العشق الاسود

p10

دخلو لسبيطار يجرو ...حطوه على نقالة ...عينيه كانت مرشوقة فيها ما هبطتش ... خرج طبيب طمنها عليه دخلت تجري للبيت لقاتو مزال تحت تأثير البنج ...دنيا ضوت و هو مزال راقد روحت بدلت دبشها و جابتلو دبش نظيف هي خارجة و قابلها الطاهر 

_ وين ماشية على صباح ربي ... راجلك وينو زادة مبانش من البارح ... ( يهز فيها و يحط )

_ فمة اختراع اسمو تلفون كلمو تو يجاوبك اوك ( خلاتو و خرجت )

 دخلت بشوي للبيت لقاتو مزال راقد ...من تعب رقدت على الكرسي ...حل عينيه قابلاتو منظرها يسخف ... ايديها مزالت بدم ...ووجها تاعب 

 حست بإيد على كتفها ...حلت عينيها لقاتو واقف قدامها ...

_ ايهم لاباس ( تتكلم ملهوفة عليه ) 

_ انا لاباس برا اغسل ايدك و ايجى نروحو ... خسارة معرفتش تقمر مليح ...( واقف قدامها شاد جرح )

_ منين تجيب في ها البرود هاذا كل ...اه ...منين تجيب فيه ... ( خلاتو واقف و خرجت لتوالات تغسل في ايدها ) 

خرجت متهالكة تاعبة نفسيا اكثر منها جسديا ...لقاتو يستنى بجنب الكرهبة ركبت بفم ساكت ...كان عينيها تهز و تحط ... 

_ شبيه لسانك كلاه القط ... من شوي كنت قريب تقتلني ... تو هبط عليك لعقل ... ( على وجهو نفس الضحكة الي تمقتها) 

_ ( تكت على شباك دموعها هازها لهوى معاه) ما عيني في كلام ...وينو رجب ... 

_ روح و قتلو ما يحكي لحد ...جيعانه ؟؟...

_ ( دارت تشوفلو مستغربه) يا خي قداش تاخذ الامور بساطة شوفلي انا الي من شوي حاولت نقتلك و انت الي حاولت تغتصبني ...ريحة دمك مزالت على ايدي و انت تسأل اذا كنت جيعانه ... لدرجة الموت و الحياة حاجة تافهة بنسبة ليك ...

_ ما يقص الراس كان ربي ... و اذا مكتوبلي نموت على ايدك فأكيد باش نموت وقت اجلي يحين ... ( غمزها كنو يستفز فيها )

_ هكاكة متخافش عمر لكلاب طويل ...درا بأي وجه باش تقابل ربي ...و انت من ساسك لراسك غاطس في الوسخ ...( تشوفلو بغل ...لو للحظة تمنت انها قتلاتو بلحق وقتها على الاقل كانت خرجت من ها الكابوس )

_ بنفس الوجه الي انت باش تقابلو بيه ... كل واحد فينا نصين شيطان و ملايكة ..تبقى انت لشكون تعطي فولون باش يسوق ... كل واحد شيطانو في جيبو يا مرتي ...( قاصد يناديلها مرتي خاطر عارف الكلمه هاذي تجننها) 

 _ خلي نمشو ناكلو خير بالك فمك يتعبى و تسكرو علينا خاطر دور الواعض مايطلعش عليك ...( شدت تلفون تبربش فيه ..)...وعلى فكرة انا عمري ما نولي كيفك ...حاول قد ما تحب تلوني بلونك ... انا مستحيل نولي كيفك ... 

_ تتكلم بثيقة كبيرة ... اما لوجوه برشا و تو يظهر شكون فينا ملايكة و شكون شيطان ... تحكي مع صاحبتك الشَمَامهْ و لا حبيبك الطحان ...( يقحرلها عينيه قريب تنقز على تلفون ..)