"مع وقف التنفيذ"

"الفصل السابع"

ها يا دكتور ماما عاملة ايه"

نطق فارس هذه العبارة وهو يفرك يديه فى توتر بالغ و ينظر إلى الطبيب بقلق,دَون الطبيب أسماء بعض الأدوية فى ورقة من دفتره ثم فصلها وأعطاها لفارس قائلاً:

- متقلقش والدتك كويسة الحمد لله ..الضغط بس علي عليها شوية.. بس مفيش حاجة خطر الحمد لله

ألقى فارس نظرة على الورقة بيده فقال الطبيب متابعاً:

-  دى أقراص بسيطة كده للضغط لازم تواظب عليها

خرج فارس بصحبة الطبيب من غرفة والدته وهو يقول متسائلاً:

- طب هى هتفوق أمتى يا دكتور

نهض عمرو واقفاً هو ووالدته وهو يستمع لحديث الطبيب الذى كان يجيب فارس قائلاً:

- أنا ادتها حقنة تنزل الضغط وهتفوق دلوقتى ان شاء الله ..متقلقش

خرج الطبيب من المنزل وأغلق فارس الباب خلفه واستدار فى مواجهة عمرو الذى قال بلهفة:

- خير يا فارس؟؟

جلس فارس وهو يقلب الروشتة بين يديه وكأنه فى عالم آخر وقال بشرود:

- الدكتور بيقول ضغط .. كنت متأكد أنها مش هتستحمل الصدمة

توجهت والدة عمرو داخل الغرفة التى كانت أم فارس ترقد بها وهى تقول بتبرم:

- ضغط أيه وبتاع أيه .. هو حد يصدق كلام الدكاترة

شد عمرو على يده قائلا:

- بسيطه يا فارس ان شاء الله.. متشيلش نفسك أكتر من كده.. أنت ملكش ذنب  ..أنت كمان اتصدمت.. بس ولا يهمك انت مجال شغلك مفتوح وانت شاطر ....مش هتقفل على حكاية النيابة دى يعنى.. ركز بقى فى الماجيستير وبعده الدكتوراه وفى جوازك

أنتبه فارس لعبارة عمرو الأخيرة وتذكر دنيا التى تركها تصرخ على الهاتف وهرع إلى والدته , سمعا صوت والدته تناديه بوهن :

- فارس يا فارس

نهضت أم فارس من فراشها بمساعدة والدة عمرو فى أثناء دخول فارس وعمرو الذى قال يداعبها:

- ألف سلامة عليكى يا بطة

حاولت أن تبتسم وهى تنظر إلى فارس ولكنها لم تستطع, ساعدها فارس على الجلوس مرة أخرى على الفراش وجلس بجوارها , قبل رأسها وقد لمعت عيناه بالدموع وهو يقول انكسار:

- أنا آسف يا أمى أنا السبب فى اللى حصلك ده..لو كان بايدى كنت...

قاطعته والدته وهى تحاول صبغ صوتها بنبرة حاسمة:

- مش عاوزه اسمع منك الكلام ده تانى.. كل شىء نصيب .. أنا كل اللى يهمنى انك تبقى مبسوط ومرتاح ومش عاوزه حاجة تانية من الدنيا.. أنا يابنى لو كنت حاطة أمل على الشغلانة دى فده كان علشان كنت شايفاك متمسك بيها وبتحلم بيها لكن انا عن نفسى مفيش حاجة تفرق معايا ولا تريحنى غير سعادتك انت وبس .. سواء كنت محامى ولا مستشار