نغم رجعت البيت متضايقة بسبب مشكلة شهد و طارق الماكانت في الحسبان ... لما جات تفتح الباب سمعت صوتو بتكلم مع امها ... شهقت .. فتحت الباب بسرعة و دخلت بتكورك زي المجنونة .. بابااااا .. نطت فيو حضنتو
مجدي : نغم الحياة ... روح قلب ابوها مشتاق ليك
نغم : حياتي انت يابابا مشتاقة ليك موت
مجدي : المشتاق بتصل يامستهبلة
نغم : عارفة روحي مقصرة .. سامحني
سامر جا نازل من غرفتو قال ليهم ... انا برضو مابتصل اكيد مشتاق لي
مجدي : تصدق لا
سامر: كلمة زي دي يمكن تجرح مشاعري وتتسبب لي بألم فظيع يؤدي إلى حالة إكتئاب حاد و لو ناس حقوق الطفل عرفو الكلام دا موقفك حيكون صعب يابشمهندس
مجدي : هي حكاية حقوق الانسان لسا ماسكة مع الولد دا
نغم : الموضوع اتأزم يابابا و وصل مراحل متأخرة
مجدي : الله يستر مايرفع علينا قضية .... وقعدو يضحكو
سامر : اضحكو كويس بكرة تقولو ياحليل سمور
عفاف : ماشي وين كمان
سامر : لأسرة تكون تقدر معنى أخر العنقود
قامت نغم باستو في خدو قالت ليو ... انت عارف حياتنا من غيرك سودا بس كمان لازم نشاغلك
سامر : حنكك مابمشي علي ... يدك على 200جنية
نغم : داك ابوك خلاص المغتربين وصلو
مجدي : هسي اسمي بقى المغتربين ... اولادك الاتنين ماهينين ياعفاف
قعدو يضحكو ... كملو سهرتكم ونسه وضحك و حكايات مابتخلص .... مجدي عاين لنغم قال ليها نفسي أسمع صوتك ... أشتقت ليو ... للحظة شعرت بغصة في قلبها ... نزلت راسها وبصوت مشبع ألم 🎼
🎵يا صحو الذكرى المنسية 🎵من بعدك وين الحنية🎵
🎵بتعدي مواسم و تروح 🎵والفرقة بتصبح أبديه 🎵
نزلت من عينها دمعة ... مسحتها بسرعة و طلعت غرفتها ... ابوها عاين لأمها قالت ليو ... خليها بتروق بعد شوية
نغم دخلت الغرفة ... قعدت على السرير .. ختت يدها على قلبها تحبس الوجع .. عيونها غرقانة دموع ... قامت فتحت الشباك و بتعاين ناحية شباك غرفتو و بتبكي قالت لنفسها ...لو اقدر اشوفك تاني ... لو تاني أقدر اسمع صوتك و اتكلم معاك ... لو الزمن يرجع لحظة عندي كلام كتير عايزة اقولو ... اشتقت ليك ياصديق ... حتى الشوق إشتاق ليك .
فقلت الشباك و نامت . ( ألحان مغتصبة بقلم شيماء عثمان)
في الصباح لما مشت الجامعة نزلت من العربية فتحت الشنطة و بتفتش التلفون منزلة راسها مانتبهه للشارع ... و هي ماشه خبطت زول ... رفعت راسها لقت سارة في وشها ... صرخت في وشها بصوت عالي ... انتي هيي فتحي عينيك ... نغم ردت عليها أسفه ماكنت مركزة ... جات عايزة تمشي سارة جرتها من يدها اصلا انتي مامحتاجة تركزي تخربي حياة الناس و تمشي عادي
نغم : اعتذرت ليك بدال المرة الف ... وفهمتك ان الحصل قضاء وقدر لكن الظاهر الحكاية عاجباك و عايزة تتسلي
سارة : الحكاية منك انتي والمشكلة بسببك
نغم: ما اتسببت بأي مشكلة وانتي عارفة
سارة : اكيد عارفة ...شفتي الموت بسأل الناس بتبكو ليه
نغم : عفوا !!
سارة : يالعنة الموت ياغراب الشؤم ... وين ما تمشي لعنتك تصيب .. قتلتي أشرف و بعدو شلتي روح يحيى ... حتفضلي تشيلي ارواح كل الحولك لحد ماتلقي نفسك لوحدك
نغم صرخت فيها أسكتي
سارة : مابتقدري تسكتيني انا صوت خطيئتك بفضل طوالي ملازماك
سارة مشت خلتها واقفة في نص الشارع مصدومة بتفكر في كلام سارة .... في عربية وراها بتضرب بوري ...سامعة صوت بناديها ... ياأخت ابعدي من الطريق ...... نغم لسا واقفة الزول نزل من عربيتو وقف قدامها ...قال ليها ... لو عايزة تنتحري شوفي ليك مكان تاني ... نغم !!! عاين ليها بإستغراب
نغم : أسفة دكتور عادل شردت شويه
عادل : دا ما مكان شرود نهائي
نغم : حاضر ... عن أذنك
لما مشت خطوتين ناداها .... إلتفتت عليه
عادل : كيفك
نغم : الحمدلله
عادل : اذا محتاجة مساعدة انا موجود
نغم : شكرا دكتور
دخلت الجامعة..... خلصو محاضرات و قاعدين مع بعض ... شهد كانت مع طارق جات قعدت معاهم بدون ماتقول كلمة خاته يدها على خدها و ساكته .... ربى ماسكة تلفونها كل شوية تفتحو و تقفلو .. نغم سرحانة بعيد ماجايبة للدنيا خبر .... رؤى عاينت ليهم بزعل نهرتهم ... في شنو .. حاسة روحي في مسلسل البؤساء ... شنو جو الكآبة دا
ربى : وحياتك ماناقصين
رؤى : على فكرة الدنيا ماخربت
شهد : مفروض تخرب اكتر من كده يعني
رؤى : لو فضلتي مستسلمة كده بتخرب ... فتحي عينك احنا مش في عصر الجاهلية ... مافي بنت الزمن دا بغصبوها على الزواج ... ارفعي صوتك واتكلمي
شهد : انتي ماعارفة حاجة
رؤى : اعملي اي شي و احنا معاك ما بنخليك ... اما انك تضعفي و تستسلمي ماينفع
شهد: طارق قال لي بتصرف ... خايفة يعمل حاجة
رؤى : طالما قال ليك كده ماتخافي ... انا متأكدة الموضوع بتحل خليك متفائلة
شهد : يااارب
رؤى إلتفتت على نغم الشاردة في عالم تاني غير عالمهم ... سألتها و انتي بالاخت قصتك شنو
نغم : خليني الله يرضى عليك
رؤى : مالك
نغم : مخنوقة ... عايزة ارجع مع بابا ابوظبي
رؤى : بالطريقة دي الواحد يخجل يقول ليكم الخبر
ربى : اي خبر
رؤى : ماهر وصل امبارح و مصر يجيب اهلو في اسرع وقت
ربى : بتبالغي من الصباح ساكتة
رؤى : اعمل شنو ... شوفو مناظركم دي
نغم : محتاجين الاخبارالحلوة عايزين نفحة أمل تطمنا ان الدنيا بخير
شهد : مبسوطة ليك حياتي ربنا يوفقك
رؤى : هسي همتكم معاي بعد ساعة مفروض اشوفو ... ظبطو لي الميك اب و الطرحة
ربى : البت دي بترمي كل قنبلة أكبر من التانية ... ياخ اتكلمي من الصباح
نغم : يعني مابتعرفي أختك .... فجاة اتعرفت على زول بعد شوية بقى عريس وبكرة جاييكم البيت و احنا نايمين في العسل
ربى : دا عريس السوشيل ميديا .... العالم اتطور ياجدعان
نغم : يعني نمشي الانستغرام ولا توتير ... اعتقد الفيس بوك ناسو مضمونين
ربى: اي نشوف لينا بوست مولع و نعمل هجوم
شهد : لا ياخ البت دي بتاعة سنابات بس
رؤى : خلاص خلصتو ولا لسا
قعدو يضحكو فيها ... ربى قالت ليها ياخ احلى يوم لما اشوفك عروس هسي لو ما كنا في الجامعة كان زغردت ليك ... رؤى طلعت قابلت ماهر و طلبت منو ينتظر الامتحانات تخلص عشان يجي البيت .
نغم رجعت البيت قاعدة في غرفتها ... جا ابوها داخل ... ابتسمت لما شافتو... قعد جنبها قال ليها مشتاق لأنغامي ... ردت عليه و انا مشتاقة لأيامنا زمان
مجدي : عايز اشوف ضحكة بنتي الحلوة
نغم : يعني هسي ضحكتي ماحلوة
مجدي : بقت مكسورة ...حزينة ...ما عايز بنتي تزعل و انا عايش
نغم : تسلم لي ياتاج راسي ... اطمن بابا
مجدي : عيني في عينك
نغم : اكيد.. لكن زعلانة عشان خصامك مع خالو علي
مجدي : مشاكل الكبار خليها لأهلها ... اهتمي بقرايتك .... يعني ما عايزة تغني لي
بنظرة حزينة ردت عليه ... بقيت أكره اغني حاسة الألحان بتخنقني ... دارت وشها عشان مايشوف دمعتها النازلة ... ابوها قال ليها ... عايني لي ماتقسي على نفسك و تحاكمي روحك تبقي ليها القاضي و الجلاد.... في لحظات مؤلمة تمر على الانسان تهزو و تبقى ليو درس ....القوي بتعلم منها و ياخذ العظة والعبرة اما الضعيف بنكسر من اول اختبار ... و انا بنتي قوية ما ضعيفة ... يلا تصبحي على خير ربت على كتفها و طلع من الغرفة خلاها سرحانة في كلامو .
في اليو التاني بالمسا ضربت ليها ربى طلبت منها تجي تقرا معاهم .... كلمت امها لبست توب و مشت قاعدين كلهم بين المراجع والكتب بدرسو ..... لكن بعد شوية سمعو صوت طارق بتكلم مع امو ... طلعو يشوفو الحاصل
نور : في شنو ياولدي قول بسم الله
طارق : ياامي لي مده كلمتك بالموضوع و وعدتيني تساعديني .... هسي تقول لي ابوك قال انسى الفكرة
نور : ابوك قال مافي داعي للأستعجال ... بدري عليك
طارق : كلها اسابيع و اتخرج .... اما موضوع شغلي محسوم تاني وين المشكلة
نور : ياولدي الحاجات دي مابحسبوها كده
طارق : بحسبوها كيف طيب
نور : خليني اتكلم مع ابوك تاني على الاقل
طارق : لحد ماتتفقو بكون الوقت فات .... يا امي ولدك راجل و كلمتو واحدة .... انا وعدت البت دي و مستحيل اخذلها ..... عايز امشي لاهلها مع أهلي راسي مرفوع لكن اذا رفضتو تقيفو معاي ماعندي خيار الا ان امشي أخطب شهد براي .
لنا لقاء أخر .....
