العشق الاسود

p9

ملي حلت عينيها و هي تستفرغ و تجي على راسها ... وجها اصفر و شفايفها شايحة ... حل الباب لقاها مرمية جنب سرير شادة كرشها ...

_(ارمى قدامها صاشي دوا ...) قوم اشرب من هاذا تو تتفرهد ...مدلها كاس ماء ... 

_ راسي باش يتكسر يا ميمتي ...( تعكزت ووقفت )

_ تستاهل ... انت الي عملتو بروحك تو متحلش فمك ...( كيف طيف لا تعرفو وقتاش يدخل و لا وقتاش يخرج )

حلت الباكو لوجت فيه باش تقرى قداش تاكل كعبة ...ملقتش ... وقفت و خرجت وراه باش تسألو ... شفاتو دخل لصالة لحقاتو ...

_ ( عمو حط رجل على رجل )... ايا مناش باش نشوفو خدمتنا ... صالح شد الحبس و بنتو ملوحة الفوق ... طالت و لا قصرت كل فرنك عندو باش يولي تحت ايدنا ...ايا نفيقو عاد و نرجعو نخدمو ...( شعل سيقارو لوح عينو يشوف في شعر مهرة باين من ورا الحيط ) ...اما فكرت انتقامك من صالح هاذي تستاهل عليها اوسكار ... يا ولد خويا الغالي ...ههههه

_ شبيك وليت تاكل برشا ضو ... حديثك كلو تهذريب ... ستنى حتى يحكمو عليه و بعد يعمل ربي ... ( متعدي للباب ) 

حطت ايدها على فمها باش ما يسمعوش صوتها ...طلعت للبيت تكر في روحها ...مشوية و موجوعة ... متقززة من كل شي داير بيها ... حاسة نفسها واحل في حلقها ... بدنها يرجف ... و سنيها تتصكك في بعضها ... مهيش منجمة تستوعب و لا تهضم الي سمعاتو ... بقت نهار كامل مريضة ... عاجزة عن الحياة ...كنو كل ما القدر يشوفها بدت تلم شتاتها يبعثلها عاصفة تزيد تبعثرها فاقت على صوت تلفون ... 

_ الو ..نزار ... ( صوتها بنوم)

_ مهرة نحبك انا منجمش نعيش من غيرك ... و الله نحبك ...هاني جيتك ... هاني في المحطة انت وين تسكن ... ( باين من كلامو شارب )   

_ نزار روح لداركم ...كان تحبني برا من هنا ... منحبش نضرك امشي ... ( قعدت فوق سرير )

  كان يسمع ايهم يقتلك و الله ...برا الله يخليك ... نزار ما تشونيش عليك الي فيا مكفيني ...

_ ما يهمنيش خلي يقتل طزززز ... ستني تو نسأل عمي راجل... ( تسمع فيه يصيح و يسب ) 

_ اشششش ...اسمع خوذ تكسي احكيلهم ايهم تو يجيبوك ... ما تدخلش ستناني عند البوابة تو نهبطلك ...( قامت تبدل في دبشها )

هبطت تمشي بين الشجر ... من زهرها لقت رجال دخلو يتعشو ... تسرسبت البرة بعدت على البوابة و بقت تشوف لطريق ...

هبط نزار يترامى شاد في باب تكسي ... لقفاتو ...وقفاتو ...

_ مهرتي ...حبيبتي ( ترمى عليها بكلو حملها )...علاه تاخو غيري ...مش كنا متفاهمين و محلانا ...عللللاه قلي ..نحبك انا و الله... فاش غلطت معاك حتى تعاقبني بطريقة القاسية ...

_ نزار فيق و اسمع مليح الي باش نحكيه ( شادة البكية بسيف )لازمك تنساني ... انسى انك عرفتني ....( تمسح دمعة غلبتها ) ... الله غالب مكتوب ... انا ساي عشت حياتي انت زادة عيش حياتك ...انساني ...اعمل دار و صغار ...