العشق الاسود

p7

خرجت لبست و شيحت شعرها ...حست روحها مخنوقة ...هبطت حبت تتمشى شوي و تشم لهوى ... شافت نجوى و كنتها قاعدين ...طفتهم و تعدت مزالت مبدلتش خطوة البرة سمعت صوت نجوى جاي وراها ...

_ اييييه يعطي الفول للي بلا زروس ... ايهم لنڨر الي يقلك ... ياخذ وحدة هكة ... لا تعرف لا في تربيه لا في الاصول ...( تشوف لكنتها و تصحك )

_ اش تنفع تربية في قليل تربية و فاش تفيد لاصول مع قليل شرف ( رجعتلها و ناوية تخرج همها كل فيها )...ايهم متاعكم بلوه و اشربوه ...انا لايشرفني نسبكم و لا ماخضتكم و كان نسيتي كفاش جبتوني هنا تو نفكرك ...يجي نهار و نحشيكم كل في الحبس كللللللل... اولكم كبيركم ...

_ ( فزعت الكنه لحماتها )... انت باين عليك فرس مسيب ماينجمك حد ... كان تمشي تستر ما ستر ربي خيرلك ...

_ علاه خايفة راجلك يشوف بدني و زيني يعافك و يبدلك ... لم روحك خيرلك ... حلوة هاذي ... حتى البق عمل لسان ولى يحكي ...

سكتو قلش عليهم كلام مهرة جاهم على جرح... ما لقو ما يجاوبو ... تحلفت نجوى لا تعرف مهرة قدرها و ترجعها تمرد تحتها و قامت تجري لراجلها 

_( دخلت على رجلها تمثل انها تبكي )...شفت اخرت عمري وحدة قد بنت بنتي تسبلي اصلي و تقلي ماربوكش ... في كبري وليت نسمع في لكلام ...كان ماخذتليش حقي و الله ما نقعدلك فيها فهمت و لا ...

_ ( كلام مرتو كبسو ... )شكون الي قالك ها لكلام و لا من وقتاش انت يرجعو عليك كلمة في ها الدار ... 

_ ( ترمت في حضنو ) هاو..جا ااا طاهر نهار الي وليت نسمع فيه وسخ وذنيا من فرخة قد بنت بنتي ... مرت ايهم مسحت بيا القاعة ... كان ما تخذليش حقي باش نبقى طول عمري محقورة ...( دموع تماسيح هابطة تسكسك )

 خرج رجليه اعلى من راسو ...كشاكشو طالعة ... اول ما شاف مهرة قاعدة نقز قدامها ...

_ اسمع ابنت صالح ... دخلتي هنا بلمعروف ... قدري روحك و لم لسانك ...

_ ( نقزت جت واقفة )...اول شي بنت صالح عندها اسم ...مهرة ...سمعت و كان معرفتش تهجيه قلي ...تو نعلمك ...ثانيا انا مدخلتش هنا بلمعروف ...دخلت بصلبطة و القوة ...دخلت مرغومة ... تعرف لاش خاطركم كمشة مجرمة ... ثالثا مرتك هي الي تحل في فمها و كان مستني نطبسلكم راسي راك غالط برشا ... اخيرا ...بعد من قدامي خلي نشوف وجه ربي ...( تهز فيه و تحط ...سنيها تتصكك من لعصب )

_ ( كلامها نرفزو و هانو ...خاطر عارفها تحكي في الحق ...) ... المفروض تبوس ايدك وجه و ظهر خاطر رضينا بيك هنا ... لكن اللوم مش عليك على الي جابك ...كانك عليا دبوزة ايسونس تحكم فيكم كل ...

_ هاذا اخركم ...وتفكيركم وين يوصلكم ...يا ربي قداش مزلت باش نشوف من وسخكم ... مستغربة كفاش الارض مزالت ما تخسفتش بيكم ...كفاش متحملتكم فوقها ..( طفاتو و رجعت قعدت )