| عشگ المداح | ' باللهجة العراقية '

البارت السادس عشر

#عشگ المداح
#بقلم: الراوية
#البارت السادس عشر

بسم الله ❤
اللهم صلِ على محمد و آل محمد❤

.

عبدلله..

اروح و ارجع بمكاني..اهجس گلبي راح يطلع من مكانو..دحگت ل محمد الي گاعد على الكرسي و حاط راسو بين ايديه..

و عمار على صفحه و ياسر بصفو..و امي گاعده متلفلفه بعباتها السوده..

دحگتلها و شفت بعيونها الدموع متجمعه..رجعت دحگت ل عبايتها..الي چانت تظمنا جواها من توصلنا للمدرسه..من الحر..من البرد و من الريح القوية
چنت نختل و ما نحس بالي يدور حولنا

كبرنا..كبرنا حيل لدرجه گامت ما تظمنا عباية جدتي..
و صارت الحياة مرة تأخذنا يسرى و مرة يمنى..و احنا ما بيدنا شي..و لا عباية امي تكفينا..

شلون انگلبت خطوبة و فرحت تقيه..بلحظات قليله ل حالة هلع و حزن..انگلب البيت فوگ جوه

خابروني و گالوا تعال..تقيه وگعت من على طولها و فاقده وعيها..طبيت إني و عمار للهول..النسوان لبين عباياتهن...و اني من بين الكل لگيت تقيه الي متمدده و هي  لابسه بدلة خطوبتها..الي لونها بنفسجي فاتح
يمها امي و محمد..الي وگفت لحظات و اني ادحگلو و هو منفعل و القلق واضح بعيونو..

دنگت و شلتها بحظني و صوت النسوان على من الخوف..أخذنها للمستشفى..و لحد هسا يم الدكتور جوه
سوولها تحاليل..احس صاير شي..احس گلبي ثگل على فجاة

من انفتح الباب و طلع الدكتور و وياه ممرضه..گام عمار على حيلو و رحت عليه اني و گعدنا نسأل عنها
گال صارت احسن..عدها فقر دم حاد و ضغطها هابط
تشكرتو و هو راح و انداريت لأمي و گلت

- تعاي نشوفها..

گامت على حيلها و فات عمار اول واحد و وراه ياسر..اني جيت افوت بس وگفت بمكاني من گالت أمي و هيى تأشر على محمد الي گام يريد يفوت

- ما تخطي خطوة..ظل هين گاعد
اصلاً كل الي صارلها من وراك

عگدت حاجبي و دحگت لأمي و گلت

- يمه شجاچ ؟ خلي يشوفها يطمن عليها

- فوت سيد فوت

حچتها و فاتت و اني انداريت على محمد و گبل لا احچي گال

- فوت..جدتك قافله عليه اليوم

هزيت راسي ب اي و طبيت جوه..لگيتها گاعده و بيدها كانونه..دنگت عليها و بستها من راسها
و هي دمعتها وگعت و گالت بصوت ناصي

- شبيه ؟ ليش جايبيني للطبيب

گعدت يمها على الطارف..و حظنت وجهها و گلت

- ما بيچ شي يا عمري..بس شوية تعبتي و ضغطچ هبط

- يولي خوفتينا عليچ..