اليوم التاني في الجامعة ... نغم وصحباتها قاعدين بتونسو .... إلا سارة قاعدة في الطرف ساكته وشغالها بتلفونها .... بعد شوية قامت بدون ماتقول كلمة ... خلتهم بتلفتو في بعض مستغربين
ربى قالت ليهم مش كلمتكم البت دي ماطبيعية
شهد : حركاتها دي بتعملها من ما عرفتها لكن الايام دي زادت شويه
نغم : ماعلينا بالناس ... المهم عملتو الاسايمنت بتاع الدكتور
رؤى : ولا كتبت كلمة واحدة
نغم : امبارح عملت نصو ... رايكم شنو نمشي المكتبة نشتغلو
ربى : احسن فكرة
نغم : قومو طيب
لما كانو ماشين في الطريق ... طارق ضرب ل رؤى قال ليها الليلة صاحبو ح يفتتح كافية صغير و الفرقة عاملة حفلة عشانو .... عازمين اهلهم و اصحابهم و عايزهم يجو يحضرو الافتتاح رؤى قالت ليه اكيد جايين بس رسل اللوكيشن .... قفلت التلفون و قالت ليهم .... T عازمنا حفلة و غدا
شهد شهقت ... قلتي شنو !!! عيدي تاني عشان قلبي قرب يقيف
رؤى : انتي منو عزمك اصلا
شهد : ماشة غصب عنك .... حبيبي T عازمني
قعدو يضحكو فيها ....
نغم : بالذمة تلقو وين مره أخ عسل كده
شهد : اي ياخ .. كلميهم
ربى : المشكلة ما هنا .... المشكلة اولادهم بكرة يبقو كيف
رؤى : عاهات على شكل اطفال
شهد : انتو مالكم اولادنا و احنا مبسوطين .... بس سلموني راجلي و امشو مننا بعيد
قعدو يضحكو في كلامها .... فجأة نغم سمعت صوت واحد بناديها .... عاينت لقتو أشرف جاي عليهم .. سلم و قال ليها ممكن دقيقة ....اتحركو خطوتين و وقفو
أشرف : انتظرت تلفونك .... معقول لحد هسي ما فضيتي
نغم : اسفة جدا .... صدقني كنت مشغولة
أشرف : مافي مشكلة .... ممكن نتكلم هسي
نغم : لكن صحباتي منتظريني
أشرف : هم كلمتين بس ... اسمعيهم مني و امشي
نغم : اوك .... رفعت راسها قالت لصحباتها يسبقوها على المكتبة ..... و سألتو ممكن أعرف الموضوع
أشرف : ماينفع هنا ... خلينا نمشي مكان هادي
نغم : هنا كويس ... ارجوك ادخل في الموضوع
أشرف : طيب ياستي .... الحكاية انو عندي فرقة موسيقية ... انا المغني و المؤسس .... استايلنا جديد مزيج بين الشرقي و الغربي .... الفرقة ناجحة و مطلوبة بس المشكلة الوحيدة بنقصنا العنصر النسائي و بصراحة لما غنيتي مع طارق في النادي في ناس صورو كم مقطع فيديو و رسلوهم لي من ماشفتهم و سمعت صوتك وانا مسحور بيه .... وجدت فيك ضالتي و يشرفني جدا انضمامك لينا .... قلتي شنو
نغم : يسعدني و يشرفني لكن للاسف ما بقدر انظم لفرقتكم
اشرف : ليه يعني ... شنو المشكلة
نغم : حاليا دراستي أهم حاجة و تانيا الغنا بالنسبة لي مجرد هواية لا أكتر
أشرف : حرام تبخلي على الناس بصوتك ... من حقهم يسمعوك
نغم : صدقني مابنفع .... اسفة ... عن أذنك
مشت خلتو واقف محتار بعاين ليها .... دخلت المكتبة ... شافت صاحباتها قاعدين ... جرت الكرسي وقعدت .... كل واحدة منططة عيونها اكبر من التانية .. رؤى سألتها ...في شنو ... ردت عليها مافي شي اقرو قرايتكم ... خلصو يومهم ... استعدو عشان يمشو الكافيه لطارق ... يحيى ضرب أتكلمت معاه و عزمتو .... ربى بتعاين ليها بإستغراب ..
نغم : مالك يابت
ربى : بقيتي غامضة و مخيفة
نغم هزت راسها وابتسمت بسخرية ..... لما وصلو لقو طارق مع اصحابو في المدخل ... قال ليهم طربيزتكم جاهزة ... قعدو و بعد شوية الفرقة بدأت تعزف .... طارق ماسك الجيتار بلعب بأوتارو و بغني و هم بسمعو فيه مبسوطين ...شهد من اول ماوصلت و عيونها ماشالتها منو وهم كل شوية يشغلوها ليها .. . بعد شوية طارق جا وقف جنب نغم قال ليها اغنية واحدة بس
نغم : ولا نص اغنية
طارق : ليه كده
نغم : ما عايزة اي مشاكل مع خالتك عفاف شيل المايك بتاعك و اتوكل
ابتسم و مشى خلاها ... يحيى وصل ... واقف بعيد بعاين ليها لما شافتو طلبت منو يقعد معاهم لكن رفض .... لما جو طالعين وقف جنبها و قال ليها ... كنت متمني اسمع صوتك
نغم : لما نرجع البيت تعال المكان داك
ابتسم ...هز راسو و مشى .. ... ركبو العربية راجعين البيت رؤى .... بتعاين ليها
نغم : الحكاية شنو اليوم انتي واختك .... من قبيل تحمرو لي
رؤى : شوفي ... انا عمري ما حبيت ولا بعرف الحب لكن نظرات العشق واضحة .. ويحيى متيم بيك
ربى : هي عارفة لكن بتنكر
نغم : انتو خالص مابتعرفو يعني شنو صداقة ؟؟؟
ربى : مابنعرف
(ألحان مغتصبة بقلم شيماء عثمان)رجعت البيت ... لقت رسالة من يحيى ....مستنيك .... لبست توب ونزلت الحوش واقفة جنب السور الفاصل بين بيتهم و بيت ناس يحيى .....كان بنده عليها من ورا الحيطة ... ضحكت قالت ليو .. اتذكرت ايام زمان ... لما كنا بنجي اجازات ونعقد نتكلم من ورا الحيط عشان ما عندنا تلفونات
يحيى : كنت بعمل روحي عايز اقرا اجيب كتبي و اقعد هنا مخصوص عشان اسمعك ... اول مره اسمعك فيها كانت هنا كنتي بتدندني و ماشاعرة بوجودي من يومها ادمنت انغامك
نغم : هسي جاهز
يحيى : جاهز و معاي قهوة كمان ... اتفضلي
نغم : ح ترميها من فوق ولا كيف
يحيى : ممكن اتسلق الحيطة
نغم : خليك مكانك و أسمع .....
هبت نسائم النيل الباردة .... شالت الألحان ... نشرت شذاها في المكان .... عبرت فضاءات و فضاءات .. تساقط رذاذها .... هبط في الوجدان ... أتخلل المشاعر ... سكن القلوب .... نشر السلام ..
🎶 كتير بنعشق ولا بنطول 🎶 كتير بنعشق ولا بنقول 🎶و مافيش حكاية بتستمر زي ما بدأت ليه على طول 🎶 في عشق بستنانا و عشق بنستناه و عشق بينسينا العشق العشقناه 🎶 .
في صباح اليوم التاني اول ما صحت لقت رسالة في تلفونها ... محتواها . مافي أجمل من أن الواحد ينوم ... يحلم ... يصحى على صدى انغام الحياة ..... قراتها ابتسمت و قامت اتجهزت مشت على جامعتها ... لما وصلت و عايزة توقف عربيتها في مكان فاضي ... ظهرت عربية و عايزة توقف في نفس المكان حقها .. وقفو الاتنين قصاد بعض .... رفعت راسها شافتو كات نفس الشاب المفتري بتاع اليوم داك ... هو بعاين ليها و بأشر بيدو عشان ترجع .... نغم صرت وشها بزعل و بتتكلم مع نفسها ... أصلو الليلة مابخليك نشوف ح تعمل شنو عامل نضاراتك ديل دي الشايب ..... وقفو مسافة دقيقة كاملة كل بعاينو لبعض ...في النهاية الشاب نزل و قف جنب عربيتها و دق القزاز .... نزلتو و سكتت
_ الفهم شنو ياأنسة
نغم : عايزة اقيف
_ ارض الله واسعة
نغم : الموقف حقي
_ دقيقة أشوف اسمك مسجل عليه .... وقعد يتلفت
نغم : ما تستظرف اوك ... و بعدين من الذوق لما تشوف بنت تكون جنتل معاها
بنظرات ساخرة ابتسم و قال ليها .... امممم فعلا !! .... صلح نظارتو ومشى ساق عربيتو للخلف .. هي مغيوظه و الدم بغلي في عروقها .... بتطنطن ... رخم رخامة البني ادم دا اووووف
وقفت العربية و نزلت الجامعة لقت صاحباتها ماشين على القاعة بسرعة .... سألتهم في شنو ... ردت عليها رؤى ... الدكتور طلب الاسايمنت هسي و لو ماسلمناه نعتبر رسوب
شهد : الراجل دا بخوفني والله
ربى : مابخوف مفتري و شايف نفسو بس
نغم : ابدا ما زي المفتري اللاقاني برا
شهد : منو دا
نغم : انسي ياخ خلينا نمشي
مشو الكلية سلمو اوراقهم و حضرو المحاضرة ... بعد ما خلصو لمحو سارة قاعدة في ركن براها ... طوالي وقفو جنبها .....
رؤى : وينك يابت
سارة : الايام دي مشغولة شوية
نغم : لو في حاجة نقدر نساعدك فيها احنا حاضرين
سارة : مشاكل في البيت ماتشغلو بالكم
ربى : عادي ياخ كلنا عندنا مشاكل... المهم ماتنسي احنا صحبات
سارة : اكيد مابنسى
شهد : انا جعانة خلونا ناكل حاجة .. يلا سرورة
سارة : امشو بحصلكم بعد شوية
نغم : لا ... قومي معانا
سارة : و الله بجي انتو ماتتأخروعشاني
ربى : اوك ... لكن بننتظرك .... يلا بنات
و اثناء ما هم قاعدين في الكافتريا ... جا أشرف سلم عليهم و قال لنغم عايزك خمسة ...ردت عليه حاليا مشغولة
أشرف : خمسة دقايق بس ... ما باخد من وقتك كتير
قامت وقفت معاه على جنب
أشرف : بتمنى انك فكرتي في كلامي تاني
نغم: لا
اشرف : ليه يعني ... مستقبلك مابهمك
نغم : مستقبلي في دراستي
أشرف : ما بصدق كلام زي دا يطلع منك انتي ... وقفتك في المسرح و اداءك يدل على واحدة متمكنة و عندها موهبة كبيرة .. لي تقتلي موهبتك .. شوفي الساحة الفنية حولنا ... خامة صوتك القوي و الناعم في نفس الوقت معدومه يعني تضمني نجاحك بالراحة و فرقتي تحت أمرك
نغم : بشكرك على كل كلمه بس صدقني ماينفع .... انا مابفكر الا في مستقبلي
أشرف : دا مستقبلك برضوو..... فكري بذكاء
طارق جا داخل الكافتريا و شافهم بتكلمو ..... وقف جنب نغم ... عاين ل أشرف بطرف عينو و سألها في حاجة ؟
نغم : ابدا بتكلم مع اخ ......
طارق قاطع كلامها .... بعرفو يطلع منو .... في شنو
أشرف عاين ليها متجاهل وجود طارق ... قال ليها ممكن نمشي مكان تاني و نتكلم
طارق : ممكن انت تختفي من قدامي بالذوق
أشرف : انت الدخلك شنو اصلا
طارق قرب منو زيادة و بنظرة حادة و صوت غاضب قال ليه ... ابعد بعيد وتاني ما اشوفك ولو بالغلط تتكلم معاها مفهوم
أشرف : انا اتكلم مع اي بت دا ماشغلك
طارق : مابهمني لكن نغم خط احمر ... ماتتعدى خطوطك
نغم متوترة بتعاين ليهم و بترجف .... اشرف سألها ... الزول دا فردتك ولا صاحبك ولا شنو موقعو من الاعراب بالظبط
طارق مسك اشرف من قميصو قال ليو ..... كلامك معاي انا
الموقف اتوتر شديد و كل الموجودين فؤ الكافتريا انتبهو لاصواتهم العالية .... قبل ما اشرف يرد على طارق و يصلو مرحلة الاشتباك بالايادي ... في مجموعة شباب اتدخلو و فرقوهم من بعض ... بعد ما طلعو اشرف و الوضع هدأ شوية .... طارق مسك نغم من يدها بقوة و جراها على برا و هي بتقول ليه .. طارق دقيقة ...اااي يدي .... طارق لحظة طيب ..
وقف و عاين ليها بغضب ....عندك شنو مع الزفت دا
نغم : ولا حاجة
طارق : ماتجننيني ..... اتكلمي
نغم : والله ولا شي ... عرض علي انضم لفرقتو و رفضت ... دي كل القصة
طارق : اياك تتكلمي معاه تاني ... واضح
نغم : حاضر لكن في شنو ل دا كلو
طارق : تسمعي الكلام بدون اسئلة
نغم : طيب حاضر ... ممكن ماترفع صوتك كده .. في شنو
طارق : انتي معتبراني اخوك الكبير و لا لا
نغم : طبعا .... وانت عارف من يوم اتولدت وانا ماعندي اخ كبير غيرك .... كلامك على العين والراس بس كمان من حقي افهم
طارق : ياستي بغظ النظر عن خلافاتي الفنية معاه دا واحد ما محترم ... احنا اولاد زي بعض و بنعرف ... مابرضى الزفت دا يعاين ليك من الاساس مش يتكلم معاك
نغم : حاضر ياعمنا .... نهائي مابتشوفني اتكلم معاو ... بس انت روق دمك منظرك وانت معصب زي الزومبي ..... وقعدت تضحك فيه
طارق : زومبي يعرسك قولي آمييين .
لنا لقاء أخر .....
