العشق الاسود

29

تهوى على الكرسي ...جابلو لعرج كاس ماء ... ريحتو كلها شراب ... مش منجم حتى يهز راسو ...

_ وجيعتك و جيعة حب ...باين على وجهك ...ويني مرت ولدي علاش مهملاتك هكة ...تعاركتو ... 

_ علاه يا لعرج دنيا خايبة هكة ...علااااه ... مرت ولدك هي سبب وجيعتي و قهرتي ...نوقف قدامها ...نقول زعمة قاسمة معايا وجيعة قلبي و لا نتعذب وحدي ... علاه ..علاه ... ما تحسش بلمرارة الي سكنتني من نهار بعدها عني ... لا عارف لا نضحك و لا ناكل و لا نشرب كيف ناس ...يا لعرج كيف ما تعودش هيا هنا ( يشاور لقلبو )...اش باش نعمل بيه ... قلي اه ... اش نعمل بيه ...( يخبي في دموعو )... كل ما نقربلها يزيد لحبل يتكبس و نتخنق ... كنها مخلوقة باش تعذبني ..

_ ابكي ...دموع تغسل جروح و تذوب لوجيعة ... ابكي و ارتاح ... خلي قلبك يخرج وجيعته ...كل شي يتعدى ...خوذها نصيحة شايب دنيا طيحتله سنيه ... مرتك تحبك ...اما انتم بنيتو حيط بيناتكم ... كسروه تو ترتاحو ... عملوها لكبار ووحلو فيها صغار ... اسأل روحك شنوة ذنبها ... و شنوة ذنبك ...و أوزن بميزان الحب ... تو تعرف اش لازمك تعمل ...

_ خدعتني ... كانت جاية تنتقم مني ...جاية و هاسة سكين الغدر ورا ظهرها ... كرهت روحي خاطر غصبتها على العرس... كرهت روحي كل لحظة بكت فيها ... في لخر طلع كلو تمثيل ...

_ ايهم ... و انت وقت مشيت لصالح باش تنتقم ما مثلتش عليه ... علاه تعاقب فيها على ذنب انت بيدك عملتو ... المشكلة لا فيك لا فيها ...مشكلة في الوقت و ظروف الغالطة ...( حط ايدو على كتفو )..قوم روح ... احضنها كأيهم حبيبها مش ايهم الرصاوي ...تو جبل ثلج الي بيناتكم يذوب ... قوم ...بوحو بوجيعتكم لبعضكم منها تضمدو جراحكم و منها ترتاحو ...

روح حيط يهز و حيط يرد ... حل الباب و ترمى على سرير ... خرجت لقاتو ملوح بصباطو ... نحتهولو غطاتو و بقت تتفرج عليه ...تسمع فيه يتمتم بإسمها ...قلبها عصر عليها ... حست روحها تكره روحها ... هي الي وصلاتو للحالة ... عينها تعبت دموع ...قعدت جنبو ...تعدي في ايدها على شعرو...تذكرت كل لحظة عاشتها معاه ...تقول لروحها ... اول مرة تكره الوقت ...تمناتو يختفي ... بقت تسأل علاش يا مهرة ما تضميش دموعك و تخبيهم عندو اكيد يسامحك... هو يحبك ... خايفة تحكي تلقى الوقت فات ...بالك هاذا هو الوقت المناسب و انت مش حاسة...اذا قلبك ماهوش قد الوداع علاه ما تحكيش معاه..خايفة يكون مل منك مل من عركك و كسحيت راسك ... خايفة يكون كرهك و تطلع متعلقة بحبال ذايبة ...شنية مصيريك يا مهرة سؤال ذابت تلوجلو على جواب ... هزت ايدو تشوف للخوصة الي في صبعو ... تفكرت ليلتها شعلت فيها نار ...تفكرت كسرتها و ذلها ...تفكرت وجيعة قلبها .... جت باش تقوم جبدها لحضنو ...شمت ريحتو ارتاحت نفسيا ... حملاتو و غمضت عينيها ... اول ليلة من شهور ترقد مرتاحة ...

 الحلقة 67

 فاق صباح لقاها محملاتو كيف الانسان الي شاد في دنيا ... غطاها و قام دوش ولا...