العشق الاسود

p13

رجب سبقها يجري و هي وراه اول ما حل الباب لقوها مطيشة تسخف ترعش بكلها كيف طير المذبوح ... قلش عليها وحدة اخرى ...ضو وجها طفى ...تحل في عينيها بسيف و تمسح في خشمها ...ريقتها سايلة ... تنطرت سوسن على مهرة حملتها ...فكتلها شكارة من ايدها و لوحتها ..

_ يا مهرة وخيتي اش عملو فيك ... مهرة حل عينيك ... مهرة ... شوفلي عزيزتي... امان الله يهلكهم الله... ينتقم منهم ....

 تلفتت لرجب مزلت محلتش فمها لقت ايهم واقف في الباب ... كابس على ايدو ...وجهو احمر.... عروق راسو ظاهرة ... شفتو لوطنية ترعش من لعصب و عينيه كيف الجمرات مركزة مع مهرة متهزتش من عليها .... قلبو تكمش لين معادش منجم يتنفس ... رجب بعد وقف لتالي ...ايهم سيب الفاليز و مشى خطوتين ...شد شكارة بقى يشوفلها و يشم فيها و يشوف لسوسن ...باش ياكلها بعينيه 

_ رجب هز سوسن و اخرجو من هنا ...( خرجو من غير حتى كلمة ..هزها في حضنو و كبس عليها ) ...مهرة ... حل عينك ... 

_ ( حلت عينيها بشوية تبسمتلو )...باش نموت ايهم ..( خرج صوتها واطي مبحوح )

_ لا مكش باش تموت ( دخلها لتوالات )

حطها على لفابو ..حللها فمها بيديه و حط صبعو في حلقها ... استفرغت الي في معدتها كل ... بقى شادها غسللها وجها طمن على نفسها منظم غطاها و خرج ...ناوي يحرق الخضر قبل اليابس ...

شفاتو نجوى هابط شاد الفرد في ايدو تخبت لين تعدى و طلعت لبيتها تجري بدنها كل يرعش و اعصابها سايبة ...بقت طل من فجوة الباب ...

(دخل لبيت سوسن لقاها تبكي و سماح تسكت فيها شفاتو تنطرت قدامو ... ) ... ايهم مهرة لاباس ... قلي برحمة امك ... لاباس ...

_( مسح على شعرها) لاباس ..لاباس ... نحب نفهم شنوة صار ... تكلم سوسن اختي ... ( راص على سنيه يتغالى كيف البركان )

_ (دخلت نجوى تجري تتذوبل خايفة لا بنتها تقود بيها ) مرتك مدمنه... اش تحب تحكيلك سوسن ... عنا مدة نحاولو معاها اما معرفناش منين تجيب فيه ...

_ ( حسب روحو مسمعهاش )..تكلم سوسن شنوة الي صار هنا في غيابي ...متخافش من حتى حد ... اما خاف مني كان تكذب عليا ...تكلم ...

_( شافت الأمها ... عينها كانت مكسورة و خايفة )... ممم ...منعرفش مشيت نطل عليها لقيتها في الحالة هاذيكة ...

_ ( الدم سطع لراسو جن وصل لمرحلة هستيريا جبد الي فوق الكوافوز كل جابو دشداش ... ) اش معناها ما تعرفش ...اش معناها ...

_ ( وقفت نجوى قدام بناتها خبتهم وراها ) قاتلك ما تعرفش .. برا اسأل الهاملة الي ماخذها علاش مدخل فينا غولة ... غريبة و الله ...

_ ( هز الفرد حطو بين عينيها )..اقسم بالله يا نجوى يظهر عندك حتى ظفر في الموضوع نخليك تتمنى الموت و متحصلهاش فهمت ...