عادل بتكلم مع نغم ... انتي بخير .. بتمسح دموعها ردت عليه ... انا كويسة خليني امشي
عادل : تمشي وين مابخليك
نغم : ارجوك
عادل : خلينا نمشي مكان تهدي اعصابك شويه
نغم : لكن
قاطعها ... بدون لكن ... تعالي قلت ليك
مشت معاه قعدو جنب النيل .... كانت ساكتة منزلة راسها بتعاين للأرض و هو خاتي يدو في دقنو بعاين ليها ...
عادل : انتي كويسة
نغم : الموضوع مامستاهل
عادل : طالما مامستاهل متضايقة ليه
نغم : عادي ما تاخد في بالك
عادل : المهم انتي ماتاخدي في بالك
نغم : في حاجات مابتروح من البال
عادل : و في حاجات نعديها عشان الحياة تمشي ... كلنا عندنا لحظات مؤلمة من الماضي مابتختفي ... اتعلمي التجاوز عشان ترتاحي
نغم : مرات الامر مابكون في يدك ....مرات التجاوز بكون ما متاح ...عارف احساس تكون في متاهه كل ماتفتكر انك خلاص طلعت تلقى نفسك في متاهه اصعب ... الممرات ضيقة تخنق الهوا و يتعدم ... و الجدران عايزة تنطبق عليك ... حاسة انو عمري ما اطلع من المتاهه دي
عادل : لي النظرة السوداوية دي ... هو شنو الحصل ...اي ذنب يخليك تحسي كده ؟؟!
نغم : ذنبي كان صوت ألحاني .... و من دون ماتشعر قعدت تحكي ليو حكايتها ... مشكلتها مع سارة ..وفاة أشرف و كل حاجة
كان بسمع كلامها بنظرات مليانة حنان لما خلصت قالت ليو .... لا عارفة روحي غلطانة و لا لا بس عارفة ان الشعور بالذنب قاسي
عادل رجع على الكرسي اتسند عليه .... صلح نظارتو وابتسم قال ليها .... ماقلتي لي انك بتغني
نغم نططت عيونها مخلوعة ... دي الكلمة الوحيدة الفهمتها من كلامي كلو
عادل : انتي عارفة ان الحياة اقدار ... واحنا البشر بنعيش اقدارنا المسطرة مستحيل نقدر نغيرها... الحصل انتهى خلاص انسيه ... اطوي الصفحة و كملي .... ركزي في المستقبل مش الماضي .. اما عن سارة انتي مامسؤولة عن مشاعرها بتفهم لما تقرر تفتح قلبها و تفهم ..... فهمتي
نغم : حاضر
عادل : هسي خلينا في المهم ... عايز أسمع صوتك
نغم : قلت شنو ؟
عادل : مالك .. ما حافظة ؟!
نغم : لا ... لكن هنا ... والناس
عادل : قلت ليك عايز اسمع صوتك ... استوعبتي ولا لسا
نغم مستغربة بتعاين فيه ...قال ليها ايوا انا مجنون و كل حاجة .... يلا منتظرك
دارت وشها ناحية النيل ... أخدت نفس عميق ... اتنفست نسايم البحر ... غمضت عيونها سمحت لأنغامها تبحر تعانق الكلمات ...و بعذوبة أطلقت عنان الألحان 🎼
🎵و قلبي مالو اليوم من جسمي فرَّ وراح 🎵
🎵و دمت يامحبوبي و دامت الأفراح🎵
🎵حين ما رأينا جمالك في عجم و فصاح 🎵 يا الشلت عقلي الشارد بغرامك صح 🎵
لفت ناحيتو لقتو سرحان .... عيونو فيها كلام كتير .... طلع النظارة .... قال ليها بحبك .
نغم الصدمة أصابتها بشلل ... ردت عليه بلعثمة ... ش ش شنو
عادل : تتزوجيني
نغم : أ أ أنا ...
عادل : بعشقك يا أنغام القلب ... من أول لحظة شفتك فيها ... صحيح كنتي عايزة تصدميني بالعربية لكن اقسم بالله كنت متأكد انها الحادثة الحتغير حياتي و كنت عارف ان الايام حتجمعنا ... طيفك بحوم في الحلم كل ليلة و كل يوم اشوف خيالك بين البشر لحد ما الصدفة تاني جمعتنا .... كفاية لحد كده صدف ... عايز نكمل الطريق سوا .... تقبلي تكملي معاي يا ألحان الروح
نغم نظراتها مشتتة .. بترتعش ... افكارها مبعثرة ... و حروفها مقطعة .... ل ل لكن أأأ نا ... أأنت
عادل : الحيرة في شنو
نغم : لخبطت افكاري بكلامك
عادل : الله يسامحني
نغم : لا ماكده
عادل : طيب شنو
نغم : ما أظن اني مستعدة
عادل : اديني مجال و استعدي على راحتك ... قرارك شنو
نغم : في شنو ؟
عادل : اني بحبك و عايز اتزوجك
نغم : طيب
عادل : طيب كيف يعني ؟
قالت ليو بخجل ... موافقة .... رفع صوتو ... والله بحبك
نغم بتتلفت ... الناس بعاينو لينا
عادل : خليهم يعاينو...انتي خلاص حتبقي المدام .....اعملي حسابك بكلم ابوك في اليومين ديل
نغم : تكلم بابا !
عادل : و انا بلعب معاك ... كلامي واضح يابت الناس .. اي حاجة تكون بعلم اهلنا و موافقتهم
نغم : لكن انت مسافر
عادل : خلي المواضيع علي ... برتبها
نغم : طيب ... هسي مفروض ارجع الجامعة
عادل : حاضر ياست البنات
لما رجعت صحباتها شافوها واقفة مع عادل بتودعو .... ندهو عليها .... رؤى بتعاين من فوق لتحت قالت ليها ..في حاجات بتحصل من ورانا
نغم : في شنو
ربى: اعترفي يابت
نغم : اعترف بشنو
شهد : ياجماعة خلوها يمكن سر
رؤى : احنا مابينا اسرار
نغم : لو صبرتو بتعرفو
ربى : في شنو يابت
نغم : في بطاقة دعوة تصلكم قريب ....عادل خطبني
كلهم بصوت واحد شنو ؟؟؟!!!
نغم : ليه متفاجئين ..انتو عارفين احنا بنتكلم مع بعض
رؤى : امسكو لي البت دي قبل اقتلها ليكم ... مش اتفقنا تكلمينا أول بأول
ربى: قدامي على العربية ... تحكي لينا الحصل و بالتفصيل الممل
شهد : ايوا ... اهم حاجة التفاصيل المملة (ألحان مغتصبة بقلم شيماء عثمان)
لما رجعت البيت .... في المسا كانت بتدرس في غرفتها ...امها دخلت و قعدت جنبها على السرير صارة وشها بتعاين ليها ...
نغم : مالو العسل زعلان
عفاف : انا منو يابت
نغم : انتي احلى أم في الدنيا
عفاف : اقعدي عديل و اتكلمي معاي كويس
نغم : ماما في شنو خوفتيني
عفاف : اسألي نفسك .... منو دكتور عادل دا الأمو اتصلت علي
نغم نطت من مكانها ... أمو اتصلت !!
عفاف : يعني ما عارفة .....دا منو يابت و بتعرفيو من وين
نغم : ياماما انتي شفتيو ... الدكتور الكان عالج سامر اخر مره .. و لما تعبت تتذكري
عفاف : اممم الطويل ابو نظارات داك
نغم : ايوا ... لكن امو اتصلت ليه
عفاف : يعني ماعارفة ؟؟ .... قالت جاية مع ولدها بكرة
نغم : ليه بكرة؟
عفاف : مالك ياختي مافاضية
نغم : لا ماكده
عفاف : المهم جهزي روحك نشوف دكتور الغفلة دا عامل كيف ..
قامت من جنبها عايزة تطلع من الغرفة و لما وصلت جنب الباب قالت ليها ...هسي اولاد السودان كملو لما تجيبي ليك واحد عموش بنظارة .... نغم مخلوعة من امها بخجل قالت ليها .. هو طيب و ظريف ياماما
عفاف : ظريفة انا يختي .....
مشت خلتها تتبسم براها ... شالت التلفون ضربت ليو
عادل : نغم حياتي
نغم : ليه ماقلت لي ان امك اتصلت على امي
عادل : و انا قبيل كنت بهظر معاك ... المهم بكرة حتعملي لي كيكة ولا بسبوسة
نغم : ولا حاجة ... بنجيب جاهز
عادل : الله يخرب بيت الديليفري ... شوفي انا بكرة لابس جلابية .. تتكبكبي تدفقي العصير فيها بخليك تغسليها بيدك
نغم : خلاص جيب معاك صابون
عادل : الظاهر اني وقعت الله يكون في العون .... قعدو الاتنين يضحكو
عفاف كلمت راجلها بالعريس و اتصلت لأخوها علي كلمتو في البداية رفض قالت ليو انت اخونا الكبير و في مقام ابونا .. نغم بنتك مهما حصل و مهما عملت تفضل بنتك .. محتاجة توجيهاتك ... بكرة جايها عريس ولو ما انت شفتو و وافقت عليه العرس مابتم .
خجل من كلام اختو و قال ليها خلاص بكون معاكم
في اليوم التاني بالمسا عادل و امو وصلو بيت ناس نغم ... كان في استقبالهم امها خالها اخوها وناس طارق كلهم .... نغم في الغرفة متوترة وصحباتها معاها بشاغلوها .... نزلت تسلم على الضيوف ... ام عادل اول ما شافتها حضنتها قالت ليها من ما عادل كلمني وانا قلبي على يدي لاني بعرف ولدي أروش وما عندو زوق لكن الصلاة على النبي اختار عروس قمر 14بس جمال و حسب و نسب ربنا يسعدكم و يوفقكم يا اولادي
نغم من الخجل و من نظرات عادل ماقدرت تقعد ... طوالي رجعت غرفتها ... تمت الليلة على حلم جديد يلوح في الأفق .
جا اليوم التاني و عادل مفروض يسافر .... وعدها في البيت وصاها على نفسها و مشى المطار . بعد 7ساعات ابوها اتصل عليها
نغم : بابا حبيبي ... مشتاقة ليك
مجدي : و انا مشتاق ليك
نغم : تعال لينا عايزين نشوفك
مجدي : تشوفيني ولا تشوفي المعاي
نغم : قصدك عمو تجاني هو مشتاقين ليو
مجدي : لا لا دا واحد تالت قاعد معانا و اتغدينا مع بعض كمان .... داير يسلم عليك
سمعت صوت عادل اندهشت ... عادل انت مع بابا ؟!
عادل : غيرت الحجز و عملت ترانزيت ابوظبي عشان اقابل الوالد
نغم : ليه ماقلت لي ... برضو يومتا ماكلمتني انكم جايين البيت كده تتصرف من راسك
عادل : اسمعي هنا مش اخدت موافقتك تاني ماتسأليني عن حاجة بعدين دا كلام رجال ابعدي بعيد المهم ...انا والوالد اتفقنا الزواج لما تتخرجي ف شدي حيلك يامدام و ركزي في مستقبلنا ... ضحكت في خجل قالت ليو حاضر.
قفلت الخط ... مشت فتحت الشباك عينها على شباك غرفة يحيى مظلمة ... ختت يدها على صدرها و اتنهدت تنهيده ألم ... قالت لنفسها ... اشتقت ليك ياصديق العمر ... غيبتك طالت و فراقك لسا بوجع .. عايزاك تفرح معاي .... فرحتي بدونك ناقصة مكسورة .
لنا لقاء أخر .....
