحيح يقلد على جاموسها بس ما حاچي عليها
و اذا يوم سمعتو حچه عليها اني اخلي عمار ينطي جزاءو