بعد يومين في الجامعة .... نغم في الجامعة خلصت محاضرات و عايزة تطلع لقت أشرف واقف جنب عربيتها و الظاهر انو كان منتظرها ..... لما شافها ابتسم وقال ليها يعني إلا أشرك ليك .... ردت عليه بنص إبتسامة و سكتت ....
أشرف : ممكن افهم الحاصل شنو وليه طوالي متجاهلاني
نغم : مافي حاجة ... بس الايام دي مشغولة شويه
أشرف : متين تكوني فاضية عشان نتكلم
نغم : ماعارفة
أشرف : لا انتي عارفة و انا هسي عرفت الحاصل
نغم إرتبكت شديد و التوتر بقى ظاهر عليها .... تلفونها في اللحظة دي ضرب انجدها من الموقف الصعب .... إلتفتت على اشرف قالت ليو لازم ارد على الاتصال دا ... فتحت الخط وركبت العربية ... امها كانت المتصلة ..
عفاف : انتي خلصتي
نغم : ايوا و هسي جاية
عفاف : امشي لأخوك المدرسة لأن الترحيل حقهم معطل
نغم : حاضر
وصلت المدرسة و شافت سامر واقف مع نفس الاولاد الكان واقف معاهم قبل كم يوم ... لبسهم مامظبوط ... وقفتهم مريبة واشكالهم مامريحة ..... سامر لمحها طوالي جا ركب العربية ... (ألحان مغتصبة بقلم شيماء عثمان) عاينت ليه وسكتت صر وشو و قال ليها في شنو
نغم : انت عارف
سامر : اتحركي ياخ من قبيل واقف في الشمس
نغم : الاولاد ديل مابشبهوك وانت كبير و عارف الصح من الغلط
سامر : هسي شفتي حاجة غلط
نغم : ياريت تنتبه اكتر
سامر : اووف ياه خلينا نمشي
نغم : اوك
دخلو البيت .... لقو امهم بتجهز الغدا ندهت عليهم ... يلا يااولاد غيرو سريع و تعالو ... نغم قربت من امها باست راسها اما سامر طلع غرفتو بدون مايقول كلمة ... امها سألتها ..مالو الولد دا .... ردت عليها سامر و حركاتو قال اتأخرت عليو وقف في الشمس كتير .... المهم الجميل طابخ لينا شنو ميته من الجوع ...امها قالت ليها ... طيب غسلي يدك وتعالي بسرعة
في المسا .... رؤى ضربت و قالت ليها .. نادي خالتو عفاف و سامر وتعالو بيتنا سريع ..... نغم اتخلعت و سألتها في شنو ... ردت عليها بس انتو تعالو .... كلمت امها و طلعو سريع .. لقو ناس طارق عاملين لأمهم حفلة صغيرة في حديقة البيت ... وابوهم جا من الامارات مخصوص عشان يحتفلو بعيد زواجهم .... عفاف مندهشة سألت ام طارق .. دا شنو !!
نور : انا زاتي ماعارفة .. طارق قال لينا نلبس عشان نتعشى برا ولما طلعت لقيت تجاني قاعد في الحوش
نغم : عمو تجاني كان تجيب بابا معاك
تجاني : المره الجاية ... اصلا اخدت اجازة يومين اسلم على نور والاولاد وراجع
نغم إلتفتت على رؤى ...كان ممكن تكلميني بطريقة ألطف من كده هسي جينا و فاكرين في مصيبة
رؤى : اصلا ماينفع معاك الا كده ولا كان قعدتي لينا ساعتين في المرايا
ربى جات طالعه من جوا شايلة تورتة كبيرة ..... سمع هووووس ... مطلوب حضور العرسان فورا وسمعني سلام احلى عيد زواج ....نور و تجاني طفو شمعة زواجهم ال29 باسها في راسها وقال ليها ربنا ما يحرمني منك يااغلى الناس .... فجاة سمعو صوت جيتار طارق و بدا يغني أغنيه هادية رقصو عليها امهم وابوهم سلو ... رؤى بتصور و ربى مسكو يد سامر جرتو رقصت معاه .... عفاف طوالي ضربت لمجدي فيديو ... قالت ليو .. شوف صاحبك رجع 20سنة ... و بضحكو فيهم ... طارق بأشر لنغم قال ليها الجماعه ديل محتاجين منك هديه ... ابتسمت و وفقت في النص و بدات تمايل اوتارها الصوتية مع الالحان 🎼
🎶من حور الجنان أم أنت إنسان الكمال 🎶هل أنت الملاك جيت توري الناس الجمال 🎶سبحان من نشأك حَسن و في غاية الجمال يهواك الجنوب و إليك ينقاد الشمال 🎵ما اظن يحصو حُسنك لو يحصو عدد الرمال وبإيه يقدروك ياملك ملوك عصر الجمال🎵
انقطعت لحظات الصفاء على صوت الباب بخبط بقوة و بطريقة مخيفه خلاهم كلهم في حالة دهشة ... اتقدم تجاني وفتح الباب .... دخل علي خال نغم منفعل وعيونو بتطلق شرار ... تجاني قال ليو اتفضل لكن علي رد بنبره غضب ماجاي اتونس ... رفع صوتو زياده ...ياعفاف جيبي اولادك و امشي بيتك سريع
عفاف : في شنو يا اخوي
علي : قلت ليك امشي بيتك
تجاني : استهدى بالله يارجل في شنو
علي : دي امور عائلية ماتتدخل
تجاني : العفو
عفاف محتارة .... قالت لاولادها قومو .... طلعو سريع و اول مادخلو البيت علي قفل الباب بقوة و صرخ بصوت عالي نغغغغغم تعالي ..... نغم مصدومة بتعاين لخالهاو مافاهمة البحصل شنو ..
علي : مش قلت ليك ما اسمعك تغني تاني
ردت عليه بلعثمه .... أأانا غنيت مع ناس البيت بس
علي: ولا حتى مع نفسك.... حذرتك قبل كده ما اسمع صوتك ... بتكسري كلامي
عفاف : مالك ياود امي الحاصل شنو
علي : انتي اسكتي خالص ... أخر الزمن حفيدة الشيخ الطاهر تطلع غناية
عفاف : البت بتغني بينا بس عادي
علي : لا ماعادي فاهمة
نغم دموعها على خدها .... خالو انا ماعملت حاجة غلط و لا الغنا عيب طالما الزول محترم نفسو ... اكيد بحترمك لكن ماممكن تتكلم معاي بالطريقة دي ..... وقبل ماتخلص كلامها اداها كف رماها على الارض .. عايز يضربها تاني ... سامر مسكو من يدو و صرخ فيه ... زح يدك منها .... علي ضربو.... عفاف وقفت بينو وبين اولادها و بزعل قالت ليو .... ابعد من اولادي يا علي ....
قال ليها ادبيهم قبل أأدبهم ليك بطريقتي و طلع من البيت غضبان
نغم على الارض بتبكي و سامر حاضنها.... خلاص ماتبكي ... ماعاش البزعلك .... هو قايل روحو منو عشان يضربك .... اذا بابا عمرو مارفع يدو علينا ..... عفاف كوركت فيهم ... اسكت ياولد و يلا انتو الاتنين على غرفكم
دخلت نغم الغرفة و لسا بتبكي .... تلفونها ضرب شافت الشاشة لقت المتصل ابوها دموعها نزلت زيادة و فتحت الخط
مجدي : انغامي كيفك .... امك ليه مابترد على تلفونها .... الو ... نغم ... الو
كانت بتحاول تحبس صوتها ... آهاتها خانتها و ابوها سمع صوت بكاها .... بتكلم معاها بتوتر ... في شنو مالك ... امك و اخوك كويسين ... ردي علي يابت
نغم : احنا كويسين بابا
مجدي : طيب في شنو
نغم : مافي حاجه
مجدي : من متين بتي بتكذب علي .... اتكلمي
و انفجرت بالبكا ... ابوها سامعها و على اعصابو .... بقول ليها ... يابتي ماتخوفيني الحاصل شنو ... مالقت طريقة إلا انها تحكي ليه كل حاجه .... زعل شديد و اتضايق .. اتكلم معاها شويه لحد ما هدأت ... قفل منها الخط و ضرب لامها... معصب و دمو فاير
مجدي : كيف علي يضرب اولادي
عفاف : انت عارف علي صعب شويه
مجدي : صعب على نفسو ما على اولادي ... انا مابرضى زول يضربهم لو مين ما كان
عفاف: خلاص انت اهدا و الموضوع دا مابتكرر
مجدي : لو اتكرر اتأكدي ان تصرفي مابعجبك ولا بعجب اخوك .... دقيقة دا علي زاتو ضارب لي .. يلا سلام
علي ضرب هايج و اصلا مجدي كان في حالة غضب اشتبكو الاتنين والنقاش وصل لنقطة اللاعودة ... عفاف مشت لنغم غرفتها ... لقتها قاعده في طرف السرير بتبكي ... امها بزعل نهرتها .... خلاص ولعتيها و ارتحتي ..
نغم : ماما انا ماعملت حاجه
عفاف : عاجبك كده ابوك و خالك حيتخاصمو
نغم : انا ماغلطت في زول هو الغلط فيني
عفاف : اسكتي .... ما اسمع صوتك لحد هنا وكفايه .... قربت منها و مسكت يدها بقوة
نغم بتتألم قالت ليها ... ماما يدي بتوجعني
عفاف : كلو بسبب الكلام الفاضي بتاعك .... اخر مره اسمعك تغني لا تقولي لي طارق و لا زفت فاهمه
نغم : ماما ...
قاطعتها ... ماما في عينك ... كلمتك اسمع صوتك تاني اقطع لسانك ... عايزة تعملي مشكلة بين الكبار ... نفضتها بقوة على السرير ... و جات عايزة تطلع ..... نغم بتمسح دموعها بصوت مبحوح و قلب مكسور قالت ليها ...عمرك ما اتعاملتي معاي كده و عمرك ماكنتي قاسية معانا و لا موقفك من غناي كان كده ... طول عمرك بتفرحي لما اغني بس كلامك معاي كان اركز في مستقبلي و دراستي لانهم اهم ... و انا دايما بسمع كلامك
عفاف : من اليوم فصاعدا تعاملي معاك كده و تسمعي الكلام غصبا عنك بلا قلة ادب وكلام فاضي
طلعت من الغرفه وقفلت الباب ... نغم غطت وشها وقعدت تبكي زيادة .... شالت التلفون ضربت ليحيى لما فتح الاتصال وسمع صوتها اتخلع ..
يحيى : مالك في شنو
بدات تحكي ليو و هي منهارة....
نغم : انا خلاص ماقادرة استحمل
يحيى : هدي نفسك شوية و روقي بالك الموضوع مامستاهل ... امك يومين و تنسى و الحكاية تنتهي
نغم : و المشكلة الحصلت بين بابا و خالي بسببي
يحيى : المشكلة مابتخصك ... هم كبار و بعرفو يحلو مشاكلهم ....اهم حاجة انتي لا تزعلي ولا تتضايقي .... عايزة موضوع بسيط زي دا يأثر فيك و يحرمنا من بسمتك ... بسرعة امسحي دموعك .. امشي غسلي وشك و نومي ... بكره بجيك الجامعة نطلع و نتكلم ... ظابط
نغم : حاضر ....ماعارفة بدونك اعمل شنو ... شكرا ليك
يحيى : كده انا بزعل منك ...اولا مافي شكرا بين الاصدقاء ... تانيا ماتتخيلي ان زعلك دا حاجة هينه انتي لو زعلتي ليلة .... القمر في الليلة ديك يحصل ليه كسوف ...
لنا لقاء أخر ......
