في الصباح نغم طلعت من غرفتها لقت امها قاعدة في الهول .... جات تصبح عليها ... عفاف إتجاهلتها و بنبرة حادة قالت ليها.... الفطور جاهز اكلي بسرعة و امشي على الجامعة و بعدين ماتتأخري .... قربت منها سألتها ... ماما في شنو ؟
عفاف : مافي شي امشي يابت .... و دارت وشها الناحية التانية
نغم بصوت مليان شجن و عبرة خانقاها منعت حروفها تطلع بوضوح ... قالت ليها .. بعتذر لو قلت كلمة ضايقتك
عفاف عاينت ليها بطرف عينها و سكتت
نغم : انتي محامية كبيرة و ميزان العدل عندك غير الناس ... لو شايفة حكمك علي منصف انا راضية بحكمك ..... شالت شنطتها و طلعت من البيت خاطرها مكسور
رؤى و ربى كانو جنب العربية منتظرينها و اول ما شافوها سألوها عن الحصل ... اتحركو و بدت تحكي ليهم و دموعها على خدها نازلين ..... اتكلمو معاها جبرو خاطرها بكلمتين
بعد شويه رؤى فتحت تلفونها .... فجأة صرت وشها و بغضب بتتكلم ... اوووف دا زودها شديد و لازم يقيف عن حدو
ربى : بتتكلمي عن منو ؟!!
رؤى : واحد بايخ واقف لي على الوحدة كل ما انزل سناب يعلق بإستهزاء و هسي لقيتو ناطي لي في الانستغرام
ربى : اصلو الزول دا كاتب شنو لما زعلانه كده
رؤى : ادخلي و شوفيو بنفسك
ربى : دقيقة طيب ... تلفوني من امبارح مقفول .... نسيتو مع الجوطة
لما فتحتو لقت كمية رسايل من عمار .... بدت تقرا و تدريجيا ملامح وشها اتغيرت ... نغم سألتها .. خير مالك
ربى: انا بالجد تعبت ... ماممكن عشان التلفون مقفول يعمل كده ... خمسمية رسالة زعلان هايج و كلام ما ليو داعي
رؤى : لي ترضي على نفسك يتكلم معاك كده .... على فكرة انتي مطلعاه فوق راسك
نغم : خليها براحتها .... اتكلمنا معاها كتير لكن اعتقد هي مبسوطة بالوضع دا
ربى: كفاية .... حرام عليكم ..... بحبو و ماعارفة اعمل شنو
نغم : حبيو على راحتك بس ماتخسري كرامتك و نفسك
ربى نزلت راسها وسكتت ..... وصلو الجامعة ... خلصو محاضرات ... سامي اتصل عليها
سامي : انتي عادي عندك تنسي الناس كده و لا المشكلة فيني بس
نغم : العفو .. بالجد كنت مشغولة
سامي : متين تنتهي المشغوليات دي عايز اشوفك
نغم : ماينفع
سامي : ليه
نغم : عندي كم موضوع الايام دي .... انا اسفه
سامي : مامشكلة ... اخدي راحتك اليوم لكن بكره ماعندك عذر لازم اشوفك
نغم : امممممم
سامي : اجازتي قربت تخلص و لسا ما اخدت منك عقاد نافع يابت الناس
نغم : طيب مافي مشكلة
خلصت المكالمة .... شافت يحيى من بعيد جاي ناحيتها ..... استغربت شديد و سألتو بتعمل شنو هنا ؟!!
يحيى : مش وعدتك نتلاقى
نغم : اتخيلتك تتصل .... على العموم احلى مفاجأة
يحيى : انا ميت جوع ... نمشي ناكل حاجة
نغم : جدا
مشو مكان هادي .... اتونسو .... فضفضت ...طلعت كل الفي قلبها .... اتكلم معاها... قال كم نكته طلعتها من المود و رجعت بسمتها تاني ....
نغم : انت الوحيد البتعرف كيف تفرحني
يحيى : لو علي اشيل كلمة زعل من القاموس عشان نهائي ماتزعلي
نغم : يااااه انا اتأخرت لازم ارجع ... رجعني الجامعة اسوق عربيتي
يحيى : طيب .... انا كمان مفروض ارجع الشركة
وصلها الجامعة .... و هي نازلة من العربية صادفت سارة طالعة .... ندهت عليها .... سارة لما شافت يحيى ابتسمت و هو نزل سلم عليها
نغم : بتتذكر سارة صح ؟ ... شفتها كم مرة معاي
يحيى : ايوا ... اهلا وسهلا
سارة : اهلا بيك
يحيى : بتدرسي طب برضو
سارة : ايوا
نغم : اصلا الحلويين بدرسو طب
يحيى : اكيد ... استأذن بعد دا
مشى و عيون سارة متابعاه ... بسمتها مزينة ملامحها و بالها رحل معاه .... نغم انتبهت ليها قعدت تشاغلها .... سارة بتحاول تنكر لكن نظراتها فضحتها
سارة : طالما فتحتي السيرة عايزة اتأكد من حاجة .... أنتي و يحيى اااااا
نغم : اممم طيب انا و هو مجرد اصحاب اولاد جيران اخوان ما اكتر .... اطمني .......... اها ديل ربى و رؤى جايين ... تعالي اوصلك معانا
سارة : مرة تانية ... اصلو اخوي الكبير جاي يوصلني
ركبو العربية .... اتحركو.... رؤى سألتها .... مشيتي وين يابعيدة ؟
نغم : كنت مع يحيى .... على فكرة دخلت صفحتك و شفت الزول المستفز كاتب ليك شنو
رؤى : دخلت طينت عيشتو
نغم : اكيد هو في زول بلحقك في طولة اللسان
ربى بتعاين للناحيه التانية ساكتة و سرحانه .... نغم قالت ليها حتفضلي صارة وشك كتير
ربى : خليني عليك الله ... زهجانة
نغم : ما عاجبني حالك
رؤى : اتشاكلت مع عمار كالعادة
نغم : وين الجديد في الموضوع
ربى : احاول افهمو ماعايز يفهم و لا يسمع .... طوالي شايف نفسو على حق و انا غلط
نغم : اصلا عمار نفس عيينة خالي علي لا حنفهمهم ولا حيفهمونا
لما قربو على البيت لمحت سامر واقف مع نفس الاولاد .... ما عجبها المنظر .... مجموعة مراهقين بملابس المدرسة بدخنو و بتكلمو مع بعض بإلفاظ بذيئة .... وقفت العربية و تعاين من بعيد ... رؤى سألتها ... في شنو؟
نغم : في موضوع زاد عن حدو و لازم يتحسم
ربى : خالتو عفاف لو شافت المنظر دا ما حتكون مبسوطه
نغم : كلمت طارق و حكلمو تاني لازم اتصرف قبل ماما تعرف
وصلو البيت ....(ألحان مغتصبة بقلم شيماء عثمان) دخلت لقت امها في المطبخ .... سلمت عليها ماردت ... الظاهر لسا زعلانه ... نغم فضلت واقفه في النص و بتعاين ليها
عفاف : عندك شنو يابت ... امشي من قداميى
نغم : على الاقل عايزة اعرف غلطتي البتعاقب عليها
عفاف : ابوك زعلان ... خالك قاطعنا .... باقي خيلانك و خالاتك واقفين معاه ... وكلو بسببك عرفتي غلطتك وين
نغم : الحصل كلو ماذنبي
عفاف : ذنبك و بسبب القرف الغنا بتاعك ... مارجعت من الامارات عشان اقاطع اخواني بسببك ... ختي الكلام دا في بالك و اتوجعي كويس
نغم : ماما ماتظلميني ... انا مابستحق كده
بطرف عينها قالت ليها .... اقفلي الموضوع و اطلعي غرفتك سريع
قعدت في الغرفة زهجانه .... بعد شوية جاتها رسالة من أشرف محتواها ... بكرة عندي حفلة في الجامعة يارييت اشوفك ...... شافت الرسالة و رمت التلفون بزهج .... دا وقتك انت كمان
في المسا نغم كانت بتقرا .... سارة ضربت ليها
سارة : نغمة ازيك ... عندي ليك اخبار حلوة
نغم : خير ان شالله
سارة : عملت طلب صداقة في الفيس بوك ل يحيى و قبلو
نغم : اووو احنا اتطورنا شديد
سارة : عايني ... أشرف بكرة عندو حفلة .... كلمي يحيى يجي يحضرها ... بليييز
نغم : لكن ...
سارة : لكن شنو ... فهمتك ... قصدك عشان طارق
نغم : مابقدر ازعلو و انتي عارفة الخلاف بين طارق و اشرف
سارة : هسي انا ما بحضر معاكم حفلاتو .... و اشرف اخوي عديل
نغم : ولايهمك ياستي ... بكلمو عشان خاطر عيونك
سارة : اوعك تقولي لي انا كلمتك
نغم : معقول بس .... خليها علي برتبها
طلعت من الغرفة على صوت جرس الباب ... واقفة في السلم من فوق .... شافت نور ام طارق داخلة نزلت سلمت و دخلت المطبخ تعمل عصير .... سامعة كلامهم من جوا
نور: قلت اطمن عليكم ..... علي امبارح بالغ عديل
عفاف : مابالغ ولا شي .... كلو من نغم ... مليون مره فهمتها ماتغني لكن مابتسمع الكلام
نور : لو قاصدة احنا السبب اعفي لينا
عفاف : لا انتي كمان عقلك مايمشي بعيد
نور : البت ماعندها ذنب ماتحميليها اكتر من طاقتها
عفاف : ذنبها ونص ... ابوها دلعها و انا كنت ساكته ... هسي بدفع التمن
نغم جابت العصير ... بنظرة حزينة عاينت لامها و رجعت تاني غرفتها .... مسكت التلفون لقت سامي مرسل رسالة و قبل ماتفتحها تقراها يحيى اتصل ... ردت عليه
يحيى : مالو صوتك رجع تاني حزين ... قبيل خليتك كويسة
نغم : ماما لسا زعلانه مني
يحيى : مايكون اصطدمتي معاها
نغم : لا بس كلامها بوجعني .... ممكن ما نتكلم في الموضوع دا .... المهم انت عملت شنو في موضوعك من قبيل عايزة اسألك و لخمتني بالكلام
يحيى : ولا شي
نغم : كيف يعني !!!! ماينفع كده
يحيى : اشرح ليك كيف .... كل ما اقرا عن العملية ألقى نسبة نجاحها ضعيف .... ما عايز اتعلق بوهم .. خليني كده عارف مرضي متعايش معاه و راضي بقسمتي
نغم : دا يأس و ضعف مافي حاجة اسمها نسبة نجاح العملية في حاجة اسمها إيمان بقدرة الله ... تفاءل عزيمة و اصرار .... خليها على ربنا و اتوكل ياخ
يحيى : و نعم بالله
نغم : في حاجة تاني ... بكرة تعال الجامعة عندنا حفلة و لازم تحضرها
يحيى : ح تغني ؟!!
نغم: مستحيل تاني اغني ... خلاص بقى محرم علي للأبد ..
لنا لقاء أخر .......
