في الصباح نغم داخلة الجامعة ... شافت أشرف جاي عليها ... وقف قصادها و ابتسم ...
أشرف : ياصباح الورد على الورد
نغم : بعد أذنك ... لكن ما حلو كل شوية القاك في وشي
أشرف : طيب اديني حل ... كيف اقدر اتكلم معاك
نغم : مافي حاجة اصلا نتكلم فيها
اشرف : بكرة عندي حفلة ... و حضورك يشرفني
نغم : اعذرني .... مابقدر
اشرف : لو انتي عايزة .. بتقدري ... اطمني مابطلب منك تغني
نغم : قلت ليك ... لا
اشرف : الظاهر انتي رافضة عشان طارق
نغم : عن اذنك عندي محاضرة
مشت خلتو واقف بعاين ليها و الحيرة في عيونو
بعد خلصو محاضرة ... مشو الاستراحة و كانو قاعدين كلهم مع بعض الا ربى كانت واقفة بعيد بتتكلم بالتلفون ... خلصت مكالمتها و جات قعدت جنب نغم قالت ليها ... عمار جاي السودان بعد يومين
نغم : يصل بالسلامة
ربى : قال جاي يخطبني رسمي
نغم : و انتي رايك شنو
ربى : دي عايزه ليها راي ما انتي عارفة الحب البينا
نغم : يعني متأكدة انك حتكوني سعيدة معاه
ربى : ليه بتقولي كده ؟ عمار كويس ... انتي بس ماخده منو موقف بسبب الحصل زمان
نغم : انا بتهمني سعادتك قبل كل حاجة .... في فرق بين الحب والسيطرة .... فكري فيها كتير
سارة منزله راسها و ساكتة ... ظاهر على ملامح وشها الحزن ... نغم مسكت يدها ... هي من خلعتها نطت .. قالت ليها في شنو يانغم خلعتيني ؟
نغم : الجميل سرحان في شنو
سارة : ولا حاجة زهج بس
نغم همست في اذنها ... مش احنا اتفقنا مافي حاجة في الدنيا تستاهل
سارة : ياستي انسي
نغم رفعت صوتها ... ياجماعة اعملو حسابكم بكرة ترجعو معاي البيت و نقضي كل اليوم مع بعض .. قعدة بنات ولا احلى
شهد : واااو .... ايوه كده
سارة : انا اعفوني
نغم : اصلا البرنامج دا عشانك و مابقبل اي اعذار
شهد : و الموضوع دا فيو اكل ولا نرجع بيوتنا جعانين
نغم : ماعندي ليكم حاجة
رؤى : طول عمرك تعزمينا و نطبخ احنا
نغم : عايزين اعزمكم و اطبخ ليكم كمان .... جنس دلع لكن
شهد : عزومة بإهانة والله
ربى : انتي شفتي حاجة ... و فيها غسيل عده
نغم : و تنظفو غرفتي برضو
شهد : على كده حتدفعي لينا باليومية ولا الشهر
نغم : مجانا وحياتك ... يلا سلام انا اتأخرت
رؤى : على وين مش مفروض نرجع سوا
نغم : ماشة المستشفى ازور يحيى ... ارجعو مع طارق
شهد : انا زاتي راجعة مع طارق
ربى : دي الحسبها معانا منو
نغم ضحكت فيهم و مشت .... اول ما ركبت العربية شافت الجزلان .... اتأفئفت بزهج ... اوووف نسيتك خالص انت كمان ..... فتحتو طلعت الكرت و اتصلت على الرقم المكتوب... رد عليها مرحب
نغم : اهلا ... كابتن سامي احنا اتلاقينا قبل يومين في المول و ساعدتني في هدية اخوي لو بتتذكر
سامي : اكيد متذكر .... ياهلا
نغم : بالصدفة لقينا الجذلان حقك بين الاغراض و فيه كرتك
سامي : ياسلاااام .. ماتتخيلي كنت شايل هم كيف ... البطاقات و كل حاجاتي المهمه فيو ... يعني الاجازة حتضيع بسبب الاجراءات السخيفة دي
نغم : كيف اقدر اوصلها ليك
سامي : حاليا انا عندي شغلة بسيطة ... لو بتنتظريني ساعة اكون شاكر ليك جدا
نغم : تمام ... اصلا عندي مشوار بخلص وبتصل عليك
قفلت الخط .... اتحركت مشت ليحيى ... كان قاعد لوحدو في الغرفة .... دقت الباب و دخلت ... رفع راسو شافها و ابتسم قال ليها .... واخيرا القمرة طلعت
نغم : و بتشاغل كمان
يحيى : اعمل شنو مع الملل دا
نغم : ياخ ابقى كويس بسرعة واطلع ... متعودة اشوفك كل يوم وانا طالعة من البيت و راجعة كده تخلي لينا الحلة مضلمه
يحيى : كلها يومين ارجع و ارجع ليكم الكهرباء في المنطقة
ابتسمت و فتحت شنطتها ... طلعت كتاب ناولتو ليو .... دا كتاب رهيب لازم تقراه حتشكرني لما تخلصو
يحيى : ماعندك مشكلة ... اصلا قاعد زهجان
نغم : هسي لازم امشي عندي مشوار ضروري .... اشوفك على خير
طلعت .... ضربت لسامي ... وصف ليها مكان لما وصلت لقتو كافيه ..... كان وافق جنب المدخل سلمت عليه و اصر عليها جدا ان يعزمها على فنجان قهوة .... و بعد الحاح و محاولات كتيرة منو وافقت ... قعدو اتونسو ... اتعرفو على بعض و الكلمات سلكت طريقها مع انغام الموسيقى الكلاسيكية و رائحة القهوة التركية الفواحه ...
سامي : يعني رجعتو السودان نهائي
نغم : بابا لسا هناك .... مامعروف بعد الجامعة اقعد هنا ولا ارجع
سامي : صدقيني و اخديها كلمة من واحد مشى كل دول العالم تقريبا .... الراحة النفسية البتلقيها في وطنك مستحيل تلقيها في اي بلد تاني
نغم : اكيد ... مهما كان هناك الواحد بفضل غريب و الخوف ملازمو في كل مكان اما هنا الواحد مطمن لانو على ارضو و بين ناسو
سامي : ياريت كل المغتربين يغرسو الكلام دا في قلوب اولادهم .... ماتتخيلي المناظر بشوفها هناك
نغم : ابدا ما محتاجة اتخيل ... عندي اخ صغير يوميا بسمعنا موشحات .... عن اذنك بعد دا لازم امشي
رجعت البيت لقت امها و خالها علي قاعدين في الهول .... سلمت عليهم .....خالها صاري وشو ... نهرها .. يابت تعالي هنا ... استغربت شديد و قالت ليو نغم ياخالو
علي : وين كنتي يابت ... ماشايفه الساعة كم
نغم : بعد الجامعة مشيت المستشفى و ماما عارفة ... و الساعة يداب 6
علي: في بت ناس محترمة ترجع البيت قريب المغرب .... دا كلام فاضي و دي قلة ادب
نغم : لو سمحت خالو انا مابطلع اي مكان الا و استأذن ماما
علي : ماما في عينك بلا لماضة معاك .... ماتفتكري ان عشان ابوك مافي تمشي على كيفك تاني من الجامعة البيت طوالي و الا العربية دي يشيلها منك ... و خلي ابوك يتفاهم معاي
نغم عيونها اتملو دموع .....عفاف قالت ليو .... ياعلي في شنو البت ما غلطت
علي : انتي اسكتي خالص دا دلعكم للاولاد خلاهم كده الولد مدلع والبت غناية
عفاف : اولادي مؤدبين و عمرهم ما عملو غلط ... ابوهم مربيهم على الحرية و واثقين من اخلاقهم
علي : بلا حرية بلا كلام فاضي ... اصلا الغلط منك انتي و مجدي ..... التفت على نغم و بنهره قال ليها... خليني اسمعك بالغلط بس تغني بكسر حنكك مفهوم
نغم دموعها نازلين على خدها .... هزت راسها في سكوت وطلعت غرفتها مكسورة .... جدعت شنطتها على الارض شالت الطرحة من راسها بزهج و رمت نفسها على السرير قعدت تبكي بحرقة و وجع ...
جا سامر دخل الغرفة قفل الباب وراه قرب منها مسك يدها قال ليها ... نغم ماتبكي .... رفعت راسها عاينت ليه و ارتمت في حضنو قعدت تبكي زيادة
سامر : خلاص نغم ماتزعلي ولا تتضايقي ما عاش البزعلك و انا موجود .... اصلا خالك من قبيل جايط مع ماما اول حاجة قال نقفل بيتنا و نجي نسكن معاهم تاني شافني قال لي حلاقتك حلاقة اولاد الشوارع عايزني امشي احلق صلعة اتخيلي و في الاخر ختمها بيك
نغم : بابا عمرو ما اتكلم معانا كده
سامر : تاني لو اتكلم معاك مابسكت ليو
نغم : ما عايزين مشاكل اصلا خالو علي من زمان صعب
سامر : صعب على نفسو ... انا ما برضى في اهل بيتي
نغم : ايوا يا راجلنا ياحمش
سامر : راجل غصب عن عين الكل
نغم : قلت لي مفروض تحلق صلعة
سامر : لغم اسكتي عشان ما انفجر في وشك ......
ضحكت فيو ... طلع من غرفتها بطنطن اصلا الواحد مايعمل فيك معروف ...
في اليوم التاني ... نغم في الجامعة ... جاها اتصال من رقم غريب ... ردت عليه
نغم : اهلا
_ شكلك ماعرفتيني
نغم : منو معاي
_ معقول ماسجلتي رقمي
نغم : لما اعرف انت منو بالاول
_ معاك كابتن سامي
نغم : اهلا كابتن
سامي : ما اكون ضربت ليك في وقت مزعج
نغم : ابدا .... هسي خلصت محاضرات
سامي : قلت اطمن عليك وصلتي كيف امبارح و اكرر شكري
نغم : العفو كابتن ماعملت حاجة
سامي : ممكن نخلي البساط احمدي ونتكلم بدون القاب
نغم : اوك
سامي : طيب عندي طلب بسيط
نغم : اتفضل
سامي : ممكن اشوفك
سكتت و ما عرفت ترد
سامي : انا عارف ان الموضوع ما ظابط لكن صدقيني عجبتني طريقة كلامك و حبيت اتعرف على شخصيتك اكتر و حكون اسعد انسان لو قبلتي عزومتي على فنجان قهوة الليلة
نغم : اولا الليلة صعبة خالص عندي برنامج ... تانيا ياريت لو تعفيني
في اللحظة دي ربى جات ... دا شنو يابت بتتكلمي مع منو
نغم : موضوع عادي بكلمك بعدين
ربى : من متين بقيتي تعملي حاجات من ورانا
نغم : بالجد ما في شي خلينا هسي نمشي زاتو البنات جو
رؤى : اها نتحرك ولا كيف
سارة واقفه بعيد و سرحانه .... نغم التفتت عليها ... الماخد عقلك يتهنا بيو .... سارة ابتسمت نص ابتسامة و ماقالت حاجة .... ركبو العربية مشو بيت ناس نغم ... لما كانو عايزين يدخلو صادفو طارق جنب الباب ... قال ليهم ابدا ما مطمن للاجتماع دا ... اعترفو سريع المخطط الشرير المره دي ضد منو
نغم : ضدك انت بالتأكيد
طارق : ياستي بنات العالم كلهم مايقدرو علي .... المهم البرنامج فيو بروتينات ولا ساندوتشات جبنه حاف
نغم : افا عليك ... انا اجوع ضيوفي .... طبعا لا هم يدخلو المطبخ و يطبخو
ربى : طول عمرك جبانه
نغم : تسلمي لي يارب
رؤى : تطلبي لينا ديلفيري و تدفعي ولا على كيفك
طارق : احسن ليكم اطبخو اتعلمو حاجة قبل ما تفضحونا لما تتزوجو دا لو اتزوجتو من الاساس
نطت شهد ... انا بعرف اطبخ وشاطرة كمان .... كلهم عايزين يضحكو .... حبسو الضحكة
طارق إلتفت عليها و ابتسم ... اطبخي لي انا بس ماتشتغلي بيهم
شهد : حاضر
نغم : بعد دا ندخل ياجماعة الشمس سيحت دماغي
رؤى بصوت واطي .... في حاجات تانية بتسيح
دخلو جوا .... شهد ضربت نغم في يدها ... ماعافيه ليك قطعتي لحظة الحب الخرافية دي
نغم : زول يزح مني الهيمانه دي
(ألحان مغتصبة بقلم شيماء عثمان)قضو الوقت ونسه وضحك و هظار ....انبسطو شديد الا سارة طول الوقت ساكته وسرحانه في عالم تاني بعيد منهم نغم قالت ليها فكيها ياخ اليوم عايزين ننبسط ... رؤى شغلت اغاني و قعدو يرقصو ربى شدت سارة من يدها وفقت في نصهم بتعاين ليهم بتمايلو مع الموسيقى بفرح .... للحظة نست الهموم وقعدت ترقص معاهم .... رؤى التفتت على نغم قالت ليها .. الليلة دي محتاجة انغامك
ابتسمت نغم و باحلى صوت اطلقت الالحان🎼
اجدع صحاب صحابي من صغري🎵 دول البمشو معاي دغري 🎵دول اغلى ناس هم الاساس و اقول لكم ايه 🎵قضينا اجمل وقت في حياتنا بلمتنا دايبين في بعض بحكايتنا بفرحتنا بلمتنا نروح ليه🎵 انا كل ما عمري يعدي و نقابل بعضنا بحس كأني انا عندي يجي 16 سنة 🎶
لنا لقاء أخر ......
