العشق الاسود

23

قامت الصباح راسها يوجع فيها ... قامت تلوج على حاجة تلبسها ... و بطريقة ما لقت روحها لبست حاجة لا مكبوسة و لا محلولة لا من فوق و لا من لوطة ...جا ايهم بين عينيها ... حاسة روحها متوحشاتو من توا ... قعدت تشوف لسوليتير الي في ايدها تسأل فيه مدامك بديت كذبة علاش تحولت لحقيقة ... لمت شتاتها ... هملت الشريكة برشا ... و حملت وائل فوق من طاقتو ... لازمها ترجع تخدم و تحاول ترمم حياتها ...

وقفت تغطي في وجيعتها بشوي مكياج ... حلت شعرها ...شمت ريحتو فيه زربت لماتو لبست جاكيت و خرجت .... تسوق عينيها هايمة ...لقت روحها قدام دارو ... هبطت على فولون تبكي ... شافها رجب جاها ...حل باب و ركب 

_ عسلامة مدام ... وين مشيين ...( في بالو كيما قبل لكن شي ما بقى كيما قبل )

_ ( تبسمت بوجيعة ) مسلسل الاكسيون وفى يا رجب ... باش نطلب منك حاجة ... رد بالك عليه ... الذيوبة دايرين بيه من كل جيهة و هو وحدو ... رقمك عندي كيف تستحق كلمني ...( هبط رجب تعدت تجري ) 

_ (ايهم خارج من البوابة ) ... كيف تخرج نحوى ***** و راجلها كلمني ...

_ سي ايهم المدام كانت هنا و تعدت تو ....

مزال مكملش رجب كلامو تعدى وراها ...شاف كرهبتها قص عليها طريق ... وقفت تتفرج عليه ... تحاول تخبي دموعها ... هبط وقف قدام الكابوت و لا يضرب فيه ... 

_اخرررج... ( راشق ايديه و يشوفلها... ) 

_ اش تحب ... اش تحب شبيك ... ( رفنت الباب و خرجت )

_ علاش جيت ... اش مجيبك لثنيتي مرة اخرى ... تكلم ... جيت تطمن على ايهم لمدمر ... تهنى منهنيكش بيه نهار هذاكة انا من اليوم باش نولي شوكة في حلقك و انتقامي الي مخذيتوش في جرتك باش نكملو ...مش قلتي انا اسود ... انا ظلام ...حضر روحم خاطر من اليوم معادش باش تشوف شمس جملة يا مهرة ( قلبو من داخل مدمدم و روحو تنازع لكن ملامحو كيف ثلج جامدة ) ...

_ انا اصلا عيشتي كلها ظلام بالك ظلامك خير من ظلامهم ( تحكي في قلبها )... قلت الي عندك نجم نمشي تو. .. 

_ لا ... جاوبني ساعة علاش جيت اش تحب ...( وقف قدامها )

_ انا اصلا معادش حاجتي بحتى شي من عندك ... في بالي باش نهز دبشي ...فيباليش باش نشوف وجهك ... رتحت تو ... ( قدمت قربتلو بالك تشم ريحتو )...

_ عندك حق اصلا اش بقى باش تحتاجو ...برا لم دبشك متخلي حتى شي معادش نحب نشوف اي حاجة منك ...وقول لطفلة تحل بيت تتهوى باش حتى ريحتك تخرج ...( رجع للكرهبة مغصور )... يا ريتك تهزك مني زادة بالك نرتاح يا مهرة يا ريتك ...كنت مستعد نرمي روحي في نار على خاطرك اتاريتك انت النار و انا مافيباليش ...حرقتني خليتني رماد ...خليتني رماد يا مهرة ...

دخلت للبيت وقفت في الباب ... شافتها كيفاش سفيها عليها ... منظرها حكالها على ليلتو كفاش تعدت و روبتها الي متكية فوقها دبوزة قودتلها على وجيعتو و حرقتو ... هزت مريولو شمت ريحتو لين تقطع عليها نفس ... هي هكاكة و هو دخل ..زربت حشت مريولو في ساكها ... سكرت فاليز و جت خارجة ...