مر يومين عاديين بين الجامعة و البيت .... دايما في المسا تقعد تتكلم مع يحيى تحكي ليه عن يومها ويحكي ليها عن يومو ... لكن في يوم بعد المحاضرة جا ولد دفعتهم قال لنغم ان دكتور حسن عايزها في مكتبو .... استغربت و طلبت من صحباتها يرافقوها
نغم : الدكتور دا عايز مني شنو
ربى : يمكن عايز يخطبك
نغم : ماتهظري ياخ اعصابي باظت
شهد : احتمال بخصوص الاسايمنت .... شكلك جطتيها
نغم : الله يطمنك ياشيخة .... طيب ادخلو معاي
رؤى : امشي يابت احنا واقفين هنا
نغم : والله حرام عليكم
ربى : خلاص بنجي معاك
لما دخلو كان دكتور حسن قاعد على مكتبو و معاه نفس الشاب الاسمر الطويل اللابس نظارة الطوالي بتصادفو بعربيتها .... بشربو قهوة وبتكلمو اول ما دخلت سكتو و قعدو يعاينو ليهم
د/حسن : كلكم نغم مجدي ؟؟؟!!
اتقدمت خطوة .... نعم يادكتور .... رفع ليها الملف و سألها .. عارفة دا شنو
نغم : الاسايمنت بتاعي
د/حسن : طالما قلتيها بنفسك انو بتاعك لي خليتي زول تاني يعملو ليك
نغم : عملتو بنفسي دكتور
د/ حسن : شوفي ياطالبة انك تغلطي مره ممكن الواحد يعديها لكن تستمري في الغلط دي الحاجة المامسموح بيها ابدا
نغم : عن اي غلط بتتكلم ؟ ممكن توضح كلامك
د/حسن : الدفعة مكونة من 150 طالب و طالبة معظهم اجاباتهم غير صحيحة و قلة منهم كانو قريبين من المطلوب اما اجابتك كانت مثالية لدرجة الاستغراب .... إلتفت للشاب الجنبو قال ليه ولا شنو يادكتور عادل ... رد عليه بإبتسامه باردة و سألها ممكن اعرف مين الدكتور العمل ليك الشغل دا و شغال في أي مستشفى
نغم عاينت لدكتور عادل و إلتفتت على دكتور حسن قالت ليه .... حضرتك سألت سؤال على 150 شخص ف من الطبيعي تتوقع جميع انواع الاجابات ومن الطبيعي تلقى مجموعة اتوصلت للحل السليم .... مافي اسئلة بدون اجوبة في ناس قررت ماتتعب عشان تلقى الحل ... انت دكتور و عارف انت اساس مجالنا هو البحث .... مرض السل مثلا زمان كان مرض قاتل لكن بعد الدراسة و البحث الامر اتغير ... مع احترامي الشديد دكتور اذا كانت دي طريقة التفكير السائدة ما اعتقد ان مهنة الطب حتتطور كتير في البلد دي ..... على العموم ديل صديقاتي و احنا كنا مع بعض في المكتبة ممكن يأكدو ليك اني اشتغلت الاسايمنت بدون اي مساعدة من حد ..... و لو مافي حاجة بطلب اذنك عشان امشي .
كان د / حسن و صاحبو مذهولين بعاينو بصمت.... قال ليها ... ممكن تتفضلي
لما طلعو شهد مسكتها من يدها .... طلعتي ماهينه يابت و لسانك اطول منك
ربى : دي لو زول هبشها طوالي بتنفجر في وشو ... طبعا اخوها مسميها لغم و اكيد ما من فراغ
نغم بطرف عينها ... اتحركو قبل ما انفجر فيكم ما تتخيلو مغيوظه منهم كيف ... جاب صاحبو و عايز يهزءني ... كرهتهم الاتنين
رؤى : براحة على اعصابك ....خلونا نمشي حته هادية نقعد فيها
اثناء ماهم ماشين تلفونها ضرب .... شافت المتصل .... مكتوب في الشاشة اشرف ماردت عليه ... لكنو اتصل عليها كم مره .... في الاخير ردت عليه
نغم : مرحبا
أشرف : يعني الا أصر عشان ترضي تردي
نغم : اخ اشرف .... كلمتك انو ماينفع اشترك معاك في الفرقة ارجوك احترم رغبتي و تانيا ممكن اعرف لقيت رقمي كيف
أشرف : الرقم اسهل حاجة اقدر اجيبها .... هسي انا متصل عشان عايز اشوفك و اتكلم معاك
نغم : ماينفع برضو
أشرف : على فكرة انا شايفك قدامي
بقت تتلفت حولها لقتو قصادها رفع يدو اشر ليها وابتسم ..... جا عليها وقف قدامها
اشرف : يعني الا اعمل ليك كده
نغم : ممكن اعرف في شنو تاني
اشرف : في حاجات كتير لو اديتيني مجال
نغم : عفوا !!
اشرف : متأكد ان طارق عكس ليك صورة ماجميلة عني ....ما عايز الا تخليني اعرفك بنفسي و تعرفيني عليك اكتر
نغم : كفاية جدا البتعرفو عني و ياريت ما تحاول تعرف اكتر .... عن اذنك
بالمسا عفاف معاها نوره ام طارق قاعدين بشربو شاي و يتونسو ... البنات رجعو من الجامعة و كلهم في بيت ناس نغم اخر ونسة وضحك .... بعد شويه جا طارق شايل معاه اكياس كتيره قال ليهم عايزين ليلة زي ليالي ابوظبي .... دخلو المطبخ جهزو العشا و قعدو في الحوش مستمتعين بالبدر اللامع في سماء الخرطوم .... نغم شالت التلفون و ضربت لابوها مكالمة فيديو
نغم : بابا مشتاقين ليك شديد وفاقدينك في القعدة دي انت و عمو تجاني
مجدي : عمك زاتو معاي هسي و ضربنا فول قبل شوية ... اكل عزابة و كده مش زي سفرتكم الرهيبة دي
نطت ربى قالت ليه .... و لا تزعل ياعمو .. كلم بابا يرجعني و انا كل يوم اعمل ليك اكل غير .. رد عليها تجاني ... اشتقت ليك يابت يامفعوصة خلاص في اجازة نص السنة برسل ليك تجي ... سامر قال ليهم و انا كمان ياعمو ينوبك فيني ثواب
مجدي : قعدتكم ناشفة كده ليه
طارق : ولايهمك عمو ....مسك الجيتار بدأ يعزف و قال لنغم اطربينا
بصوتها الرنان أنشدت 🎵حيرت قلبي معاك خليتو بيك مشغول 🎵ياعاطفة في وجدان ياصورة ساكنة العين و يامن بنور محياك أسعدت كل حزين 🎵طاوعت ظنك ليه فرقت بين قلبين و قطعت حبل الود الكان زمان كان موصول 🎵ياحبي ما اقساك حيرت قلبي معاك 🎵
قضو ليلة ولا أروع مع اوتار جيتار طارق الذهبية و صوت نغم العذب ... لحد ما انتصف الليل و دخلو عشان ينومو .... لقت يحيى مرسل ليها رسالة قراتها .... لموسيقاك سحر يضخ بين الأوردة و الشرايين ... يستقر في الوتين .. يأسر القلب العليل . ردت عليه برسالة .... سلامة قلبك صديقي .. قفلت التلفون و نامت .
بعد يومين في الجامعة البنات كانو قاعدين مع بعض بتونسو اما ربى ماسكه تلفونها بترسل و بعد شوية قفلتو بزهج و اتأفئفت ... نغم سألتها في شنو
ربى : نفس القصة .... عمار
نغم رفعت حاجبها عاينت ليها بطرف عينها و سكتت
ربى : ماتبقي علي أنتي كمان
نغم : الانسان بحب عشان يتبسط مش يتسجن
ربى : هو كويس والله لكن ...
نغم : لو كويس مابتقولي لكن !! .... فكري في كلامي كويس
ربى نزلت راسها بحزن و سكتت
شهد قالت ليهم ياخ زهجانين خلونا نمشي شارع النيل نفرق شويه
رؤى : اي والله .... جاني صداع من المحاضرات الكتيرة
نغم : طيب يلا قومو
سارة : انا اعفوني
نغم : انتي بالذات لازم تمشي
سارة : صدقوني ماعندي مزاج
رؤى : عشان مزاجك معكر حتمشي تغيري جو
نغم : اذا ماحابة تتكلمي مافي زول بجبرك لكن اتذكري احنا صحبات و مهمتنا نقيف مع بعض ... وقت ما تكوني مستعدة تشاركينا همك كلنا هنا عشانك اما هسي ماعندك عذر تمشي و الامر اجباري
ابتسمت سارة و قالت ليها تمام ياستي
ركبو العربية و عايزين يتحركو .... رؤى قاعده قدام شغلت اغاني من تلفونها ...نغم بتتشاكل معاها ... ماعايزين نسمع غربي ياخ ... عربيتي و تمشو بقوانيني .... و اثناء نقاشهم من دون ما تشوف فجأة ظهر ليها واحد قدامها قربت تضربو ... اتخلعت و داست الفرامل بسرعة .... وقفت العربية ونزلت منططه عيونها بترجف ... رفعت راسها لقتو دكتور عادل ... هو محتار بعاين ليها ... انتي تاني !!! بعد دا الحكاية بقت مقصودة
نغم : أأأنت جيت ناطي من وين
عادل : ماشي في الشارع زي البشر .. ماكنت مفتكر ان في عملية إغتيال منتظراني
نغم : على فكرة انت البتظهر في وشي دائما و دي مشكلتك مش مشكلتي
عادل : سبحان الله ... عايزة تضربيني و كمان فيها طولة لسان و بدون اعتذار ... لا كده كتير جدا
نغم : اسفين يادكتور .... ممكن ما تتفلسف علي
عادل قعد يضحك و يخبط يدينو في بعض ..... الواحد بقى يشوف حاجات غربية في البلد دي .. كمل طريقو خلاها بتعاين ليه بتعجب .
طلعت مع صحباتها و في المسا لما رجعت البيت صادفت يحيى راجع من الشغل ... سلمت عليه .. قال ليها بضرب ليك عايزك ...ابتسمت وهزت راسها ... دخلت جوا لقت سامر في الهول بتفرج في التلفزيون
سلمت عليه ... سمسم أزيك ... رد عليها بزهج ... اهلا
نغم : ماما وين
سامر : طلعت عندها مشوار مهم
نغم : و انت مالك صاري وشك كده
سامر : ولا حاجة
نغم : أكلت
سامر : ماعايز
نغم : حبيبي في شنو
سامر : زهجان ... انتي اليوم كلو مع صحباتك في الجامعة و ماما بتجهز مكتب المحاماة حقها ... لكن انا ارجع من المدرسة اقعد براي لا عندي اصحاب ولا برامج ولا شي
نغم قربت منو حضنتو و بتلعب بشعرو ..... هو بصارع فيها ... لغم زحي ياخ
نغم : عارفاك زهجان و مشتاق لاصحابك هناك ... بالجد حاسة بالذنب بسببك بس اعمل شنو ... خلاص ليك علي كل نهاية اسبوع نطلع نتفسح و نتونس و اخليك تعمل الفي نفسك كلو ... ماشي
سامر : مرات بتبقي حلوة و ظريفة
ضربتو على راسو .... انا اصلا حلوة وظريفة ... يلا ماشة اغير ملابسي
طلعت غرفتها اخدت شور .... شالت التلفون ضربت ل يحيى
نغم : ازيو
يحيى : لما سمعت صوتك بقيت بخير
نغم : مالك في شنو
يحيى : ماطايق نفسي
نغم : في حاجة جديدة
يحيى : لما تحسي روحك مقيدة و كل الامنيات مستحيلة ... و الاحلام محكوم عليها بالاعدام من قبل ما تتولد اصلا .... لما الدنيا تبقى سجن كبير ... تعملي شنو
نغم : قصدك موضوع مرضك ... صح ؟
يحيى : كرهت حياتي من اول يوم لي في الدنيا و انا عايش على الادوية بقعد في المستشفيات اكتر من قعادي في بيتنا .... نفسي اكون زي اي شاب بعمري ... اعيش بالطريقة البتعجبني
نغم : انت مش في سجن لا انت ساجن نفسك و مشاكلك معاك و خايف تطلع منو ... يحيى انت ماناقص شي غير الارادة ... قاوم ... و حارب على فكرة الادوية مجرد مسكنات لكن العلاج الحقيقي في قوتك الداخلية ... لي تستسلم ببساطة ... اكسر قيودك و اطلع ماتخليها تقيدك اكتر ...سافر اعمل العملية ان شالله بتتحسن و تعيش الحياة زي ما عايز ...اضحك للدنيا تضحك ليك اما انك تبكي حتبكيك اكتر ... من هسي اختار عايز تعيش كيف (ألحان مغتصبة بقلم شيماء عثمان)
يحيى : كلماتك زي ألحانك .... بلسم
نغم غمضت عينها و بتدندن على مسمعو .... 🎵الدنيا حلوة واحلى سنين بنعشها واحنا ياناس عاشقين 🎵ننسى الفاتنا و نعيش حياتنا على الحب متواعدين 🎵كل الاحبة اتنين اتنين متجمعين في الهوى دايبين🎵 على إي تكشر و ليه تفكر دا العمر كلو يومين 🎵 انسى 🎵انسى ال راح على طول على طول🎵ماتسيبش زعلك مره يطول 🎵افرح شوية واضحك شوية كده خلي روحك عالية و هاي 🎵و ياقلبي غني كمان وكمان وصل غناي لكل مكان🎵 .
لنا لقاء أخر .......
