رفقة ياا بت قومي أنتي ناسية الليلة كرامة أختك شوفي الساعة كم ،، قلت ليهو نسيت والله يا راغب ،، قال لي يلا خلاص قومي وصحي معاك وريف قلت ليهو كويس ،، صحيتها ونزلت تحت لقيت البيت عبارة عن نسوان ونصهم أهلنا ما بنشوفهم الا في المناسبة ومن سنة لسنة ،، طلعت فوق لبست عبايتي وجريت معاي وريف قالت لي ما بحب الاماكن الفيها ناس كتار عندي فوبيا يااخ قلت ليها فوبيتك دي الليلة اتجاوزيها كلو يوم واحد ،، مشينا ساعدناهم في الفطور وقسمنا معاهم ،، زي الضهرية كده البيت بقى شبه فاضي وبدو برنامج القهوة ،، رونق قالت لي أشتقت ليها من يدك قلت ليها أسي بعملها ليك ،، وراغب قال عايز سيرمس للرجال قلت ليهو حاضر ،، بعد انتهيت منها ،، لقيت فادي بوراي قلت ليهو بسم الله جيتني من وين انت قال لي جيت أشوفك ،، ليك كم يوم ما جيتي المكتب جيتك أنا ،، قلت ليهو خلصت الشهر ولو نزلت حأنزل في أيام متقطعة قال لي كويس والله ،، قلت ليهو فادي بتعرف أحمد من وين ؟! قال لي كان زميلي في الجامعة قلت ليهو ايوااا قال لي عارف أنو كان خطيبك تتذكري لمن ركبتي معاي انتي وبت خالتك هو كان معانا بعد نزلتو حكى لي أي حاجة ،، ما كان ليهو الحق يسيب الجمال ده كلو لكن أنا ما حأخليك وانتي ما حتقدري ترفضي واحد زي قلت ليهو فعلا صاحب أحمد ،، وشفتني خلاص تاني في حاجة قال لي القهوة قلت ليهو هاك 🙂 راغب لقاهو واقف قال ليهو اتأخرت شديد جيت اشوفك قلت لي راغب الموضوع العرضتو علي انا رافضة قال لي نتناقش بعدين قلت ليهو أحسن قدامو قال لي تمام ما مشكلة ،، شلت القهوة لي ناس رونق ،، والقعدة كلها مدبرسة ،، ميان قالت لي مالك قلت ليها لا ولا حاجة بس مرهقة بس ،، رونق قالت لينا ما حتطلعوني يعني قلت ليها أستني ليوم الأحد عندي ليك مفاجأة قالت لي نشوف ،، خالتو فاطمة قالت لي تسلم يدك يا بتي ،، قلت ليها العفو يا خالتو ،، واستأذنت هي وبتها ،،، وعدى اليوم ده ،، قررت أرجع من الصباح وأغرب يوم كان يوم الجمعة الصباح كان في شاب قاعد قدام الباب وشكلو مُقعد ،، سرحت فيهو مسافة وده منو ،، واول مرة في حياتي أشوفو ،، هل ده ولدها ؟!،، قلت لالا كان عرفتنا عليهو ما أظن ،، احتمال زول كان ماشي ووقف هنا ،، لمن لاحظ إني بعاين ليهو دخل بيت ناس خالتو فاطمة قلت احتمال قريبهم ما علينا ،، ويوم السبت اتكرر نفس الشئ وكل ما يشوفني يدخل ،، الا يوم الأحد كان معاي يوسف ود اختي صحى معاي واتشبك ،، كان اول مرة يتحرك علي ،، قال لي السلام عليكم قلت ليهو وعليكم السلام وقعد يشاغل في يوسف قال لي انا بحب الاطفال جداً ملائكة الرحمة ديل والغريبة يوسف ما صرخ بالعكس بضحك ،، قلت ليهو أنت من الحي ده قال لي اي قلت ليهو اول مرة أشوفك قال لي ما قاعد اطلع كتير وما بحتك بالناس كتير قالت ليهو ناس منو قال لي ناس عمر عبدالعزيز قلت ليها ود خالتو فاطمة ؟! قال لي ايوه،، أخدت معاهو في الكلام وعرفت أسمو قصي وتفاصيل سكنهم وتنقلاتهم،، أستأذن مني ودخل بيتهم
