| عشگ المداح | ' باللهجة العراقية '

البارت التاسع عشر

#عشگ المداح
#بقلم: الراوية
#البارت التاسع عشر

بسم الله ❤
اللهم صلِ على محمد و آل محمد❤

.

عبدلله..

ادحگ ل تقيه الي سكتت و ما نطقت حرف..محمد يدحگلها و ينتظر جوابها..
و بالأحرى كلنا ننتظر ردها..شفت عيونها الي دمعت
اكيد انصدمت من طلبو..مثل ما اني و الكل انصدمنا من عندو..

- هاا يمه شگلتي ! ابن عمچ رايدچ توافقين

حچتها امي..و دحگتلها تقيه
الي تحمحمت و هي  ترجع تركز نظرها على محمد
گال عمار بهدوء كالمعتاد

- تقيه خيتي..فكري و انطينا قرارچ..ترا محد راح يجبرچ على شي

- بس خوية اني متخده قراري

حچتها بصوت ناصي..و اني ركزت عليها من  گالت بنبرة خافته

- محمد ربى ويانا..و اعتبرو اخويه حالو حالكم
اني مو موافقه..لأن ما اريد اتزوج هسا
و محمد ان شاء الله يلگه الي يستاهلها و بنات الحلال چثيرات

الصدمه انرسمت على وجوه الكل..و خصوصاً محمد
و إمي..يمكن إني الوحيد الي فهمت سبب رفضها..
هي طلعت و صارت صمت مطبق على الصالة..قبل لا يتحمحم عمار و هو يگول

- ماكو نصيب..و البنيه شايفتك اخ

هز راسو محمد ب اي و طلع..من باب الصالة الخارجي
و اني انداريت على امي الي گالت بحسرة

- هاي همين خبله..ادري قسمه و نصيب بس شبيه محمد تا ترفضو

- گلتيها يمه..قسمة و نصيب سدوا الموضوع عاد

حچاها عمار..و اني قررت اشوفو ل محمد
طلعت لگيتو گاعد ليغاد عن حوش البيت..
رحت صوبو و گعدت يموو..هو گبل ذب جگارتو لأن يدري بيه اكره التدخين

- محمد لا تزعل..كلشي قسمه و نصيب

- لا عادي

جاوبني بصوت ناصي..و إني تنهدت و گلت
و ادحگ عليه

- شغير رايك ! يعني ليش خطبتها و انت ما تريدها

- سيد..ادري بنفسي ما راح الگه أحسن من تقيه
وحده تعرف كل عيوبي..و كل تصرفاتي المو حلوه بس ظلت شايله مشاعرها ناحيتي..

چنت ادحگلو و هو يحچي بصوت خافت..اني جريت حسرة و صديت عنو و گلت

- تدري انو انتوا تصافيتو..انت رفضتها مرتين و هي رفضتك..يعني بعد محد يلومك

دحگلي و ما عرفت اقرا معالم وجهو..چان شكلو قريب للشخص المخذول
اني گمت على حيلي و گلت

- فوت جوه الشمس عاليه هسا راسك يگوم يوجعك..

طبيت جوه و عفتو..
النهار كلو مر و محد فتح الموضوع..بالليل من صعدت فوگ غيرت هدومي..و فاتت ورايه ناز
دحگتلها و ابتسمتلها..انتبهتلها چانت تحب تشوف الأفلام..ف هي شغلت التلفزيون و دارتو على قناة الmbc2 و گعدت تتنظر فلم يبدي