وصلو المطار .... ودعت اهلها بالدموع ... ركبوها الطيارة ... اتذكرت نفسها قبل سنتين ... نفس اللحظات مع اختلاف المشاعر ... كانت جاية شايلة احلامها قبل الشنط ... عندها وزن زايد من الفرح .. طيارتها هبطت على مدرج الامل ... و بدون سابق انذار كلو اتبخر مع الهوا و رجع الحلم .... مجرد حلم !
نغم في الطيارة قاعدة جنب الشباك شايفة الاضواء ... طشاش بسبب الدموع ... بتبكي في صمت .. عادل جنبها ساكت بعاين ليها .. لحد ما الطيارة اقلعت ما قال كلمة
بعد ساعة صمت قال ليها مفروض تاكلي ... عاينت ليو .. نزلت عينها وسكتت
عادل : على فكرة كل البتعمليو دا مامنو فايدة
نغم ساكتة و مابترد ....
عادل :ح تاكلي لان مواعيد الدوا قربت
نغم : و اذا ما اكلت .. تأكلني بالغصب برضو
عادل : لي بتقولي كده
نغم : مش دي طريقتك .. مش كل حاجة عندك بالغصب .... اتفقنا تلغي الزواج و نقضت الوعد
عادل : احنا ما اتفقنا ... انتي قلتي كلام و انا ما وافقت عليه
نغم : كنت عارف اني رافضة الزواج
عادل : عايزة شنو طيب
نغم : ارجع اهلي
عادل : جدا .. هم جايين يحضرو العملية لما تبقي كويسة ترجعي معاهم
نغم عاينت ليو و سكتت....
عادل : هسي تاكلي عشان مواعيد الدوا
وصلو مطار هثرو ... احمد صاحبو كان في استقبالهم ... بارك ليهم و وصلهم البيت .... عادل نزلها بالكرسي دخلها العمارة ... لازيها و بتكلم معاها ... استأجرت الشقة في الدور الأرضي مخصوص عشان تتحركي براحتك ... و جنبنا في حديقة ظريفة ممكن تطلعي لوحدك لو حابة ... في العمارة في سكان سودانين ممتازين و اصلا المنطقة دي اغلبها عرب حتعجبك ..... نغم ساكتة منزلة عينها على الارض ... دخلو الشقة ... عبارة عن صالة كبيرة فيها طقم جلوس و تلفزيون كبير .... طربيزة سفرة وفي الركن طربيزة مكتب صغير مليانة كتب .. فاتح عليها مطبخ استايل أوروبي ... و غرفة جنبها حمام .
اخدها الغرفة و بدا يدخل الشنط ... قال ليها خليني اساعدك عشان نطلع ناكل ... احمد ماقصر جاب لينا أكل
نغم : ماعايزة مساعدة بقدر ادبر اموري لوحدي وما عايزة اكل
عادل : براحتك ... على العموم انا برا لو احتجتي مساعدة لكن الاكل ماعلى كيفك عشان عندك ادوية
فتح الدولاب شال غيار و طلع ...
بعد مسافة عادل دخل الغرفة لقاها بتبكي اتخلع .... مشى قعد قصاد ركبها ... سألها ... حبيبتي مالك .. رفعت راسها بتمسح في الدموع .... ماقادرة اعمل حاجة ... ما قادرة اغير ملابسي و لا افتح الشنطة حتى ... ماقادرة اقوم من الكرسي الملعون دا ... عاجزة عن ابسط الحاجات .. غطت وشها و كملت بكى
عادل مسك يدها نزلها .... اهدي شوية ماتعملي في روحك كده ... الموضوع بسيط طولي بالك بس
قام فتح شنطتها ...قال ليها تعالي اختاري ... ماشي اجهز ليك الحمام ما تتأخري لأن الاكل برد وانا ميت جوع .... طلع خلاها تجهز وبعد ما خلصت طلعت لقتو مجهز الأكل منتظرها ... عاين ليها و ابتسم
عادل : كده تخلي راجلك جعان
ابتسمت نص ابتسامة و سكتت ... حركت الكرسي عايزة تصل لطربيزة السفرة لكن الكنبة ماسمحت ليها بالمرور ... عادل انتبه ليها ... جا بعد الكنبة قال ليها بكرة بغير نظام البيت عشان تقدري تتحركي براحتك .... قعدو ياكلو ... نغم ساكته ما قادرة تعاين ل عادل العيونو عليها طول الوقت ..
عادل :لندن باردة لكن مع مرور الوقت بتتعودي على الطقس ... انا بنزل بكرة الشغل و انتي تبدأي بالعلاج طوالي ... نعمل الفحوصات و صور الاشعة اللازمة عشان نقيم الحالة
نغم : طيب
عادل : بالمناسبة ... المكتبة دي فيها مجموعة كتب علمية ممتازة .... استفيدي من فترة فراغك و اقريها ... بكرة بجيب ليك شريحة عشان تتواصلي مع اهلك .. اخدي راحتك في الغرفة و انا بنوم هنا على الكنبة
نغم بتسمع كلامه و ساكتة ... خلصت اكل دخلت الغرفة و قعدت صاحية للصباح ...
في اليوم التاني سمعت اصوات كركبة برا جرت نفسها بصعوبة قعدت على الكرسي المتحرك و طلعت لقت عادل في المطبخ بجهز الفطور .... اول ما شافها ابتسم قال ليها .. اصبحتي كيف حياتي
نغم : الحمدلله
عادل : مفروض امشي المستشفى ... فطورك جاهز و التلاجة فيها اكل ... ممكن تستخدمي التلفون الارضى تتصلي علي لو في حاجة و انا كل ما القى فرصة بضرب اطمن عليك ... اهم شي ماتنسي مواعيد الدوا ... قرب منها باس راسها قال ليها حشتاق ليك ... ابتسم شال مفتاح عربيتو و طلع .
قضت اليوم كلو لوحدها ... شوية تبكي و شوية تسكت لحد ما رجع عادل بالمسا و اليوم البعدو اخدها المستشفى عملت مجموعة من الفحوصات . بعد ماخلصو قعد يفسحها في شوارع لندن مرو بساعة البيغ بن ... و تاني وقف العربية قال ليها ... نهر التايمز نقي بقلوب العاشقين ... انزلي استنشقي من نسماته ... نزلها من العربية ختاها على الكرسي المتحرك بلزها و بحكي ليها ... عن القصص الغرامية السمعها ... نغم ساكتة و بتتأمل وقف جنب كرسي خشبي ... قعد و هي في كرسيها جنبو ... قال ليها طولت ما سمعت صوتك
نغم : عايز تسمع اي صوت
عادل : احلى صوت في الدنيا .... انغامي لما بتعزف على اوتار القلب
نغم : انغامك غرقت زي قصص الحب الغرقت في النهر القدامك دا
ابتسم و قعد يغني 🎼 🎵اسمر جميل عاجبني لونو 🎵كحل سواد الليل عيونو 🎵
🎵اسمر جميل بادي الوسامة 🎵ضوا الجمال وجهو ابتسامة 🎵فوق الخديد عجباني شامة من العيون الله السلامة 🎵حبيبي يا اسمر 🎵
بتعاين ليو بإستغراب ... ابتسم قال ليها عارف صوتي شين لكن القعدة محتاجة لحن .
ركبو العربية قال ليها ... في مطعم عربي جميل عازمك عشا
نغم : لا ما عايزه رجعني البيت
عادل : لي في حاجة ؟
نغم : تعبانة و عايزة انوم
عادل : تتعشي و بعدين تنومي
نغم : خلاص ناكل في البيت
عادل : في المطعم و ما على كيفك
نغم : اكيد ما على كيفي مش كل حاجى عندك بالغصب
عادل : طيب ما انتي عارفة ... مايحتاج نعيد الكلام كل مرة (ألحان مغتصبة بقلم شيماء عثمان)
مر يومين و عادل مقسم وقتو بين الشغل و بين يهتم بيها ... بياخدها المستشفى ... بحاول يطلعها من جو الكآبة لكن هي ما قادرة تتقبل الوضع ... طول اليوم زهجانة و دموعها نازلين ....امها و صحباتها طوالي معاها بالتفون ... وبرضو الوجع في محلو و يمكن زاد كمان .
بالمسا عادل جا من الشغل قال ليها في ضيوف جايين
نغم : ضيوف .... منو ديل
عادل : صاحبي احمد و زوجتو
نغم : لكن انا ما عايزة اتعرف على ناس هنا
عادل : اكيد ما حنطرد الضيوف من بيتنا
نغم : كان مفروض تاخد رايي
عادل : كنت في غرفة العمليات ماقدرت اضرب ليك
عاينت ليو و سكتت ... جا احمد مع ولاء زوجتو ... استقبلهم عادل قدم ليهم العصير و نغم لسا في الغرفة ما طلعت .... مشى يشوفها لقاها قاعدة على الكرسى و مربعة يدينها .. قال ليها الضيوف برا لي ماجيتي سلمتي
نغم : ماعايزة اقابل زول افهمني ياخ
عادل : اطلعي لضيوفك عيب كده .... نغم مجدي البعرفها بت اصول ما بتتصرف بالشكل دا
عاينت ليو و سكتت ... لزاها بالكرسي طلعها ليهم ... سلمت في خجل ... ولاء كانت صاحبة وش بشوش اول ماشافتها ابتسمت ... قالت لعادل عروسك ماشالله زي القمر طلعت ماهين يادكتور
ضحك .. قال ليها مافي زول هين الزمن دا ... قعدو يضحكو و يتونسو ... نغم شوية شوية اخدت على الجو و بدأت تشاركهم الكلام
ولاء : اعتبريني اختك الكبيرة و اي حاجة عايزها انا حاضرة
نغم : شكرا ليك
ولاء : ابدا ماتفتكري روحك في غربة كلنا معاك و ماتخافي .. لو عادل عمل ليك حركات تلفون واحد و بجي اوضبو ليك
نغم قعدت تضحك ...عادل عاين لأحمد قال ليو يا الاخو قول حاجة عشان احنا بنضيع
احمد : الله معاك يامعلم . ... اوو نسيت ماقلت ليكم بما ان بكرة الاحد الشباب محتفلين بيك مع العروس و عاملين حفلة بسيطة و عشا في النادي على شرفكم
عادل : مابتقصرو والله
ولاء عاينت لنغم وبصوت واطي قالت ليها ... لو حابة اجي اساعدك في اللبس انا موجوده
نغم : لا شكرا
احمد : احنا نستأذن و نشوفكم بكرة بدري
طلعو ... عادل ودعهم و نغم دخلت الغرفة قفلت الباب ... في اليوم التاني صحت من النوم ما لقت عادل في البيت مشت بكرسيها المطبخ عملت لروحها نسكافية فتحت التلفزيون و قعدت تتفرج بعد شويه ... عادل جا داخل شايل معاه اكياس ... قرب منها باس راسها قال ليها وحشتيني .... نزلت راسها و سكتت ... مد الكيس قال ليها ... اتمنى زوقي يعجبك
نغم : دا شنو
عادل : فستان عشان حفلة الليلة
نغم : لكن انا ما ماشة
عادل : كيف يعني
نغم : قلت ليك ما عايزة اتعرف على ناس ما عايزة اشوف زول و انت مصر تحرجني
عادل : احرجك كيف فهميني لأني بالجد ما فاهمك
نغم : ما عايزاك تفهمني عايزاك تخليني في حالي ... ممكن
عادل : الما ممكن البتعملي فيو دا ...فهميني مشكلتك شنو
نغم : ماعايزة زول يشوفني كده ... مشلولة على كرسي متحرك ... نظرات الناس بتقتلني انت بتجبرني نمشي مطاعم و تعرفني على اصحابك عشان يشفقو علي ... ما عايزة حاجة خليني محبوسة في غرفتي
عادل بعاين ليها بإستغراب ... قال ليها ما قادر اصدق القدامي دي نغم !! كيف تفكري كده ... متين وصلتي مراحل الضعف دي .... كيف قوتك اتلاشت بسهولة .. وين العزيمة والاصرار الحبيتهم فيك خسارة الآمال الرسمتها عليك
قعدت تبكي و تقول ليو كفاية ... خلاص ... حرام عليك
عادل : اطلعي من السجن السجنتي روحك فيه و طلعي النظارة السوداء اللابساها .... شوفي الكون حولك كيف ..... المهم جهزي نفسك الساعة 6 بنطلع من البيت ... عاينت ليو و دخلت الغرفة
بعد ساعة دخل الغرفة لقاها بتبكي و لسا مالبست ... نزل على ركبو قعد قصاد رجلها و بمسح دموعها... عادل : مالها حبيبتي
نغم : ممكن ما امشي ؟
عادل : الناس عذبو روحهم وعملو البرنامج عشانا ... ينفع مانمشي ؟
نغم : صدقني ماقادرة
عادل : اتكلمنا قبيل و مافي داعي نتكلم تاني .... هسي البسي لأن لندن كلها منتظرة تشوف عروسي الحلوة .. احلى بت فيك دنيا ... ومن الاخر كده عندك ربع ساعة مالبستي بجي البسك بنفسي و اعمل ليك ميك اب كمان و ما مسؤوليتي لو عملت ليك الفاونديشن في شعرك و الاي لاينر في خدودك .. استحملي النتيجة براك
نغم منططة عيونها بتعاين ليو ... قال ليها مالك ... سألتو طيب و الروج حتعملو وين
عادل : لا روج ما معانا
نغم : ليه ؟
عادل : الروج حرام
عاينت ليو وقعدو يضحكو الاتنين .
لنا لقاء أخر
