العشق الاسود

p22

سميح رفن باب الكرهبة جايب سوسن يكركر فيها وراه ... الطفلة كانت تبكي و تشغنف في حالة ... حتى من صوتها باح ...دخل رماها قدامهم و مشى ...اول ما شافتها نجوى نقزت عليها تضرب فيها بلكف... 

_ وطيتي راسنا يا ق***" يا هاملة ... ايه يا ملهط وينو العامل الي هربتي على خاطرو ...شبيه محزش عليك ... اه ...حلي فمك ... هانا هز غرضو منك و رماك كيف كلبة ..

_ سيبيني ...تو عاملة روحك ام ...تو وليتي تعرفي تنصحي ... انا معملتش لحرام ... عرست فهمت و لا عرست ... الي رميتوه في الحبس راجلي ...راااااااجلي ... ( تضرب في خدودها وتبكي )

_ شكون عاونك باش تهرب من هنا تكلم لا ننحرك الليلة الكلبة ... شكون ... العقرب الي فوق مش هكة ... تي حل فمك لا نعفس على رقبتك نطلع روحك ... ( شادة شعرها و مطلعة راسها ليها )

_ خير منك ...خبر منكم كل ...حست بيا ووقفت معايا كنها اختي ...مسحت دموعي و عملت معايا الي معملتيشي انت ... مهرة عاونتني و عاونت سماح ترجع ولدها خاطرها انسانه مش كيفك ... ( وقفت تدهشر خارجة )

_ وين ماشية يا بنت الكلب ايجي هنا ...

_ ماشية لراجلي و مخليتهالك مخضرة ... و قيس واحد منكم يلمسني و لا يعرضلي ... اصلا انا ميشرفنيش يكون عندي والدين كيفكم ... 

_ تي شبيك ساكت يا طاهر ...تي تكلم قول حاجة ... ( مشتلو متحزمه )... بنتك راجعة لهاك جيعان ... بنتك مخلية الدار و راجعة تعيش في هاك العشة ... ( تضرب في افخاذها)

_( وقف عينيه مرغرغة مهرة فيقاتو على وضعو ... فيقت الانسان الي فيه )..برا بنتي ... تو تلقى راجلك يستنى فيك في داركم و سامحني ( قدم لسوسن حضنهاو باس راسها )...كيف تتريقل امورك قول راجلك يجي يتعشى حذانا خلي نعرفوه ...و انت يا سماح من غدوة نقيد ولدك بإسمي ارجع اقرى عيش بنتي و عيش حياتك كيف اندادك ... ( حضن بناتو دموعو على خدو ...نجوى تشوفلو حساتو متبدل من وقت حكى مع مهرة )

ايهم كان واقف يتفرج على الي صار كل ... فكرة انو مهرة هي الي خلت بنات عمو يعملو الي يعملوه هبلاتو ...خلاتو يجن في مخو ... طلع دروج يجري ... عينيه تقدح نار ... دز عليها الباب لقاها راقدة ...

_ فيق ...فيق ...البس باش نخرجو ...( جبد عليها لغطى )

_ ( في بالها عرف لحكاية )... وين على خير 

_ قتلك امشي *** من فم ساكت ... هاني سابقك للكرهبة...( رفن الباب و خرج )

طريق كامل وهو ساكت كان فكو يمشي و يجي ... كل شوية يدور لمهرة يحرقها بعينيه ... هي كانت ترعش ... تألف في مخها الف سيناريو تحكيه باش تبرر كل شي ...

اش باش تقلو اتا خططت كل شي ... بعثتلكم الدليل الي يدخل صالح للحبس و انا الي رسمتلك الخطة و انت مشيت عليها ... عشت معاك في دور الضحية و انا المجرمة ...اقلو انها كانت جاية و ناوية تسمم بوه و تسممو ...اش باش تحكي ...اش باش تقول ...تخبت ورا الدموع ... واستخدمت حقها في صمت ... صمت موجع صمت مهلك ... صمت قاتل ...