اليوم التاني كان الحضور الساعة 3 ما ودعت كل الناس بس الكانوا معاي في البيت،، بابا قعد يوصي في رونق علي وراغب كان واقف بعيد وبعاين بس،، وريف قالت لي لو ما الجامعة كنت حأمشي معاك، رونق قالت ليهم أنتو ما واثقين فيني ولا شنو والله برجعها ليكم ما تخافوا،، راغب وصلنا المطار قلت ليهو ما عايز تودعني يعني؟ قال لي أنا ما شاطر في الوداع وكده بس خلي بالك من نفسك، كان حيبكي قلت ليهو وفر دموعك لمن أبقى كويسة، قال لي بأذن الله ❤️ قلت ليهو ممكن تعتذر لي لي قصي وأمه لأني ما ودعوتهم، قال لي حاضر.
أول ما وصلنا لقينا أويس مستنينا،، قال لي باريس نورت قلت ليهو أكيد،، طبعاً ما عرف أطلعني العربية كيف، رونق قالت ليهو نسندها أنا وأنت قال لي طيب،، قال لي من هنا حتمشي المستشفى الشغال فيها، فيها دكتور شاطر جداً كلمتو عن حالتك وشاف أوراقك كلها وقال حيتابع معاك قلت ليهو ظريف طيب،، وصلنا أول من شفت الدكتور قلت ليهم أنا بحلم،، رونق قالت لي بتعرفيهو قلت ليها تتذكري الجمعية العالمية الكنت عايزة أنضم ليها وما أتوفقت كان قايم بيها هو،، قالت لي جمعية مختصة بشنو قلت ليها بذوي الهمم والمقعدين واحد من أحلامي كان أنضم،، أويس عرفنا عليهو وعمل لي صور أشعة،، في النهاية قال أنو ما بحتاج لعملية بس علاج فيزيائي، قلت ليهم خير بيأخد كم العلاج،، قال 3شهور على الأقل،، قلت ليهم كتيرة، رونق قالت لي ما حتحسي بيها أصلاً حتمر برمشة عين،، أويس قال لي أنتي في بلد السحر والجمال فأستمتعي قبل تلقى نفسك في المطار راجعة قلت ليهو كنت مستنياك تقول لي بلد العشاق عشان انتفض فيك، رونق قالت لي عارفنك سنجل فما حتستفيدي حاجة إذا قلنا ليك قلت ليهم ظابط يشوية مكسرين للمجاديف،، وصلنا الشقة ولقينا أي حاجة جاهزة من الأكل للغرف.
أول يوم في العلاج كان هين لأنو قبل كده أتعملت لي جلسة،، قدرت أستفرد بالدكتود وعبرت ليهو عن رغبتي في أني عايزة أنضم للجمعية وحأكون كممثل ليهم في السودان،، وقدر الأسئلة السألني ليها كنت قادرة أجاوب، وأكتر سؤال حسيتو مخيف كان "هل الأعاقة بتخلي الزول يتخلى عن أهداف وطموحوا " ما حسيت أني قادرة أجاوب لأنو بعد الحادثة نسيت خندريس الكان محل أحلامي وشغلي وعن أي حاجة كنت بادية فيها بس أتذكرت قصي وأنجازتو وشركتو العندها فروع في معظم أنحاء العالم قلت ليهو أبداً ما عايق وما معناها أنا ما قادرة أتحرك ما قادرة أنجز لا أبداً طالماً عقلي شغال وقادرة أفكر فأنا من أكتر الناس المحظوظين ،،قال لي عظيم قلت ليهو العظمة لله وحده،، قال لي أعتبري نفسك معانا من الليلة قلت ليهو ويا ريت لو في زيارات، توعية أو أي مشاركة أنا حابة أمشي معاكم،، قال لي أوك،، رونق قالت لي أول يوم كان كيف قلت ليها حلو جداً حماس قالت لي الله حبيبتي أنا بما أنو عندك عزيمة للعلاج فحتتعالجي،، قلت ليها تتطلع لي اللابتوب حقي بما أنو عندكم نت مفتوح عندي فيهو شغل.
أكتر حاجة كنت عايزة أعملها وحاسة نفسي حأقدر أغير حاجه أني أقرأ عن المرض حقي وعن الشلل عموماً وطول فترة العلاج ببحث في الموضوع ده بس وعملت زيارات كتيرة مع أعضاء الجمعية ومع الدكتور المتابع معاي أويس كان بوصلني أي مكان أنا عايزاهو،، فكنت بمشي المستشفى وبتابع الحالات والتاريخ المرضى وأكترهم شلل للطرف السفلي بس،، الدكتور لقاني مركزة مع تاريخ واحد قال لي ده تفتكري السبب الرئيسي شنو قلت ليه حسب الهستوري ممكن تكون حاجة نفسية قال لي فعلاً ممكن يكون لأسباب نفسية وعمل عمليات كتيرة بس ما جابت نتيجة والسبب الرئيسي أنه ما كان هو العايز العلاج كان عشان يرضي زوجته بس بعد العلاج النفسي والمتابعة معاي حالتو ماشة في تحسن في أقل من شهر والمرض نفسي أكتر من عضوي،، قلت ليهو أيوا،، بعد رجعت أتصلت على ميان،، قلت ليها قصي من أتولد كان عندو شلل ولا حصل ليهو حادث أو حاجة بالشكل ده قالت لي لا كان عمل حادث الأيام الأولى كان كويس ويتحرك بس فجأة،، قلت ليها طيب حصلت ليهو صدمة قالت لي أي،، حسيت بيها ما عايزة تحكي قلت ليها ما نفسي أدخل في خصوصياتكم بس لمصلحة قصي قالت لي لمن أبوي مشى خلانا فجاءة وأمي كانت بتبيع في الشوارع عشانا وهو كان الكبير فحس أنو المفروض يمسك المسؤولية بس ما عرف كيف أمي يومي كانت بتتهان في الشارع ومن الجيران وجانا خبر وفاة أبوي فجاءة وحبيبتو ألفي الحقيقة اتربوا سوا أتزوجت بدون ما توضح أي حاجة حاول يشتغل أي حاجة، حرفياً أي حاجة بس كان بترقص أو يتطرد وهكذا قالت لي معناها تحليلاتي صاح وأمك الكانت بتجبروا يعمل العملية صاح قالت لي أي قلت ليها طيب برجع ليك في وقت تاني،، أتكلم مع الدكتور عن حالة قصي قال لي مصاب بـ"هستريا تحولية"، ،كل أفكاري بقت كيف أقنعوا يجي هنا!!
————————————
هستيريا تحولية
معناها تحول المرض من نفسي لظهور أعراض جسدية، وغالبًا ما تكون الأعراض في أكثر عضو يستخدمه المصاب في الوظائف التي يحبها، كفقدان القدرة على التحدث إذا كان المريض إعلامي أو مطرب، أو شلل في يده إذا كان المصاب كاتبًا.. وهكذا
ويحدث أحياناً نتيجة لصدمة قوية أو فشل عاطفي.....
