العشق الاسود

p1 ❤

دخل عليها لقاها حاطة راسها بين رجليها ..في ايدها مقص ... صوت بكاها تحول العويل ابكم و صراخ مخنوق ... شعرها طويل غزير هابط كيف الليل على اكتافها مخبي زنودها الي كيف البلارة ... بجنبها روبة عرسها ... الروبة الي تتمناها كل صبية ..لكنها كانت ممزقة كيفها ... مغتالة كيف احلامها ... مقتولة كيف مستقبلها..مقطعة من غير لا شفقة و لا رحمة...كنها اختارت تعاقبها علي عملاتو دنيا فيها ... تناثرت بجنبها قطع الدونتال معلنه احتضارها و هزيمتها ...لفوال متكي يتفرج على ها المأساة ...كل شي داير بيها يشهد على وجيعتها ...ايهم بقى يشوفلها حواجبو معقودة ...عينيه كيف صقر في قوتهم لكن من فوقهم واقفة رموش تضيع لعقل ...عينيه مجبودة مكحلة رباني حاجب كامل و الكامل ربي ... الكوستيم زادو رجولة على رجولتو ... واقف طويل ..كتافو عراض ... كتف ايديه و بقى يدق برجلو ...

طلعت راسها ...كحل سايل واد مع دموعها ... عينيها حمرة و روج اعلن احتجاجو على شفيفها ....على ايدها بقعة دم تفضح في جرحها المخبي ...

مشى خطوتين ...طبس شاف معصمها المجروح...

_ في بالك الموت باش يريحك مني .... غالطة راك صدقني نتحول لشيطان و نخرجلك ...رد بالك تعاودها ...خاطر انت معادش عندك الحق حتى تتنفس من غير اذني ...فهمت و لا ...تموت وقت انا نخليك تموت (هز قطعة من الدونتال لملوح ربط بيه ايدها...كبس عليه لين وجعها ...

_ (جبدت المقص من تحتها وقفت تهدد فيه... ) اخرج علياااا ...اخررررج نقتلك و رد ها المزود نواح و زنازة عليك ..اخررج ... 

_ (يتكلم بكل برودة دم ) حط لمقص ...انت منجمتش تقتل روحك باش تقتلني ...العدول جاء و ناس تستنى حتى بوك و امك لوطة (يضحك في ضحكة صفرة )

_ ( تشوفلو عينيها ثقال من لبكى تحاول تستجدي فيه اي حاجة انسانية متبقية رغم الي متأكدة انو بعيد برشا على لعباد )... ياخي حيوان انت ...ربي ميزنا بلعقل ...كفاش تقبل تعرس بوحدة في خاطر جرد شراكة ...عاود خمم امان ...انا اصلا كنت مخطوبة ...يعني مستحيل نحبك... كفاش باش نعيشو مع بعضنا ....ياخي قلب هاذا الي يدق بين ضلوعك ولا حجرة ... الله يخليك تراجع و انهي ها المسرحية البايخة ... ( كنها تكلم في حجرة و لا صمبة ....يمكن حتى كان جت حجرة راهي سخفت عليها ونطقت )

_ بلاهي بوك الي جابك باعك و جاية تلوم فيا انا ... و شكون قالك حاجتي تحبيني و لا تعيش معايا ( شدلها وجها بيدو و حطو قدام وجهو )...شوفلي مليح حسب رايك ها لكلام الفارغ باش يأثر فيا اه .. انا جايبك لهنا تخليص حق ... فهمت و لا ...يعني اهر همي نعيش معاك كيف اي ثنين معرسين (وصل بجنب الباب ..) في ايدك عشرة دقايق تنظف فيهم خليقتك و تلبس ها شوليقة و تخرج فهمت و لا ... ( واقف عاطيها بظهرو و يتكلم فجاة رجع قدامها يصيح ) ... فهممممممت و لا جاوبني نكلم في حجرة ربك ...من هنا وجاي كيف نحكي معاك تشوفلي و تجاوبني ( شادها من زندها يخض فيها )

_ ( عينيها تهرات و صوتها خارج مخنوق )...سيبني وجعتني ... سيبني ...كون انسان لثانية و لو مرة في عمرك راك توجع فيا ...( فلتها طاح لمقص من ايدها مهزوم و بعدو طاحت هي كدس تحت رجليه )... امان ايهم خليني نمشي ... حرام عليكم و الله حطمتوني ... سيبني نمشي بجاه ربي سيبني ...نبوس رجليك سيبني ( هبطت على رجلو جبدها و خرج خلاها متكومه في نفس لبلاصة ) 

وقفت بسيف متعكزة على حيط ... هزت الروبة الي ولت اقرب منها للخيشة تكركر فيها وراها .. دخلت لتوالات ... وقفت على لمغسلة غسلت و ركحت وجهها شوي ... لبست ..حاولت تسكر روبة منجمتش توصل لسلسلة ...خرجت تكر في رجليها كنها تكر في زوز حجرات ... لقاتو واقف يستنى فيها ... دارت اعطاتو بظهرها ...

_ ( كل شوي تمسح دموعها بكف ايدها خايفة منو )... سكرلي منجمتش نوصل ...

وقف مشدوه لحظة ببدنها ...تضاريسها الحادة و المتناسقة ... بتاتو الي من كرومتها هابط مع سلسولها لآخر ظهرها ... حست بعينيه تحرق فيها من تالي ...

_ اش تعمل ...لشنوة تشوف...عمى ان شاء الله سكر ام الروبة ... ( تحاول توصل لسلسلة منجمتش )... الهم هاذا سخط .... يا ربي هزني و ريحني ...تي سكر لخرااا ...

 فاق من سهوتو على صيحتها شد سلسلة بزوز اصباع طلعها بلا مبالات كنو يقلها انوثتك ما تعنيلي شي...انت مجرد صفقة ما تحرك فيا حتى شعره