شهد : طارق انا هربت من البيت و مستعده امشي معاك اي مكان بس نكون مع بعض
طارق : انتي مجنونة ... دا شنو التخريف دا
شهد : يعني انت ما عايزني
طارق : عايزك لكن ما كده ... هسي ادخلي البيت نتفاهم
لما دخلو البيت ... امو شافتهم اتخلعت و قعدت تكورك
نور : سجمي ... يااولاد عملتو شنو
طارق : ماحاجة ياامي .... نادي رؤى تسوق شهد غرفتهم
شهد بتعاين ليو مصدومة و هو بتحاشى نظراتها ..... رؤى و شهد طلعو الغرفة . ... نور مسكت طارق من يدو قالت ليو ياولدي ماتعمل حاجة غلط احنا ماربيناك كده
طارق : ماتخافي ياحجة
نور : البت لازم ترجع لأهلها هسي
طارق : برجعها لكن الوقت متأخر خلي الصباح يطلع
نور : قلبي مقبوض من الحكاية دي و اهلها ما بسكتو
طارق : ماتشيلي هم
نور : كيف ما اشيل هم ... ربنا يستر
شهد قاعدة مع البنات في غرفتهم .... منزلة راسها و بتبكي بأنين ... ربى قالت ليها خلاص يابت الناس قطعتي قلبي
رؤى : عمر الدموع ما حلت مشكلة ... البتعمليو دا غلط
شهد : اعمل شنو طيب ... انا جيت عشان نفضل مع بعض و لا حرك ساكن .. قلبي يقول لي ارجع بيتنا هسي
رؤى : انتي مجنونة رسمي والله
قعدو الليل كلو يهدوها و يطيبو خاطرها لحد ما الشمس اشرقت و هم صاحين معاها .... (ألحان مغتصبة بقلم شيماء عثمان)
في الصباح جاتها ربى قالت ليها ... شهد البسي طارق منتظرك تحت ... نزلو سوا ... نور قاعدة في الكنبة بتعاين و ساكتة ....
طارق : يلا مفروض نمشي
شهد : وين
طارق : ارجعك بيتكم
نططت عيونها مصدومة من تصرفاته .... بزعل قالت ليو ... ما تتعب روحك بمشي براي
طارق نهرها .. امشي قدامي بدون ولا كلمة
شهد : حاضر
طلعت وركبت العربية ... صارة وشها و بتعاين للجهه التانية ... طارق ساكت بعاين ليها ...قال ليها في شنو ياشهد
شهد : ما عارفة ... اسأل نفسك
طارق : حبيبتي
قاطعتو ... لو حبيبتك مابتفرط فيني
طارق : منو قال ليك فرطت فيك
شهد : اتحديت الدنيا جيت لحد عندك و رجعتني
طارق : يابت الناس أنا عايزك و ما اتمنيت حاجة في الدنيا دي كلها غيرك ... لكن عايزك بالطريقة الصح مش عشان بحبك تكسري ظهر ابوك .... اتزوجك ايوا لكن برضى اهلك مش غصب عنهم
شهد : طيب حتعمل شنو عشان ترضيهم تسيب الغنا و تخلي الفرقة
طارق : انا لو بعمل حاجة غلط اكيد من حقهم برفضوني لكن غناي ماعيب و لا حاجة بتمس اخلاقي عشان كده مابتنازل عن مباديء
شهد: لكن كده بتتنازل عني
طارق : انتو الاتنين في كفة واحدة و انتو الاتنين ما بتخلى عنكم ....خليك واثقة فيني
عاينت ليو و سكتت ... حرك العربية و وصلو بيتهم ... قال ليها انزلي .... بخوف ردت عليه ... ماقادرة
طارق : انزلي و انا معاك
مسحت دموعها... فتحت اختها الصغيرة ... اول ما شافتها قعدت تكورك ... شهد جات ... يا ابوي شهد جات ... في لمح البصر اهل البيت كلهم اتجمهرو جنب الباب ... ابوها صرخ فيها بغضب كنتي وين ؟
وهي ساكتة منزلة راسها و بتبكي ... طارق واقف وراها عايز يتكلم مع ابو شهد .... ولد عمها منصور مسكها من يدها جراها دخلها البيت واداها كف نهرها .. كنتي وين ياقليلة الادب ... رفع يدو عايز يديها كف تاني طارق مسك يدو لواها ليو و زحاه منها فضل واقف بينهم و هي ورا ظهرو محتميه بيو
منصور و عيونو تطلع شرار بقى يكورك ... انت اطلع برا قبل ما اقتلك و انتي الليلة بدفنك
طارق : ماتخت يدك عليها و كلامك يكون معاي
منصور : منو انت اصلا ... انا ولد عمها و حتكوم مرتي
طارق : حتى لو بقت زوجتك ما عندك حق تمد يدك عليها .. فاهم
منصور : لا والله ... شوفو كمية البجاحة دي ...انت الدخلك منو ... اطلع برا سريع
منصور مسك طارق من كتفو لزاه و عايز يمشي لشهد البتبكي و ترجف من الخوف .... طارق مسكو من يدو بزعل قال ليو ... قلت ليك ماتلمسها
ابو شهد بنهره ... يامنصور امرق برا البيت دا بسرعة
منصور : قلت شنو ياعمي
ابو شهد : سمعتني ... اطلع برا
منصور : عاجبك البحصل في بيتك ...بناتك يبيتو برا وما عارف هن وين و لا مع منو
ابو شهد : بناتي بعرف ليهن مربيات احسن تربية ... عمري مامديت يدي على وحدة فيهن
منصور : عشان كده شهد طلعت كده .. اصبر لما اجيبها بيتي و شوف اربيها كيف
ابو شهد : منو قال ليك بتي ناقصة تربية و منو قال بعرسها ليك اصلا ... اعتبر الموضوع دا انتهى وماعندي بنات للزواج
منصور : دا كلام شنو يا عمي
ابو شهد : السمعتو ... لو ماعجبك امشي البحي
منصور : طالما عاجبك الكلام الفاضي البحصل في بيتك دا ... لما الفاس تقع في الراس ماتجي تقول الحقو بنات عمكم .... إلتفتت لطارق حمر ليو و طلع
ابو شهد رفع صوتو .... يافاطمة سوقي بناتك و ادخلي ... الام مسكت شهد من يدها و دخلو .... هو عاين لطارق قال ليو ماقصرت ياولدي ... و شكلك مستعجل اتفضل عشان ماتتأخر على اشغالك
طارق : تسلم يدك ياعمي على تربية بت تتوزن بالدهب ... اخلاقها مضرب مثل لا في زي ادبها ولا زي احترامها
ابو شهد : طالما عارف كده بتغلط ليه
طارق : العفو ياعم ... كل مافي الامر ان شهد كانت متضايقة شوية و جات للبنات تتونس معاهم ولما اتأخر الوقت طلبت منها تقعد لانو ماظريفة الجيران يشوفوها راجعة في وقت متأخر
ابو شهد : مامشكلة لكن الاصول بتقول بنات الناس مابيبيتو في بيت راجل غريب
طارق : ياعم بنتك أختي لحد ماتبقى في بيتي بالحلال .... كده اتربينا
ابو شهد : ونعم التربية
طارق : لو ما مطلوب مني حاجة استأذن
ابوشهد : حاجة واحدة بس ... كلم أهلك و شوف يوم عشان نعلن الخطوبة
طارق بعاين في دهشة ... ماقادر يرد عليه ولا قادر يستوعب الكلام البسمعو
ابو شهد قال ليو ...اعتقد انك قبل فترة خطبتها و منتظر الرد ولا غيرت رايك
طارق : أأأ لا لا ... أكيد ... بكلم ناس البيت و في اقرب فرصة نجيكم
بتكلم و هو من الفرحة طاير في السما ... قرب منو باس راسو ... ابو شهد ربت على كتفو قال ليو ..كنت عايز لبنتي راجل والليلة أثبت لي اني كنت غلطان في حقك .. اعفي لي ياولدي
طارق: العفو يا ابوي ...حقك تقول العايزو و واجبي السمع والطاعة .... هسي عن أذنك
لما جا يطلع ابو شهد نده عليه .... على فكرة شهد قبل ماتطلع كتبت رسالة انها هربت ليك
طارق سكت ماقدر يقول حاجة .... طلع من البيت شايل فرحو على كف الأمل ... رفعو للسماء يلمع مع النجوم .... بالتفاءل كسر جبال المستحيل ... بالعزم هزم شبح اليأس وَصَّل حلمه لبر الأمان على امواج الطموح .. غَرَّق كل الآلآم و الجروح ..... وأخيراً وقف برأس مرفوع مسلح بالحب على ارض المنى .
خلصت الاجازة ... ورجعو الجامعة ... طارق خطب شهد واتفقو العرس يكون بعد مايستلم شغلو في الأمارات و يرتب امورو ... رؤى بتجهز لزواجها من ماهر .... و ربى مع عمار كالعادة يوم في الطالع و يوم في النازل اصلا الحياة بينهم كده .... أما نغم كلمت صحباتها ب عادل و انها بتتكلم معاه ..اتلاقو كم مره و دايما اللقيا بتترك أثر ..... لكن قطار الحياة محطاتو كتيرة ... للقاء محطة و للوداع محطات ..
و عادل لازم يرجع لندن خلال أيام .
نغم وصلت الجامعة نزلت من العربية و عايزه تدخل .... ظهرت ليها سارة في وشها ... من ملامحمشها ظاهر انها ناوية على مشكلة .... حاولت نغم تتحاشاها و تكمل طريقها لكن سارة وقفت قدامها قالت ليها ... ياترى ضميرك مرتاح ؟ بتقدري تنومي بالليل بدون كوابيس ؟
سكتت ماردت عليها ...مشت منها خطوتين ...سارة رفعت صوتها ... اكيد مابفرق معاك ... الناس الزيك مجردين من الاحساس .... انتي شبح بخطف ارواح البشر عايشة عشان تنشري الشر و بتستمتعي بالدمار
نغم وقفت ... اخدت نفس عميق و دارت وشها ناحيتها وقفت قصادها وبنظرات حادة قالت ليها ... انتي مشكلتك شنو
سارة : و بتدعي البراءة كمان
نغم : عيشي في الوهم بتاعك و خليك على يقين اني مذنبة و الحصل كلو كان خطأ مقصود ... لا لا مؤامرة مدبرة ... و عن ضميري ميت و لا عندي ادنى ذرة احساس بالذنب .....خلاص مبسوطة كده؟؟؟
انا تعبت من التبرير وانتي ما عايزة تسمعي إلا اصوات الغضب .... و انا متأكدة انك عارفة الحصل قضاء و قدر و لا في يوم اتمنيت الامور تصل بينا للمراحل دي ... سارة انتي كنتي بمثابة اخت بالنسبة لي و ربنا يعلم اني لحد اللحظة دي بعتبرك اختي
سارة فجأة ملامح وشها اتغيرت .... بقت تكورك فيها .. بتعرفي شنو عن الاخوة ... انا فقدت اخواني بسببك ياحقيرة اوعك تجيبي سيرة الاخوان
نغم عاينت ليها و سكتت.... عايزة تمشي سارة جرتها من طرحتها بقوة كشفت شعرها ... بقت مخلوعة و عايزة ترفع الطرحة سارة ضربتها رمتها على الارض ... فضلت تضربها برجلها و نغم تحاول تخلص نفسها لحد ما جا زول من وراها بعدها منها .....نغم رفعت راسها لقت عادل بكورك في سارة ... ابعدي منها .
قامت من الارض بتنفض التراب من ملابسها ...عادل بسألها انتي كويسة؟ انجرحتي ؟ في حاجة بتوجعك ؟ ....هزت راسها في صمت و بتمسح دموعها من وشها
سارة الغضب متملكها .... عاينت ليها ... منو دا كمان ؟؟ ضحية جديدة ؟ .... برافو عليك نهائي مابتضيعي زمن
عادل إلتفت عليها معصب ... بقدم فيك شكوى و مابرحمك .... كيف تتجرأي و تمدي يدك عليها تضربيها بالطريقة الوحشية دي
سارة ضحكت بسخرية .... قالت ليو ... مبروك عليك الظاهر خلاص وقعت في شباك الشيطان .
لنا لقاء أخر ......
