العشق الاسود

p15

شدها بسياسة حطها في البانو ... صبلها شمبو على شعرها كان الماء هابط على وجهها و عينيها ... رموشها المبلولة و عينيها الحمرة ترسمو في جواجيه كيف لوشم ...هي كانت محضنه رجليها تشوفلو مسهمة في حركاتو ... كل لمسة منو تنبت معاها في قلب مهرة ورد و قرنفل ... تخليه يخضار و يحي من جديد ... لمستو كانت داء و دواء ...تحيها و تقتلها ... خرج خلاها تغسل بدنها ... سكر الباب و تكى عليه يرد في نفس ... حس ريقو شاح ... مشى يجري للفريجيدار خرج دبوزة ماء صبها على راسو و شعرو بالك يطفى و تبرد النار الي تاكل فيه ... تكى على كنتوار منظرها يدور في ذاكرتو كيما الاعصار ممخلي شي بلاصتو ... بعثرو و شتت مشاعرو ...

سمعها خرجت هز منشفة ...قعدها قدامها نشفلها شعرها ... قصلها اظفارها ... حس رجليها باردة لبسها قلاصد غطاها جاء ماشي شدتلو ايدو ... 

_ متخلنيش وحدي امان خايفة ... خايفة من روحي ... ايهم تعبت و الله تعبت ...( دخل جنبها للفرش من فم ساكت )

 هبطت دمعة سخونه من غير لا يشعر هبط حط عليها شفايفو ... قربتلو مهرة و قربتلو وجها ...خدودها كانت حمرة ... حط ايدو على ظهرها و زاد لزها ليه ... 

_ ما تخافش مهرة انا معاك ...نعس حتى على احلامك ... ومانخلي حتى شي يوجعك ...حتى لو كان مجرد كابوس ...

مزال مكملش كلامو حطت شفايفها على شفايفو ... ذاب من طعمهم و طراوتهم ... حس نفس تقطع عليه ... غطس مع كرومتها ... تسمع في انفاسو خارجة كلها رغبة ... مدت ايدها لجيبو و خرجت شكارة من غير ما يحس ... بعدت وجها عليه ... 

_ عيشك ايهم ...حاسة روحي احسن تو ... تصبح على خير ...

_ (جبد روحو من عندها بسيف كيف الجمرة الي اول ما شعلت صبو عليها الماء ووجعهوها حولوها لفحمة ...) تص ...تصبح على خير ... 

 طفى ضو و خرج ...حاط ايدو على قلبو كان حاسو ينخز فيه وجعو انها استعملاتو باش توصل لشكارة لكن في نفس الوقت فرحان خاطر قرب منها حتى لو لثواني كهو ...وقف على وجهو ضحكة خبيثة ... يستنى يسمعها تتحرك ... فجأة صوتها على ...

_ الله يلعنك يا ايهم ...الله يلعنك ... نكرههههههك ...نكرهههههك يا واطي ... يا حقير يا زبلة ... نكرهههك ... 

دخلت نجوى هازة تلفون تبربش فيه ... قعدت بجنب الطاهر ...شدت تحت وذنو ...

_ اسمع ها المهرة طلعت بو سبع رواح ... غدوة نحبك غدوة طلع ايهم من بحذاها بأي طريقة ...تصرف المهم بعدو ...( تكت على كتفو )

_ علاه و انت عرفتيهم وين اصلا ..( يبدل في تلفزة )

_ هاذا كلام نجوى راني ...( حطت تلفون )...ولد خوك في الدار الي في عين دراهم ... يستجم هو و اللفعة متاعو ...

_ والله لا لفعة كان انتي في هادنيا ( يتمتم و يحسبن عليها 

_ قلت حاجة اااطاهر ...سمعني ...هذاكة فاش شاطر حاصل ... تمشيش ما تقدش روحك ...و تفشلني ماني عرفاتك ...