| عشگ المداح | ' باللهجة العراقية '

البارت السابع

#عشگ المداح
#بقلم: الراوية
#البارت السابع

بسم الله ❤
اللهم صلِ على محمد و آل محمد❤

.

ناز..

- سيد شصاير !

حچتها الحجيه موجها كلامها ل سيد..اني حسيت گلبي صارت دگاته أسرع مئة مرة من الطبيعه..

ما اجا الرد منه..انما من تقيه الي تقدمت كم خطوة الهم و گالت

- الصليب من گبل عرس ياسر و سيد هو ضايع و نبشنا البيت عليه و ماكو..و هسا لگتو أحلام بغرفتهم
شوصلو !

باوعت عليه الحجيه و گالت

- صدگ يمه ؟

هزيت راسي ب اي و اني ما اعرف شنو اجاوبها..
شعور قاسي و كلش الي داعيشه..لثاني مرة يتهموني
قبلها خوالي و هسا هما..تقدم عمار كم خطوة و گال لأمه

- يمه خلي نفتهم السالفة..ناز انتي شوكت ضاع الصليب ؟

- و العذراء قبل العرس بفترة..دورت اله هواي و ما لگيته و قطعت الأمل انو الگاه..و هسا دخلت عليه أحلام و هي تتهمني و شمرته عليه..

تنهد عمار و باوع ل أحلام و گال

- أحلام متأكده انو لگيتيه بالغرفة..

- خوية اقسملك بالله شنو ما مصدگني ! والله لگيته على ميز المراية

- عمار و روح بابا ضايع..اسال تقيه إذا ما مصدگني

حچيتها و اني ابچي و هو جاوبني گبل

- ناز كافي تحلفين والله العظيم مصدگچ..

- زين قنعهم اني ما عليه و الرب

باوع عمار  ل سيد..الي اخذ وضع الصامت و بس يباوع للوجوه و يرجع يباوعلي..

- خلصتوا ؟

حچاها ببرود و اني باوعتله و عگدت حاجبي
و تسائل عمار ب

- شنوو

- خلصتوا تحاليلكم و سوالفكم ؟
يلا شتريدون اني الي خليت الصليب على ميز المراية

فتحت عيوني على وسعهن و هو كتف ايديه گدام صدره و كمل قبل لا أحد يدخل

- لگيتو قبل أكثر من اسبوعين و مثل ما گالت تقية و ناز قبل العرس..لگيتو بالطابق الثاني بالگاع شلتو و ظميتو وي هدومي و انتوا شفتوا الصار العرس و الهوسه و نسيت انطي للبنيه و اليوم تفطنت عليه و حطيتو على الميز گلت من اطلع اناوشوايها و فتت للحمام و انتوا تعرفون الباقي..و ها هي السالفة خلصت

اباوعله و اني فاتحه حلگي و مصدومه من كلامه..
يحچي بكل ثقة و برود و لا عبالك الي صار ما خلاهم يباوعلي بنظرة مو حلوه

- سكت دهراً و نطق كفراً

حچاها ياسر و هو يهز بأيده و نظراته على سيد الي خزره و الآخر تعدل بوگفته و سكت