طارق ... بمشي أخطب شهد براي
نور : سجمي دا كلام شنو ياولد
رؤى أتدخلت ... ياماما احنا بنعرف شهد ... بت تتوزن بالدهب و تانيا اهلها عايزين يدمرو ليها حياتها ... طارق بحبها شديد ماتخلينا نقيف في طريق سعادتهم كلمي بابا بأي طريقة
نور : خلوني أشوف ابوكم طيب
نغم قالت لطارق ... ولا يهمك حاسه ان الحكاية حتنتهي على خير و تعيش انت و شهد لاخر العمر مع بعض ... رد عليها بنص إبتسامة و سكت
نغم : خليك متفائل ... يلا ياجماعة الوقت اتأخر راجعة بيتنا
لما دخلت بيتهم صادفت سامر في الحوش قال ليها ... أختي الحلوة حقل ألغامي انا
عاينت ليو بطرف عينها ... عايز شنو
سامر : يعني ما أدلعك الا لمصلحة
نغم : انا بعرفك أكتر من نفسي ... قول بسرعة عايز شنو
سامر : مشوار صغير ... جيبي مفتاح العربية و تعالي
نغم : مشوار الساعة 11 بالليل
سامر : في مطعم خطير لكن ماعندهم ديليفري و اخوك جعان
نغم : ياشيخ
سامر : خمسه دقايق بس
نغم : طيب خليني اغير توب البيت دا
سامر : انتي فاكرة ماشين يخطبوك تعالي كده
دخلت استأذنت امها و طلعو .. قاعدين في العربية منتظرين الطلب يجهز ... انتبهت لسامر بعاين ناحية ولدين بتكلمو و بضحكو و الظاهر الكلام كان عليه ... ركزت فيهم اكتر لقتهم نفس اصحابو الزمان .. قالت ليو ماتشتغل بيهم ... رد عليها ماشي اجيب الطلب اتأخرنا .... سامر نزل و الاولاد اتحركو وقفو قدامو ... بتكلمو بصوت عالي ..
_ مابتخجل حتى لما تجي تاكل اختك تمشي معاك
_ دا لو عايز يتنفس بستأذن من امو
_ اترجل ياخ فضحتنا
_ ناس الشهادة العربية كلهم كده ماتعب روحك
نغم جوا العربية سامعة الكلام و خايفة من ردة فعل سامر ... ماسكة التلفون مترددة تضرب لطارق ولا لا .... سامر اتجاهلهم ...دخل المطعم جاب الحاجات و طلع ... عاين ليهم ببرود وقال .. بالمناسبة انو أكون راجل مايعني أكذب على اهلي ...ولا اخجل من الناس تشوفني مع اختي ... ما بتعقد لما أشاور امي .... الهروب من المدرسة ما رجالة ولا عدم أحترام المعلمين شطارة ... أكون راجل يعني أكون مسؤول من أهل بيتي قبل نفسي ....اما رجالة السجاير و الشيشة حقتكم مابتلزمني .... عاين ليهم من فوق لتحت و مشى ركب العربية .... نغم ساكتة لكن من جوه مبسوطة بأخوها .. ( ألحان مغتصبة بقلم شيماء عثمان)
مرت الايام ...
الامتحانات قربت تخلص ... تجاني ابو طارق وعدو يحل ليو المشكلة ... اما مجدي ابو نغم سافر بغد ما أخد منها وعد تنسى كل حاجة و تركز في مستقبلها ... رؤى كلمت اهلها بماهر و حددو ليهم ميعاد يجو يطلبوها رسمي ... و ربى رجعت اتصالحت مع عمار و الاجواء بينهم هادئة ... اما شهد معلقة بخيط رفيع بين الأمل و اليأس ... واثقة من طارق مابخذلها و خايفة من اهلها يدمرو حياتها قبل ما تبدأها .
في اخر يوم امتحانات ..... نغم طلعت من القاعة مصدعة قالت لصحباتها ... راسي بنفجر عايزة قهوة خلونا نمشي كافية
شهد : لكن انا ماشة مع طارق نختار بدلة التخرج
رؤى : وانا متفقة مع ماهر نتلاقى
نغم إلتفتت على ربى قالت ليها ... مافضل إلا احنا الاتنين
ربى : انا ما كلمت عمار و هو هسي في الشغل تلفونو مقفول
نغم : هو في بلد وانتي في بلد ... تستأذني منو حتى على حاجات بسيطة زي دي !!!
ربى : نغمة عليك الله ماتستلميني ... احنا الايام دي رايقين ما عايزة مشاكل
نغم عاينت ليها بإستغراب ... براحتك شديد ... عن اذنكم ماشة لوحدي و متشكرين
وصلت الكافية ... طلبت قهوة و عندها كتاب بتقرأ فيه .... مندمجة معاه و بتشرب قهوتها ... فجأة شعرت بشخص قعد قصادها على نفس الطربيزة .... رفعت راسها ... شافت د/عادل ..ابتسم قال ليها تسمحي أقعد معاك؟
نغم : انت سمحت لنفسك قبل ما أسمح ليك
عادل : بصراحة لفت نظري الكتاب ... ما اتخيلت في بنات بقرو حاجات عميقة كده
نغم : اممم ... انت من البشوفو البنات مجرد عقول خاوية مابتفكر إلا في الشوبينغ و السيلفي !!!
عادل : لا طبعا ... لكن ما ننكر ان دا تفكير الأغلبية من البنات
نغم : و بالنسبة للأولاد ... شايف انهم مقطعين الثقافة و على قدر كبير من الوعي
عادل : الحكاية ما جندر و لا انحياز ... الواقع كده
نغم : لو قلت انها مشكلة جيل كامل ممكن اتفق معاك لكن كلامك اثبت لي انك متحيز و فعلا عندك مشكلة مع البنات
عادل : يلا دي المشكلة الحقيقية .. الواحد اول مايتناقش مع بت تتطلعو عنصري و معقد
نغم : وانت شايف غير كده
عادل : خلينا ناخد هدنة و نتناقش بعقلانية
نغم : اصلا مافي حرب بينا
عادل : في محاولات أغتيال
عاينت ليو ابتسمت و لفت وشها الناحية التانية
عادل : ظريفة وانتي هادية كده و بتعرفي تبتسمي كمان
نغم : اعتبر دا مدح ولا مشاغلة عشان اقدر ارد عليك
عادل : مدح والله ... لسا الهدنة ما خلصت
عاينت ليو و ضحكو الاتنين ...اتونسو مع بعض واتكلمو في مواضيع عامة كتيرة ... لما جات تمشي قالت ليو على فكرة كنت فاكراك مفتري شايف نفسك و مغرور ... سوري على الصورة الماحلوة دي
عادل : ولا يهمك ..حتى انا كنت بدعي على الزول الجاب ليك رخصة السواقة .. وشايفك شهادة عربية دلوعة ساي
نططت عيونها بتعاين ليو .... صلح نظارتو قال ليها بمناسبة الصور الخطأ دي ممكن أخد رقم تلفونك
نغم : تصدق مافي اي مناسبة
ضحك و قال ليها عارف بس قلت أجرب حظي .... ابتسمت و ادتو الرقم ....مشت ركبت العربية و هو بعاين ليها لحد ما اختفت من قدامو .
بعد اسبوع كان تخريج طارق ... ابوه جا وكلهم فرحانين بيو لكن فرحتو كانت ناقصة ... بالو مشغول على شهد ... امو وخالتو مشو لام شهد رحبت بيهم بس ما أدتهم اي جواب لان الكلمة الاولى والاخيرة عند ابوها .. نور رجعت متفائلة و فرحت ولدها وعدتو ان الامور بتمشي زي ما عايزين .
اهل ماهر خطبو رؤى رسمي ... الرجال اتفقو و حددو العرس بعد ستة شهور ... نور مصدومة من الخبر و مستنكرة لان رؤى لسا ما خلصت قرايتها لكن عفاف اقنعتها انها ماتقيف في نصيب البت .
اما ربى و نغم مع رؤى في غرفتها باركو ليها و بشاغلوها
ربى : عريس السناب شات طلع ماهين و انتي طلعتي فظيعة
نغم : دا اسمو سكت دهراً و نطق كفراً
رؤى : كفراً !!! دا كلام يتقال لعروس ياخ راعو لمشاعري
ربى: و مشاعر البايرات منو يراعيهم
نغم : تعالي ياصحبتي نواسي بعض
ماهر ضرب لرؤى شالت التلفون بتتكلم معاه ... قعدو يشاغلوها و يغنو ... زحت منهم بعيد .. رفعو صوتهم زيادة ...
🎵زغرودته للأتنين شايلين رضى الوالدين 🎵
🎵حلاتهم دابهم كتبو كتابهم في وداعتة الله 🎵
🎵عروسنا يامحلاها زي القمر في سماها بخروها وهنو وقولو ماشاءالله🎵
اهل شهد حددو يوم عشان يجو الرجال يخطبوها ... طارق بلبس الجلابية... امو بتلف ليو العمة و دمعتها في عينها مبسوطة ببكرها الليلة عريس ... شالت المبخر بتحصن ضناها ... هو من السعادة الارض ما سايعاه ... اخواتو جنبو بشاغلوه ... نغم معاهم قالت ليو كان تدينا فرصة نتعلم نزغردت ليك ..ضحك قال ليها عندكم فرصة ليوم العرس و خلي بالك أغنية الزفة عليك
نغم : ولا يهمك ما يزفك لعروسك الا انا
ابوه من برا بناديه ... ياولد استعجل .. باس راس امو وطلع خلاها بتمسح دموعها ..
في بيت ناس شهد اهلها منتظرين اهل العريس ... هي في غرفتها خايفة و متوترة ... طارق في الطريق اتصل عليها .. ساعة و تبقي خطيبتي
شهد : يارب ... لكن قلبي مقبوض
طارق : يابت انتي مجنونه كلمتك حياتك معاي وبس ... بعدين قولي خير شايفانا جين نلعب مع اخوانك كورة
وصلو البيت .. استقبلوهم اهلها و ضيفوهم ... ابو شهد اتكلم ... طبعا زي ما عارفين الزواج دا ما حاجة ساهلة و الواحد من يوم بتو تتولد بحلم يزفها لولد الحلال البسترها ...في قبيلتنا ماعندنا كلام زي دا البت طوالي لولد عمها لكت قلنا مامشكلة اذا جاها ولد قبيلة و راجل بمعنى الكلمة نباركها و يصير خير ... احنا سألنا منكم و دا من حقنا كأسرة مافي زيكم ناس أصل و أولاد بلد لكن يا باشمهندس تجاني عايز اسألك زي ما أنت ابو العريس كمان ابو بنات اعتبر بتي واحدة منهن ... لو بترضى ليها تتزوج فنان ماعندو شغلة غير الغنا والحفلات احنا مابنرضى واسفين ما عندنا بنات للزواج .
لنا لقاء أخر ......
