لمن طلعوا خلوني ركبت سماعاتي وقعدت أرقص ، دمي بارد جداً 😂 بعد خلصت مشيت لراغب في غرفتو قلت ليهو فشلتني قدام الحاج يااخ ما حلوة في حقك قال لي تستاهلي والله ولو سألني تاني حأقول نفس الكلام قلت ليهو مش أنا أختك حبيبتك ؟ قال لي ومجنونتي كمان بس أعقلي حبة قلت ليهو هم العاقلين عملوا شنو 😯 قال لي انا القدامك ده شايفاني عملت شنو ولا لا قلت ليهو أي منجز واي حاجة بس ما معناها أنك عاقل 😂 قال لي أطلعي بره يااخ ما فاضي ليك قلت ليهو فاضي لحبيبة القلب بس قال لي رفقة أنجزي قلت ليهو وانا جاياك عشان كده عندي مشروع وعايزة أنفذوا وأفكار كتيرة وفي ناس طرحوا علي حاجات حابة استشيرك قال لي أخيرا الله هداك بس ممكن نتناقش بكرة لانو عندي شغل كتير قلت ليهو كويس وأثناء ما راجعة غرفتي سمعت امي بتقول لأبوي خليك صارم معاها القراية من هي في الأساس خلتها وتصرفاتها ما عاجباني مشيت الموضوع عادي ودخلت غرفتي والنوم كأنو مستقصدني بقيت بفكر في كلامها قلت إحتمال ما قاصدة وكفاية أنو ابوي واقف معاي نمت قريب للصبح.
تنوم للساعة 2 الضهر تنوم السهر ان شاء الله قايلايني شغالة عندها صحيت بالأصوات دي نزلت تحت لقيتها أمي قلت ليها خير في حاجة قالت لي لالا أبدا صحيتي متين قلت ليها الساعة 2 ودي أنا الكنتي بتتكلمي عني 🙂 قالت لي لالا دي الشغالة قلت ليها خير ، وراغب قاعد ولا طلع قالت لي طلع قلت ليها تمام قالت لي تعالي افطري قلت ليها ما عندي نفس طالعة غرفتي،،، يعني لو كان نفسي في حاجة بالجد لو بقدر ألقى زول يفهمني اي زول برمي الأحكام براه مافي زول فاهم حاجة وما اظن يفهموا 💔🚶 كل ما حبيت أفرغ بسجل ريكوردات بفرغ فيها 💔
زي العصر راغب ضرب لي قال لي تعالي لي المكتب قلت ليهو لشنو ؟! قال لي في حسابات كتيرة عايز أخلصها وما بقدر براي قلت ليهو ظريف ،، طول فترة قعدتي في البيت اتعلمت حاجات كتيرة عن الحسابات والشركات وقريت عن تطوير الذات وراغب خلاني أحب الحاجة دي ،، لبست عباية نظام النفسيات وكده لمن وصلت راغب عاين لي قال لي المات منو ؟! قلت ليهو كيف قال لي على طول بتحبي اللبس والقشرات الليلة مالك قلت ليهو مافي حاجة ،، ولي ما جبت الملفات البيت قال لي في مرة خليتها وجبتها معاي لقيت الحسابات ملخبطة ولو ما كان في نسخة منها على اللابتوب كنت حأدخل في سين وجيم وما عرفت العمل كده منو ومن اليوم داك ما بشيلها معاي لانو دي امانات قلت ليهو طيب نبدأ كان معاهو زميلوا في الشغل عرفوا علي وبدينا اسموا فادي
انتهينا قريب للعشاء فادي قال عازمنا عشاء قلت ليهو أمشي أنت وراغب انا ما لي نفس أطلع قال لي هي الطلعة دي خصيصا ليك حسب ما بحكي راغب أنك ما بتحبي تطلعي خالص قلت ليه فعلاً أستاذنت منه وطلعت رجعت البيت ما استنيت حتى راغب يوصلني ،،، أمي قالت لي الجابك شنو ؟! أقصد انتهيتي ، ما رديت عليها طلعت غرفتي كنت حاسة بضيق غريب واتمنيت حياتي دي تكون عبارة عن كذبة 💔 ،، ماهو أنتي ما كل مرة حتهربي بالبكى صاح قلت ليهو راغب الله يخليك ما عايزة أتكلم قال لي المزعلك منو قلت ليهو ولا زول بس ما مرتاحة قال لي آخ ما يكون عشان ما قعدت معاك وشفت مشروعك قلت ليهو أبداً واصلا اتخليت عنو قال لي أهدي وتعالي لي في المكتب وبنتفاهم قلت ليهو حاضر
