قلت لي رونق تساعدني في أني أقدر أقنع قصي قالت لي دقيقة بس أديني رقمو،، بعد أديتو ليها ضربت ليه وبدت تتكلم معاهو قالت لي قصي ألحق رفقة حالتها ساءت فجأة وحالياً مفروض تدخل عملية ورافضة قالت الا أنت تجي قال ليها رفقة؟!! وعملية شنو قالت ليهو ما حأقدر أشرح ليك الله يرضى عليك تجي قال ليها رسلي لي الموقع والمستشفى وبكرة حأكون معاكم وقفلت،، قلت ليها رونق ما كان تكذبي حيزفونا أنا وأنتي قالت لي حأقول أنها فكرتك أنتي😹قلت ليها ظابط المهم يجي.
حالتي أتحسنت جداً بقيت قادرة أتحرك شوية وعشان ما اتأذى عندي عصايات بتسند بيهم،،بقيت بجهز في نفسي وحأقول لقصي شنو وأقنعوا كيف، حسيت أني محتاجة مساعدة أتصلت للدكتور المتابعة معاهو أداني أفكار مرضية،، قلت بس حأقولهم ليهو والحيحصل أحصل،، تاني يوم من الصباح رونق جاتني جارية قالت لي ألحقي رقم ضارب لي قلت ليها أيعقل؟ 😂قالت لي أيعقل ونص وخمسة قلت ليها طيب ننزل أويس يوصلنا المستشفى بعد داك أرجعي ليهو قالت لي طيب بس ديل الليلة عندهم عطلة حان ويوسف قلت ليها سوقيهم معانا ما مشكلة،،دخلت غرفة كده قلت ليها بعدين وصفيها ليهو،، في أقل من دقيقة لقيتو معاي،، قلت ليهو قبل تقول أي حاجة أنا آسفة وعارفاها ما كفاية بس آسفة،، قال لي مافي حاجة حتشفع ليك يا رفقة مافي قلت ليهو طيب أديني فرصة أشرح ليك قال لي ما عايز أسمع منك ولا أي كلمة،، قالها بنرفزة وكان طالع فوقفت بالعصاية ومسكت الكرسي قلت ليهو ثواني قال لي رفقة أتحسنتي؟ ،، كأنو في كسر من الثانية نسى أي حاجة وبقى واقف عند اللحظة دي قلت ليهو أنا جبتك عشان أنا في يوم عايزة أعاين ليك بنفس النظرة دي ❤️قال لي أنا فخور بيك وحكيت ليهو التفاصيل كلها من أول يوم يوم جيت فيهو وكلام الدكاترة لأنو الفترة الفاتت ما كنت متواصلة مع زول وأبوي واخواني بطمنوا علي بواسطة رونق،، قلت ليهو هاا؟ قال لي معاك قلت ليهو ما يبقى كلام بس خلي عندك عزيمة وسبب عايز تتعالج عشانوا قال لي في سبب أكتر منك يا رفقة،، ما عرفت أرد عليهو كيف قلت ليهو المهم تبقى كويس وبعدين أشغلك معاي طباخ قال لي كووويس 😏.
قصي بدأ الجلسات العلاجية النفسية والفيزيائية وكان معاهو أصحابوا وقفوا معاهو،، فكان في تحسن ملحوظ في حالتو وأنا كنت حاضرة كل الجلسات الا النفسية كان بحنسني عشان أمشي معاهو بقول ليهو دي معركتك أنت لو أنا كنت في أو ماف مفروض تواجهها براك عشان ما ترجع تنتكس واجه مشاكلك أبكي بس خليك في الواقع ما تتمرد عليهو عشان ما يعمل ليك رد فعل معاكس،، مافي حاجة أسمها إذا الراجل بكى ده ضعف منو أبداً ربنا برضو أداهو قلب وأحساس الدموع ما ضعف هي مجرد تفريغ ومتنفس ما أكتر هم كمان بتخذلوا وبنكسروا بس هم دايما أقوى وبقوموا وما بظهر فيهم ❤️وأنا معركتي خضتها براي تماماً وكنت في صراع نفسي دائماً أنا قرايتي خليتها لأسباب نفسية كتيرة أكتر الوجعات كانت بتجيني من ناس قريبين لي شديد من في المدرسة صحبات، معلمات بسبب الكنت بتعرض ليهو منهم ما قدرت أواصل وده أول سبب خلا ثقتي في نفسي تتهدم أتعب عشان بعدين ما تندم.
في آخر جلسة لقصي رونق لقتني من الصباح قاعدة في نص السرير وببكي قالت لي مالك قلت ليها آخر جلسة لقصي وهو الأنتصر حيرجع يمشي أحسن من الأول قالت لي ولي الليلة ما مشيتي ليهو قلت ليها ما عارفة في شعور كبير جواي ما قادرة أفسروا غير أني مبسوطة شديد قالت لي حتى أنتي أنتصرتي قلت ليها بس أنتصاروا هو البستحق،، 5شهور من الجري، البكى، النفسنة، والشكل عدت وربحنا نفسنا قالت لي مفروض أول زول يشاركوا أنتصاروا،، قلت ليها ما حأقدر،، سمعنا باب الغرفة فتح قال لي مستحيل أمشي بدون أشوف النظرة الوعدتيني بيها،، قلت ليهو قصي!! قال لي شكراً ليك مع أنو الشكر بس ما حيوفيك حقك،، رونق قالت لينا خلاص بطلوا بكيتوني معاكم وأنا بحبكم الأتنين بنفس القدر قلت ليها بس أنا أكتر،، قالت ليهو شكلك مسافر قال ليها فعلا وطيارتي بعد ساعة قالت ليهو لو كنت عارفة كان خليت الأخت تمشي معاك قال ليها مافي طريقة قلت ليهو أصلا ما كنت حأمشي معاك عندي باقي أستكشافات قال لي وهو المطلوب المهم أتسوقي كويس رونق قالت ليهو تتسوق أكتر من كده كيف،، ودعنا وقال لي خلي بالك من نفسك قلت ليهو أن شاء الله ❤️
قعدت مع رونق زي شهر زرت فيهو متحف اللوفر وبرج ايفل ونهر السين القعدت فيهو قريب ساعتين وما حسيت بأي ملل، راحة نفسية،، ومشيت زيارة أخيرة مع ناس الجمعية،، رجعت السودان لقيت راغب وميان و ريف وياسر وأبوي كلهم مستنيين في المطار،، قلت ليهم أشتقنا والله أبوي قال الحمدلله شفناك بخير وسلامة،، ركبنا العربية قلت ليها شايفة الدبلة رجعت وحركات قالت لي أحسن أنا، أنتي ما عارفة الراجيك راغب قال لي أبوي تتكلم أنت ولا أنا قال ليهو أنت قال ليها في فترة غيابك دي حصلت حاجات كتيرة ولد صاحب أبوي جاء طلب يدك مننا وأبوي ما قدر يحرجوا فأداهو طوالي وقلبت عقد قلت ليهو بدون ما تأخدوا رأئي ابوي قال لي قبل كده قلنا ليك حنعقد بس تاني وأنتي حالياً على ذمة راجل،، حسيت العبرة خانقاني وكيف التصرف ده ممكن يجي من بابا وراغب طول الشارع ما فتحت خشمي،، لمن وصلنا طلعت غرفتي طوالي،، راغب ضرب لي قال لي الراجل ده قال جاي يشوفك اتجهزي، يداب هنا دموعي بدت تنزل،، قلت لنفسي الما دارك بعولاقك بلاهو، بعد ساعة حتى جاء داخل،، قلت ليهو ما حأسامحاك والله أنا تعمل فيني كده قال لي أنا أسف قلت ليهو مش كنت بتقول أسف دي ما بتشفع لزول أطلع برة يا قصي،، جراني عليهو وقال لي أسف حبيبي بس لازم كان أعمل كده،، قلت ليهو أسى أنا أبكي ولا أضحك قال لي أعملي العايزة تعمليهو المهم بهبلك ده كلو بقيتي حقتي 💘 قلت ليهو وأنا محظوظة بيك
رونق كانت عارفة بأي حاجة بس ما قدرت تجي، قلت ليها حنجيك نحنا، تاني يوم طوالي قالوا يتمو العرس أتفقنا أنا وقصي أنو ما عايزين أي حاجة بلح وحلاوة وعصير وبس مافي زول كان متخيل أنو العرس يتم كده بس تم بكل البساطة ألفي الدنيا، كل يوم بقيت بصحى وبنوم بصوت تلاوة قصي وياني ضلو ساعة الهجير.
~~النهاية.....
الحياة دي بسيطة مامن حق أي زول أعقدها للتاني، بشعور، سلوك أو فعل، أي زول يعيشها بالطريقة العايزها هو، ما من حقكك تقول ليهو ليه عايشها كده؟
أصحاب الهمم هم كأي فرد في المجتمع وأحتمال أكتر فئة منجزة، النظرة المفروض تكون موجهة ليهم هي الفخر.
لو ماا كنت دوا ما تبقى وجع
ما أي صاحب بيتصاحب
والسلام ❤️
