قلت ليهم احتليتوها خلاص ،، وريف قالت لي دي اكتر حاجة بتعجبني فيك بتواجهي اي حاجة ببساطة وبتهظري وتضحكي عاادي قلت ليها هي دنيا زايلة وما بتستاهل ،،، رونق قالت ليها من زمان هي كده وما بتقدري تفرزي هل هي زعلانة ومدارية ولا مبسوطة بجد ،،، قلت ليهم خليكم مني وروني الحاصل شنو في حاجات كتيرة متغيرة ،، رونق قالت لي مافي حاجة بس انتي ارتاحي واسمعي كلام بابا وما تفكري كتير ،، ماشة أشوف حان ويوسف مع خالتو فاطمة ،، بعد رونق طلعت قلت لي وريف دبلتك وين ما شايفاها ،، مش دي القلتي عمرك ما حتطلعيها ،، قالت لي بطلي اسئله يااخ ،،، بقيتي كلامك كتير قلت ليها انا جادة على فكرة حتى راغب لاحظت ليهو ما لابسها ما تقولي حصل الفي بالي قالت لي أي ،، والسبب تافه يعني المهم ،، ما عارفة اقول ليك شنو بس كل حاجة قسمة ونصيب قلت ليها اصلا ما حأطلع منك بحاجة نافعة عندي كلام مع راغب ،،، ولو بالجد الموضوع طلع تافه أو بسببي أنا ما حأسامح نفسي ولا أنتو،،، جاتني ميان لمن نفسها مقطوع قلت ليها مالك قالت لي تلفونك بضرب من قبيل قريب العشرين مكالمة وما سمعتهم قلت ليها أنا أفتكرت في حاجة حصلت لقصي أوف قالت لي لا تلفوني طول الفترة الفاتت كان عندي ونسيتو وقصي كويس خليتو نائم قلت ليها طيب نشوف منو العايزني بالصورة المستعجلة دي لقيتوا ياسر ما رديت وريف شافتوا وقالت لي ليك حق ما تردي بس ممكن تسمعي منو الكلام كلو إحتمال في جزء نحنا ما عارفنو قلت ليها ولا نص كلمة ما حأقدر أسمعها منو ما بقدر أنا حياتي أنتهت بسببوا ميان قالت لي أحمدي الله يا رفقة ومش دائماً بتقولي قدر أخف من قدر أهو بكرة تتعالى وترجعي أحسن من الأول شوفي قصي وحالتوا وقوتوا وكمية العمليات الدائم نتيجتها فاشلة كان بعملها عشان خاطر أمي بس قلت ليها أي حاجة بتحصل لخير،، وريف قالت لي يلا أنا ماشة قلت ليها جيتي بعربيتك ولا أضرب لراغب أوصلك قالت لي جيت بيها قلت ظريف، بتجيني متين تاني قالت لي كل يوم حأكون معاك قلت ليها ظابط وميان طلعت بعدها طوالي حسيت لأول مرة أني براي قعدت أبكي ما عارفة بكيت على شنو أو من شنو كنت عايزة أبكي بس،، ضرب لي قصي بكيت ليهو في التلفون قال لي مالك قفلت فيهو الخط،، بعد أستغفرت وقلت ده شنو البعمل فيهو أنا ده قضاء وقدر،، راغب وبابا ورونق جابوا الأكل لغرفتي وقالوا ما بيقدروا يأكلوا بدوني ❤️ قلت ليهم شكلي حأستلذ الرقدة دي راغب قال لي ابكي كويسة بس وحننتقم منك قلت ليهو وين يااا 😂 قلت لي رونق شايفاك استقريتي حبيبتي أنا ما راجعة قالت لي قاعدة في بيت أبوي قلت ليها أويس ما شايف شغلوا قالت لي حيقطع لينا التذاكر الأسبوع الجاي قلت ليها ظابط لأنو مدرسة ولدك وقرايتك أنتي ما تضيعوها سااي قالت لي وعلى فكرة سايقاك معاي للعلاج قلت ليها ولا تفكري أبوي قال لي برواقة كده يا رفقة انتي حتى ما فكرتي قلت ليهو لالا ما بقدر أمشي أخليك أنت وراغب وراي قال لي أسى لو عرستي ما كان قلت ليهو هنا الوضع بختلف 😂 قال لي فعلاً العلاج فترة مؤقتة بس وحتجي راجعة قلت ليهو خلاص بفكر 😪
الليل كلو صاحية وما عارفة أتقلب وما قادرة أنوم، أتذكرت لمن قصي قال لي في البداية أخلاقي كانت ضيقة وما كنت بنوم وعصبي شديد قلت هل أنا حأصل للمرحلة دي،، لأني حالياً زهجت من نفسي،، أتذكرت أنو أمر المؤمن كله خير ❤️،، فتحت تلفوني لقيت رسالة من قصي كاتب لي صاحية قلت ليهو أي بعدها طوالي ضرب لي قال لي قبيل مالك قلت ليهو كنت متضايقة بس،، حسيت بيهو ما عارف يقول لي شنو لمدة دقيقتين الخط كان فاتح ومافي زول فينا بتكلم قلت ليهو قصي ممكن تقرأ لي قرآن قال لي طيب كان بقرأ وما حسيت بنفسي الا وانا نائمة ❤️
