العشق الاسود

26

عندها جمعة متقلقة كرشها توجع فيها ... خواطرها دايرة ترد و تجي على راسها ... ايهم عندو مدة زادة مطلعلهاش كيف العفريت ...

خرجت من توالات مصدومة ...شادة تاست ... عينها محلولة تثبت و تعاود ...

_ ااااه يا ربي شلطتين ... ااااه يعني انا حبلة تو ... حاجة من ايهم فيا ...عايشة معايا عندها شهر و انا منيش عارفة ... ( وقفت تجري وقفت قدام لمرايا )حاطة ايدها على كرشها خذت موعد لبست و خرجت تجري باش تتأكد...

روحت مهيش مصدقة بلي هي باش تولي ام ... توقف قدام لمرايا تحط مخدة تحت روبة و تشد ظهرها ... تغطي وجها من الفرحة ... تضحك من قلبها ... حاسة روحها مغسولة من داخل ...صافية ...احساس عمرها مة حساتو ...حاجة جديدة على قلبها ... عدت باقي نهار تخمم كفاش باش تقول لأيهم ...

كتبت مساج و فسخاتو ...حابة تشوف وجههو و تقسم معاه فرحتو ... 

مشت للبوتيكات متع دبش صغار ... شرت روبة صغيرة و حطت تاست في وسط باكو ...و غلفتهم ... تمشي في الكرهبة و حالة "لبنية" متع كاضم الساهر ...تضحك و كل شوي تطل على كرشها ...لوحت باكو دخان من الشباك ...طول عمرها تحلم تجيب بنوته تشبه لبوها ... تولي درتها و تتعارك هي وياها على حضن ايهم ...تبسمت لمجرد الفكرة ... بقت تقول زعما ايهم كيف يعرف اش ممكن يعمل ... اكيد البيبي هاذا باش يصلح كل شي و يبني بينها و بينو جسر لآخر العمر 

مشت لبست روبة بيضة فينو علخر و حطت تاج ورد على راسها ... دخلت سألت رجب قالها مزال مجاش ... دخلت لبيتهم حطت شمع و ورد على شكل قلب ... و كتبت بلورد نحبك ... سمعت صوت خطوتو ... دخلت تخبت في بلكون شادة الباكو في ايدها .. عدت بينها و بين روحها لثلاثة حلت عينيها تشوف فيه ...معنق وحدة و يبوس فيها..دمعتها هبطت من غير ما تحس ... حست كنها تفتفت تحلولت لحجرة ... 

_ حبيبي انت حضرت هاذا كلو ليا انا ( كانت طفلة كلاس ... مزيانه ..صفاتها عكس مهرة ..بلندة عينيها واسعين زرق... طويلة )  

_ ( عارف بلي مهرة في لبيت رجب قالو ).. ان شاء الله تعجبك سوربريز ... ( هبط على ركبة و نص خرج خاتم ... خرجت روح مهرة معاه ...)تقبلي تكمل معايا عمرك ... 

_ اي يا روحي نقبل ..نقبببببل ...( حضناتو و باساتو)

لبسها الخاتم و حط حبل الاعدام على رقبة مهرة جبدو و خلاها تصارع في الموت وحدها ... 

 جبدها لسرير و نحالها روبة و هي حاطة ايدها على فمها خايفة لا يسمعو شهقتها ... كانت واقفة وسط نار كل ما يطيب جلدها و يطيح يعاود ايهم يشعل فيها نار اقوى و احر ... تسمع في صوتهم يجلد فيها لين ظهرها دمدم ... وتحنى ...

حستهم رقدت خرجت تتسحب ... هبطت دروج تجري ... حاسة مع كل خطوة قطعة منها طيح ... وصلت لباب نادى عليها ...

_ مهرررة بنت الطاهر الرصاوي ( واقف في دروج )

_( ايدها هبطت مع كوبة الباب ... عرف لحقيقة و هاذي طريقة عقابو ليها دارتلو ساكته )...