العشق الاسود

p2😍

رج قدام الباب مدلها يدو ...

وقفت قدام الناس ... روبة مقطعة مسخة بدم ...ايد مربوطة بشوليقة و شعر كعكة ... وجه اصفر مزال عليه اثار لكحل السايل ... و عينين منفوخة بلبكاء ...

ناس كل مصدومين من العروسة كفاش منظرها ... لكن حتى حد مسترجي يتنفس بوجود ايهم ...قامت مرت عمو تزغرت و تحوت عليهم.... بطريقة مثيرة لشفقة ...ضرب الطبال و رجعت ناس ترقص شايخة كنو ماصار شي... بقت دايخة في امرها ... قداشهم ممثلين بارعين ... لدرجة تدمير حياة انسانة يستحق للاحتفال هاذا كل ... حاكمهم الخوف مساكن ولا يمكن عارفين اكثر منها قداشو انسان متوحش و ما فيش في قلبو رحمة اكا علاش بلعو سكين بدمها...بقت تتفرج على لوجوه بلكي تلقى باب مفتوح تلجألو ...تترجى فيه اي ذرة نخوة و شرف ... لكن يا حسرة ...كلهم قالب واحد ... بقى مخها يدي و يجيب شافت بوها و امها تعلقت عينيها فيهم ....حست بقلبها معفس تحت رجلين بوها الي يرقص فرحان مش عرس بنتو ...لا متغلطوش ...فرحان بشريكة الي كانت باش تمشي من ايديه و على خاطرها باع بنتو ...اما لميمة يا ناري على لميمة ...قلبها محروق على بنتها ... لكن طول عمرها شخصيتها باهته و ضعيفة .... الي يقولو مولى بيتها هو الي يمشي .... بقت مسهمة في المنظر الي قدامها ...تحس في روحها طالعة بشوي ... و نفس قاعد يضيق معاها ... جبدها ايهم باش تهبط متحركتش ...كبس على ايدعا وجعها ...فاقت من سبات العاطفي الي فيه ...هبطت تكر في روحها ... 

 دخل لعدول ...قعد ايهم و بجنبو مهرة ...طلع لعدول راسو ...

_ شبيها لعروس هكة ... ياخي مكش موافقة بنتي ... جاوبني ...( تلفت يسأل في مهرة الي عينيها مكفتش بكى )

_( هي جت باش تتكلم و دخل طاهر عم ايهم على الخط )...توا هاذا كلام ... مزود خدام و دار فرح و لعروسة مش موافقة هههه ...( مدلو لفة فلوس من تحت ناب ) ...اكتب يا سيدنا اكتب ...

تسمع في صوتهم بعيد.. قلبها يضرب بلقوي ... عينيها نشفت من دموع حتى دنيا ولت فلو ...لب عليها لعرق و خواطرها دارت ... "يا ربي في ليلة و نهار حياتي تتقلب ...ياربي عاوني ... منيش مصححة وخلي الي يصير يصير ...منيش مصححة "... كانت تكلم في روحها تحول تتشجع ... دايخة كنها في سرداب و لا في حفرة غارقة ....

_ بنتي صحح ... صحح يا عروسة ... 

حطلها ايهم لستيلو في يدها ... قداشو رزين ها لستيلو ... كراتو على دفتر بإيد ترعش ...وسيباتو باش يهبط جثة هامدة كيفها ... خلت ناس تهني و تبوس ... خرجت البرة ... مشت خطوتين...رجليها ثقلو ...دنيا دارت بيها ... طاحت ما في عينها بلة ...

خرج هزها ...كانت كيف لملاك الي طاح من سماء شعرها تفك و هبط كيف سحابة تحتها ...بقى يشوفلو حاير كيفاش الابيض كيف يتخلط بلسود يطلع مزيان لدرجة ...حل الباب برجلو ...لوحها على سرير.... كمية البراءة الي في ملامحها جمداتو ...بقى يتفرج عليها... جفونها تتكمش و ترجع كنها تعيش في معركة بينها و بين روحها ... مد ايدو بعد شعرها على وجهها ... نحالها شوليقة الي في ايدها و جاب نظفلها جرح و حطلها فاصمة نظيفة ... ثبت في صوابعها قداشهم رقاق و صغرونين ...مد ايدو باش يربط الفاصمة شافها موشمة في رصغها عبارة شداتو برشا ..." عِش حُرًا أو مُت و انتَ تحاول "... بقى يخمم ...زعمة قداش مرة باش تحاول تهرب من بين انيابو لين توصل انها مستحيل تخرج منو و من دوامتو ... بشرتها طرية احتضنت الحروف بحنية ... تمردها اعطاه شعور بنشوة ...خلاه يشعل رغبة تعدت ثواني و هو يبلع في ريقو و يتأمل فيها ...اغراتو بن براءتها و طفولة الي متخبية في كل ركن فيها ... قتل رغبتو فيسع ..هو انسان قاسي الدنيا علماتو يغطي على ضعفو بذكاء و حنكة ...هو سيد القوم الي لازمو مايرخفش ديمة كابس حتى على رغبتو الي خلقها ربي فيه ...هو كبير نجع و العيلة ... حد ما يخالفلو امر و حد مايطيحلو كلمة ...

الحلقة 3

اليوم كانت اول خطوة باش ياخو بطارو من الي دمرلو حياتو ... اليوم تبدى رحلة انتقامو من الي حرمو من اغلى حاجة يمكن انسان يفقدها ..غطاها و قعد على الكنبي الي مقابلها .. تفكر نهارت الي شافها اول مرة ... 

( فلاش باك )

داخل من البوابة يشوف في طفلة حاطة قدامها ارنب تلعب بيه ... حاطة كيت في وذنها مش حاسة بدنيا ... مستسلمة لشمس تداعب فيها ...دخل لقى صالح بوها يستنى فيه ...اول ما شافو تبسم ...وكفاش ما يتبسمش وهو باش يدمج شركتو المفلسة و يربح برشا فلوس ... ما حكتلكمش بوها يعشق ريحة صوردي ...يبيع روحو في خاطر زوز فرنك ... دخل ايهم و عمو وراه ...حط رجل على رجل يترشف في القهوة ...

_ ايه يا سي صالح ...اش قلت وافقت على دمج و لا ... ( يشوفلو على جنب خاطر متأكد باش يوافق )

_ بطبيعة تو الواحد يرفض عرض من شركة ناجحة كيفكم ... اما فما حكاية مفهمتهاش ... شنية حكاية دم الي قالي عليها المحامي ...( يتسكبن و يترهدن كيف القطوس المخنوق )

_ احنا معروفين ما نخدمو كان مع العايلة منحبوش البراني ... يعني ما يوقع دمج الا ما عيلاتنا تتوحد تولي منا و فينا ... اش قلت ...( هبط رجلو و تلفت العمو يضحك)

_ ايه تتوحد اش بيه اما ايهم ولدي مزلت ما فهمتش الحق... ( قلبو ما قايلو خير اما هو عازم يعمل المستحيل باش ها صفقة تمشي )

_ ( تكلم عمو )..تعطينا بنتك لأيهم ولدنا ... و هكاكة نولو ايد وحدة ...انساب و شركة اش قلت سي صالح ...ظاهرلي عرض مستحيل تلقى خير منو ....

_ بصراحة بنتي مزالت مش تخمم في العرس توا ...و اوو ...بصراحة اكثر فمة شكون متكلم عليها ( يتمتم خايف )... صعيب مش صعيب مستحيل توافق ....

_ يا سي صالح راك ولد اصول ..من وقتاش بناتنا يحكمو فينا ...ولا العيشة في لبلاد نساتك عاداتنا ...احنا كيف جينا لدارك قصدنا دار كبيرة و عارفين جدودك كانو كبارات نجع ...( تكلم الطاهر )

_ ايه اما الوقت تبدل يا سي طاهر ..ووو  

_ اكهو مالة وفى لكلام قوم عمي ... معادش عنا منعملو هنا ( قص ايهم على صالح .. حط فنجال وقف ) نشاء الله معرفة طيبة سي صالح و ربي يوفقك و تنجم تعاود ترجع المعمل و شركة على رجليهم ... 

_ ( مزال ما فاتش الباب نادى عليه )...ستنو يا جماعة لكلام راهو اخذ و رد ...و مانيش باش نلقى خير منكم لبنتي ... ايا مبروك علينا ... مد ايدو لايهم الي كان متأكد انو باش يوافق ...نظرتو في ناس متخيبش و كان عارف ماء صالح وين يصب عرف كفاش يدخلو ...عارف بلي هو ممكن يخسر بنتو عادي المهم شريكتو توقف على رجليها ..

صالح ما خيبش ايهم في مخو لقلوس و كهو و الباقي مل وسائل لراحتو ...حتى كبدتو الي معندوش غيرها ...محسوب ماهي في لخر باش تعرس نزار و لا ايهم شنوة الفرق كلو واحد ...المهم مستواه الاجتماعي و ايهم كبير منطقة الي يسكن فيها و املاك عايلتو ما تتعدش يعني باش تكوم صفقة رابحة الف بلمية ...