ربى دموعها سايله على خدودها ... كفاية خلاص حرام عليك .... نغم ربتت على كتفها قالت ليها والله ما عايزة اوجعك لكن الكلام دا ماحتسمعيو الا من البحبك فعلا و انتي غالية علي و بحب ليك الخير دايما ..... جاهم صوت شهد من بعيد قاطع كلامهم ....
شهد بأعلى صوت بتقول .. سمعتو الانا سمعتو يابنات ... الحقوني خلاص بموت ... جاتني جلطة ... زول يرشني بموية ولا اقول ليكم ارموني في البحر عديل عشان اقدر افوق
نغم بتعاين لرؤى و هي جايه ورا شهد ... سالتها
نغم :دي مالها كمان
رؤى : لي ساعة بحاول اوعيها من حالة الهبل المستمر دا
شهد : عيديها تاني .. خليني استوعب الحصل ... صحي طارق سأل مني .... حبيبي طارق سأل عني
نغم : اللهم إنا لانسألك رد القضاء ولكن نسألك اللطف فيه
رؤى : بصراحة كده مابقدر اكمل معاكم ماشه اشوف لي جامعة تانيه يكون ناسها عاقلين
شهد : مش مفروض نمشي النادي ... عايزة اسمع طروقي و هو بغني لي
نغم : انا زاتي عايزة احول جامعة تانية
مشو النادي ... معطرين مسمعهم بموسيقى طارق العذبة .... و الألحان البتخلي الواحد يسافر عبر المجرات .... نغم تلفونها كان بضرب سامي اتصل عليها ... طلعت برا اتكلمت معاه و رجعت .... قعدت جنب ربى الكانت بتعاين ليها بإستغراب
ربى : ممكن اعرف حكايتك شنو يابت ... اتكلمي سريع
نغم : عندي ليكم قنبلة
ربى : فجريها سريع يا لغم
نغم : في واحد عرض علي الزواج
ربى نططت عيونها و شهقت بصوت عالي .... قلتي شنو
نغم : اسكتي ماتفضحينا
رؤى إلتفتت عليهم .... في شنو يابنات
ربى : الواضح ان الموية بتجري من تحتنا و احنا ماعارفين
نغم : وبعدين
رؤى : اتكلمو
ربى : الاخت اتخطبت
رؤى : اي اخت
ربى : لغم
رؤى : قلتي شنو !!!!
نغم : ماوقتو انتي واياها ماتفضحونا
رؤى : و حابه تكلمينا متين ياحلوة .... بعد الولادة
نغم :امشي اجيب المايك من اخوك عشان الجامعة كلها تعرف
ربى : الليلة ترجعي معانا البيت عندك جلسة محاسبة
نغم : حاضر ياستي ... هسي اسكتو
طارق خلص الاغنيه و نزل من المسرح ... قرب منهم و وقف قصاد شهد قال ليها ... تسمحي لي اخد من وقتك خمسة دقايق .... بخجل ردت عليه ... اكيد
رؤى بتعاين ليها وبتضحك ... قالت ليهم شكلها ح تظبط معاها المجنونه دي .... بعد شويه جاتها رسالة على السناب شات ... فتحتها قرتها و اتئفئفت بزهج ... اووف دا شنو كمان
نغم : مالك
رؤى : واحد دمو تقيل مكرهني ... كل ما انزل سناب يتعاور معاي
نغم : اعملي بلوك و ارتاحي
ربى تلفونها ضرب ... ردت على عمار و بتتكلم معاه ... هم ساكتين بعاينو ليها وهي بتتكلم معاه
ربى : حبيبي صوت الموسيقى كان عالي و ماسمعت التلفون .. بعزف شنو ... كنا مع طارق ... اكيد مابتأخر راجعة البيت بعد شوية ... حاضر لما ارجع بكلمك ....
انتهت من المكالمة و عاينت ليهم رؤى قالت ليها ... رجعنا لحركات زمان تاني
ربى: في شنو
نغم : خليها يارؤى ... طالما هي مرتاحة ....
في المسا رجعو البيت ... قعدوها على الكرسي الساخن ... بعدها ضحكو واتونسو ... رؤى قالت ليهم .. اي ياخ انتي اتزوجي و انتي كمان كلمي عمار يجي يخطبك و برضو شهد مع طارق و اطلعو من راسي خلوني ارتاح
نغم : و انتي ما حاسبة نفسك معانا
رؤى : انا ما بعترف بالكلام الفارغ دا
ربى : الحب كلام فارغ ! .... ربنا يشفيك
نغم : هسي خلونا في المهم ... عايزة اعمل لسارة برنامج
ربى : برنامج كيف
نغم : ما عارفة فكرو معاي ... حالتها النفسية تعبانه و احنا لازم نقيف معاها
رؤى : رايكم شنو في رحلة نيلية بالعبارة
ربى : حلو شديد
نغم : و نكلم طارق يرتب لينا البرنامج ...
نغم : نخليها بعد بكرة الجمعة و كلنا مؤجزين .... اتفقو مع طارق وكلموني هسي لازم امشي البيت ماما حتقتلني
(ألحان مغتصبة بقلم شيماء عثمان)لما طلعت و عايزة تدخل البيت ... شافت يحيى واقف جنب عربيتو ... من بعيد اشرت ليه انو يضرب ليها ... و فعلا اول ما وصلت غرفتها اتصل
نغم : ازيك
يحيى : مسيوهات وكده ... وينك يابت
نغم : عارفة روحي مقصرة بس لو تشوفني مضغوطة كيف في الجامعة تعذرني
يحيى : مافي مشكلة .... خباراتك
نغم : عندي موضوع عايزة استشيرك فيو و بما اننا اصدقاء محتاجة رايك بكل شفافية لان بالجد رايك بهمني
يحيى : اتفضلي ياستي
نغم : في واحد عايز يخطبني
يحيى : و و واحد منو
نغم : انت مابتعرفو ... خليني احكي ليك القصة ... و قعدت تحكي ليو الحكاية من البداية ... و هو ساكت بسمع فيها ... لما شعرت ان الاتصال انقطع ... بقت تقول ... الو .. الو .. يحيى انت معاي
يحيى : ايوا معاك
نغم : طيب رايك شنو
يحيى : شوفي دا زواج و حياة كاملة ... عايزك تفكري كويس و تتأكدي من الشخص القدامك ... اعرفيه كويس و ماتتسرعي .... حتى لو قال ليك اجازتو قربت تخلص ممكن عادي ينتظر للاجازة الجاية ماتستعجلي لان الاستعجال في الامور دي ما مستحب
نغم : كلامك صح ... اشكرك يا أعز صديق
يحيى : تصبحي على خير
اليوم التاني عدا في التجهيزات للرحلة ...نغم مشت السوبرماركت تشتري كم حاجة ... لمحت سامر واقف مع شلة اولاد في طرف الشارع .... وقفت بعيد و اتصلت عليه ..
نغم : انا على يسارك يلا تعال نرجع البيت سوا
سامر : امشي انتي .. عايز اقعد مع اصحابي
نغم : الوقت اتأخر و ماما بتقلق عليك
سامر : انا كلمتها انتي مالك
نغم : ياخ عايزاك في موضوع تعال
سامر : اووو علينا خلاص جاي
ركب العربية زعلان و متنرفز ... قفل الباب بقوة و عاين ليها .. في شنو كنت قاعد مع اصحابي يعني لازم تتدخلي
نغم : اول مره اشوف الاولاد ديل
سامر : من المدرسة وماتعرفيهم ... في شنو
نغم : ديل بشربو سجاير !!!
سامر : و انا مالي .. شفتيني شربت معاهم
نغم : انت عندك أزمة وقوفك معاهم بحد ذاته مشكلة على صحتك
سامر : وفري محاضراتك لنفسك انا كبير و مامحتاج نصايح ... اتحركي خلاص
لما وصلو البيت طارق كان طالع من بيتهم ... سلم عليهم لكن سامر دخل بسرعة و مارد السلام ... طارق : الاخ مالو
نغم : عامل زعلان .... كان واقف مع اولاد ماعجبوني
طارق : خليو علي بتفاهم معاو
نغم : ياريت .... المهم كلو حاجه جاهزة عشان بكرة
طارق : كلو جاهز
دخلت البيت .... ضربت ليحيى طلبت منو يكون معاهم في الرحلة و بعد إلحاح شديد وافق ... بعد شوية ضرب ليها سامي ... مساء الورد على الناس القاطعين
نغم : قصدك انا
سامي : يعني انا ... وينك ياشيخة
نغم : مشاغل وكده
سامي : انا قلت البت خلاص نست
نغم : احنا بكرة عندنا رحلة ياريت تشرفنا
سامي : بكرة صعب شديد ... عندي عرس صاحبي في شندي و من الصباح انا والشباب ماشين
نغم : مافي مشكلة خيرها في غيرها
في اليوم التاني حضروا نفسهم عشان يمشو ...مشت لسامر غرفتو ... كان بلعب بتلفونو ... قالت ليو لسا ما جاهز يلا اتاخرنا .... عاين ليها بطرف عينو .. ماماشي معاكم .... قربت منو و ضربتو على راسو ... يعني لسا زعلان
سامر : ماعايز اتكلم معاك
نغم : حبيبي ماكان قصدي احرجك مع اصحابك لكن صحتك اهم حاجة في الدنيا
سامر : انا كبرت و بعرف مصلحتي
نغم : ياخي حقك علينا .... هسي قوم و سيب الدلع
طلعو كلهم ... ضربت كلمتها ان جايه تسوقها لكن سارة رفضت و قالت بتجي براها ... لما وصلو و العدد اكتمل عشان يتحركو ... يحيى واقف مع طارق .. سارة بصوت واطي سالتها ... دا منو
نغم : ولد جيرانا ... بتسالي منو ليه
سارة : ولا حاجة بس كده
ابتسمت و غمزت ليها ... لو في حاجة كلميني بخدمك ... ماشايفه شهد رتبنا ليها امورها كيف
سارة : انتي ماعندك موضوع
ربى كانت بعيده منهم شوية ... واقفه بتتكلم مع عمار بالتلفون و من ملامح وشها ظاهر عليها الزعل ... خلصت المكالمة و جات قعدت معاهم .... رؤى سالتها مالك ؟...
ربى : مافي شي
نغم : اكيد في شي
ربى : عمار عامل زعلان ... قال ما كلمتو من بدري .... طيب انا اعمل شنو امبارح حاولت اكلمو بس كان مع اصحابو مارد علي
نغم : ماعلينا ... هسي خلينا ننبسط
الجو كان مغيم و ظريف .... نسمات النيل الباردة بتلاطف ضحكاتهم و السماء كانت بتمطر فرح ... طارق و فرقتو بدو يعزفو و يغنو .... خلو للرحلة طعم مختلف .... سامر برقص مع كم واحد من اصحابو .... رؤى بتصور بتلفونها .... و ربى ماسكة تلفونها منتظرة رسالة من عمار .... أما نغم وصلتها رسالة من سامي قال ليها اشتقت ليك ..... طارق بغني مشتاق لعيونك حبيبي وبعاين لشهد البتسمع كلماته و عارفة نفسها المقصودة .....سرحانة فيه ..... يحيى واقف بعيد ماشايف في الدنيا غير نغم و سرحان في عيونها ..... لكن سارة عيونها عليه بتسرق النظرات ....
طارق قرب من نغم مد المايك و قال ليها ... دورك جا و محتاجين نفحة حب ...... ابتسمت ... شالت المايك ... غمضت عيونها .... بتستنشق ألحان جيتار طارق .... بدأت كلماتها تراقص النغمات الموسيقية 🎼 مشاعر 🎵تشاور 🎵تودع مسافر 🎵مشاعر تموت و تحي مشاعر 🎵يادي يادي المشاعر يادي ياااااه 🎼 اللي غرب نفسو سافر من ألالام المشاعر و النفسو يعيشها تاني هي هي المشاعر 🎵 و اللي دارا بإبتسامة من عينيه مُر المشاعر🎵و النفسو قصاد حبيبيو يبان عليه حبة مشاعر🎵اللي بفكر يفارق بس لولا المشاعر و اللي سامح حد جارح راضي ذل المشاعر 🎵و اللي يدو في يد حبيبو بس ظش حاسس مشاعر🎵 و اللي راجع بعد لما انتهى وقت المشاعر 🎵ياااه المشاعر اه من المشاعر 🎶
لنا لقاء أخر .......
