في المسا رجعت البيت لقت امها قاعدة في الهول وشكلها معصبة لما شافتها ندهت عليها
عفاف : نغم ... تعالي بسرعة
نغم : ايوا ماما
عفاف : احنا قلنا شنو
نغم : في شنو
عفاف : انتي عارفة قصدي ... مش اتفقنا تنسي موضوع الغنا نهائي و تركزي على مستقبلك .. لحد هسي بتعامل معاك ك زولة واعية ماتجبريني اغير معاملتي لحاجة ماترضيك
نغم : حصل شنو ل دا كلو
عفاف : شفت الفيديو النزلتو رؤى .... اتطورتي يابت مجدي و بقيتي تغني في مسارح
نغم : الحكاية ما كده انتي فاهمه غلط
عفاف : شفت كل حاجة ما محتاجة منك توضيح
نغم : طارق قال لي ....
امها قاطعتها ... اصلا كل البلا من طارق اصلو مابخليو .... اسمعي كلامي كويس احنا رجعنا عشان قرايتك و عشان تبقى دكتورة ... تشيلي الكلام الفاضي من راسك و إلا مابرحمك
نغم : ياماما البسمعك بفتكر اني عايزه احترف الغنا كل ما في الموضوع هواية و بس ... لما كنت صغيرة بغني في احتفالات المدرسة و تاني غنيت في حفلة عيد الاستقلال بالسفارة و الباقي كلو مع اصحابنا في اعياد الميلاد والرحلات ... لامسكت مايك في حفلة عامة ولا ظهرت في تلفزيون ... حاجة بتسلى بيها .... بدندن مع نفسي وبس
عفاف : حتى مع نفسك ماتدندني .... مفهوم ... اصلا الموضوت ببدا كده وبعدين بكبر .. يلا امشي من قدامي
نغم طلعت غرفتها قفلت الباب شالت طرحتها من راسها بزهج و رمت نفسها على السرير ... قعدت تبكي بحرقه و قهر ..... ماسكتت الا لما سمعت صوت تلفونها بضرب ... كان يحيى المتصل ... ردت عليه
يحيى : صوتك متغير ... مالك
نغم : ولا حاجة
يحيى : مستحيل ... اكيد في حاجة ... احكي مالك
اتكلمت معاه و طلعت كل الفي قلبها ..... قال ليها طيب ممكن نهدا بالاول مافي مشكلة بتتحل كده
نغم : المشكلة ان ماما خاته في راسها حاجات مابتحصل ..... عمري ما اتخلى عن حلمي ان ابقى دكتورة اما الغنا بالنسبة لي حياة ... لحظات فرح بعيشها مع نفسي ... بابا فاهم وجهه نظري
يحيى : دا كلو من خوفها عليك ...مافي ام تحب تحرم اولادها من الحاجة البحبوها .. خليها تروق و كلميها بالهداوة
نغم : هي ماسمعت بابا مستحيل تسمعني
يحيى : انتي صاحبة الموضوع و اي كلمة منك بتكون اصدق و اعمق .... هسي هدي اعصابك و كلو بهون
نغم : ماشي ... يلا احكي لي .... كنت عايزني صح
يحيى : لا خلاص الموضوع ما خطير
نغم : لا بالجد ... اصلا كنت حضرب ليك
يحيى : يازولة عادي اهم شي تكوني تمام و بعدين بتكلم معاك
نغم : اوك ياسيدي
يحيى : طيب اخليك ترتاحي .... سلام
في الصباح ..... لقت امها و سامر بشربو الشاي ..... باست راس امها و قالت ليها ... حبيبتي عمري ما ازعلك و اوعدك الموضوع مايتكرر
عفاف : اتمنى
نغم : يلا ماشه
عفاف : اكلي ليك حاجة بالاول
نغم : ماينفع اتأخرت .... سلام
طلعت ركبت العربية و ضربت ل ربى ... اتأخرنا ياجماعة اطلعو
في الطريق ضرب ليها ابوها بتكلم معاها ... لما وصلو الجامعة و بتفتش مكان تقيف فيو التلفون وقع من يدها ... نزلت راسها تفتش عليه .... رؤى صرخت بصوت عالي ... انتبهي يابت ... رفعت راسها مخلوعة ... في عربية كانت قدامها مباشرة .. داست فرامل بقوة و وقفت .... الشاب السايق نزل من عربيتو و جاي عليها منفعل ..... نغم عاينت لصحباتها ... اووو علينا .... ربى قالت ليها انزلي اتفاهمي معاو .... فتحت الباب و نزلت وقف قصادها بعاين ليها من فوق لتحت و هي ساكتة و نظراتها كلها خوف ... الشاب صلح نظارتو قال ليها ... انتي تاني ؟!!!
نغم : انت الامبارح كنت اااااا
_ اي انا ... امبارح عايزة تضربيني و الليلة برضو عايزة تضربيني حكايتك شنو ... اكيد ماصدفة
نغم : يعني قاصدة مثلا
_ أسألي نفسك
نغم : شوف يا اخ اذا حابي تعمل من الحصل برنامج بالجد مافاضية ليك
_ ولا انا فاضي
نغم : طيب امشي منتظر شنو
_ منتظر تعتذري ... اعتقد من حقي
نططت عيونها و بتعاين ليه
_ الموضوت ماصعب و مامحتاج تفكير
نغم : اسفة اوك ..... ممكن تحرك سيارتك عندنا محاضرات
عاين ليها ابتسم بسخرية .... رفع نظارتو و مشى
ركبت عربيتها دمها فاير و بتكلم نفسها ...... ياااه على تقل دمك
ربى : اهدي يابت
نغم : واحد سخيف بالجد ..... و مشكورين شديد على الدعم ماقصرتو ان شالله اتفرجتو كويس
رؤى : يعني نجي نتهزأ معاك .... و قعدت تضحك فيها
نغم : اسكتي بالجد نرفزني
ربى : خلاص انسي و خلينا ندخل المحاضرة قربت تبدا
دخلو لقو شهد واقفة مع سارة بتحكي ليها .... امبارح فاتك نص عمرك لا فاتك عمرك كلو ما تتخيلي المفعوصة دي صوتها خرافي كيف
سارة : خسارة .... مامشكلة الجايات اكتر
شهد : نغم من هسي بكلمك في عرسي انتي ح تغني
نغم : ابشري ولا يهمك
طارق كان واقف بعديد شافهم و جاي عليهم .... شهد شهقت ... هو جاي علينا ولا انا بحلم
رؤى : اجمدي يابت ماتفضحينا
سارة : انا لازم امشي ... اشوفكم في القاعة
طارق جا سلم على شهد و إلتفت ل نغم قال ليها .... امك سمعتني موشح من الصباح ادتني من المنقي خيار
نغم : لازم يسمعوك كم كلمة ... يعني اتهزأ انا براي
طارق : عرفت كيف لكن
نغم : البركة في سنابات الست رؤى
طارق عاين ليها ... حيوانه خلاص انتي
رؤى : هوي انا مالي و مالكم
طارق : هسي كان ما ساي ...الحجة مالها بالسناب شات
نغم : عايزها تراقب طلعاتنا كيف ... نسيت ماما محامية
طارق : اسمعي لابعرفك و لابتعرفيني ... المرة الجاية امك بتسجني ... سلام
بعد ما مشى ... إنتبهو على شهد ماسكة يدها مخلوعة بتعاين ليها
ربى : دي مالها .... يابت يدك فيها شنو ؟
شهد : طارق سلم علي الليلة يدي بقطعها و بحنطها
رؤى : كمية من العولاق .... مبالغة لكن
شهد : دي حاجة اسمها حب و مشاعر يامتحجرة القلب
ربى : خلونا في المهم .... لاحظتو لسارة ... فيها حاجة غريبة
رؤى : كيف يعني
ربى : امبارح اتكلمت مع الولد داك و بعدها رفضت تحضر الحفلة وهسي مجرد ما شافت طارق جا مشت طوالي
نغم : عادي الموضوع ما فيو حاجة
ربى : انا متأكدة في شي
رؤى : اها يا كونان
ربى : بكرة تشوفو
مشو على محاضراتهم و بعد ساعتين عفاف ضربت لنغم طلبت منها ترجع البيت بسرعة .... هي ماشة على عربيتها سمعت صوت واحد بنده عليها من وراها .... وقفت و إلتفتت تشوفو ... كان نفس الولد اتكلم مع سارة يوم الحفلة ... قرب وسلم عليها
_ نهارك سعيد .. معاك أشرف
نغم : اهلا وسهلا
أشرف : ممكن نتكلم
نغم : بخصوص ؟؟؟!!
أشرف : موضوع مهم بالنسبة لي و ليك
نغم : هو انت بتعرفني ؟
أشرف : لا ... لكن بينا قاسم مشترك ... صدقيني ما حتندمي
نغم : حاليا مستعجلة
أشرف : اوك ... ممكن اخد رقمك و اكلمك
نغم : لا ... انت اديني رقمك بتصل لما اكون فاضية
أشرف : جدا
اداها رقمو و مشت ركبت العربية شافت التلفون لقت امها متصلة عليها ..... ضربت ليها
نغم : الحاصل شنو خوفتيني شديد
عفاف : احنا في المستشفى ... سامر جاتو الازمة تاني
نغم : كيف !!! .... يلا جاية عليكم
لما وصلت مشت الغرفة الفيها اخوها .... لقتو راقد على السرير موصلين ليه جهاز أوكسجين ... وقفت بتعاين بقلق سألت امها.... مالو ياماما
عفاف : انتي مش عارفة الغبار مابنفع معاه .... ناس المدرسة ضربو لي قالو فجأة نفسو أتكتم وبقى ماقادر يتنفس
نغم قربت منو باست راسو قالت ليه ... سلامات .... سامر زح الكمامة من فمو عاين ليها وقال كلو بسببك ياشينه
نغم : انا عملت ليك شنو كمان
سامر : جينا السودان عشانك
عاينت ليه بطرف عينها وقالت .... استنشق اوكسجينك وانت ساكت
سامر : زحي من الانبوبة ماتفجريها فينا يالغم
نغم : ماما شوفي ولدك
عفاف : اسكتو يا اولاد قاعدة اتكلم مع ابوكم (ألحان مغتصبة بقلم شيماء عثمان)
بعد ما الدكتور طمنهم على حالة سامر ... في المسا رجعو البيت .. أول ما وصلو يحيى كان واقف جنب الباب .. شافهم نازلين مشى سلم عليهم
يحيى : سلامات ياجماعة
عفاف : الله يسلمك ... حاجة بسيطة
يحيى : لو في أي شي انا حاضر
عفاف : مابتقصر ياولدي ... عن أذنك
وهم داخلين أشر لنغم بيدو انو ح يتصل عليها ... لكن امها انتبهت ... دخلو البيت ... مشت غرفتها وبتغير ملابسها تلفونها ضرب
يحيى : يعني جارتي و الحيطة لصق الحيطة و ما لامي فيك
نغم : الجامعة وكده .... انت كيفك
يحيى : شغال في الشركة مع الوالد بعد ما اتخرجت زي ما عارفة .... زهج عجيب و الحمدلله
نغم : لي بتقول كده
يحيى : الحكاية ما غريبة عليك ... حلم حياتي كان أدخل الكلية الحربية و لما قالو ما لائق طبييا
درست i t لا رغبتي ولا عايزها ... اللهم شهادة جامعية والسلام
نغم : طيب قررت تعمل شنو ..... مش زمان اتفقنا تسافر ... ليه ما عايز تقتنع
يحيى : خلاص اقتنعت و عايز اسافر اعمل العملية
نغم : واخيرا ... ايوا كده عايزة اشوف فيك روح العزيمة و الاصرار ... وعلى فكرة حاليا عمليات القلب المفتوح بقت اسهل مما تتصور و نسب النجاح عاليه
يحيى : طيب ما تتخرجي انتي وتعالجيني طالما واثقة كده
نغم : انا قدامي سنين ....انت امشي اعملها وتعال لينا
يحيى : بالمناسبة من ما رجعتي ماسمعت صوتك
نغم : قصدك شنو
يحيى : غني
نغم : متين ؟
يحيى : هسي
نغم : اكيد بتهظر
يحيى : اممم يعني ما استاهل
نغم اخدت نفس عميق ..... رفعت راسها عاينت للسقف و سافرت بعيد لدنيا الألحان بدأت تلعب بالنوتات الموسيقية عشان تغرد أعذب الأنغام 🎶 منو القال ليك 🎶بنتحمل فراق عينيك 🎶 وحاة الريدة يا أسمر فراقك ثانية مابنقدر 🎶و لكن غايتو نتصبر 🎶
يلا تصبح على خير ..... فقلت الخط ماسكة تلفونها وسرحانة ...فجأة باب غرفتها اتفتح من خلعتها نطت .. ماما !!
عفاف وافقة في نص الغرفة مربعة يدينها وصارة وشها بنهره قالت ليها ... عندك شنو مع يحيى يابت
نغم : ولا حاجة
عفاف : بت .... اتكلمي معاي كويس
نغم : والله مافي شي مالك ياماما
عفاف : شفتو بأشر ليك .... مش كنتي بتتكلمي معاوهسي
نغم : ايوا .... عادي احنا جيران
عفاف : لا ماعادي مفهوم
نغم : انا هسي كبرت ماما .... و ما حصل يوم عملت حاجة غلط .... انتي بتعرفني كويس
عفاف : حتى لو كبرتي لسا صغيرة و مابتعرفي الزمن بقى كيف ... اولاد الحرام في كل مكان .. لو ماخفت عليك اخاف على منو
نغم : الله يخليك لي ياحبيبة قلبي .... اطمني و ماتشيلي هم
عفاف : شايلة الهم ... و حاسه احساس ماحلو من ساعة وصلنا هنا ... الله يكذب الشينة ويسترها عليكم يا اولادي !!! .
لنا لقاء أخر ........
