العشق الاسود

p6

غسلت سنيها و خارجة باش ترقد بدنها كلو يوجع فيها ...ماهيش عارفة كفاش باش تتصرف غدوة و تشوف نزار ...فجأة عينيها تحلت ...ايهم ممدود فوق سرير و رميلها مخدة و كوفيرتا على القاعة ... 

_ اش كنت متوقعة منك ... زعما باش تكون جنتلمان و تخليلي سرير مستحيل يطيح نصك كان تعملها ...سخط هاذا ...الهموم جامدة ... مستحيل تكون عبد ...ما تطلع كان شيطان ... خراا متع وذني ..( تفرش و تتكرم دجاج لكحل داير بيها ...)...سخط انت زادة اركحي ...اوووف ...( تتعارك هي و كوفيرتا)...

بقى يطل عليها من تحت لتحت يتبسم ... كل شي فيها غريب حتى كيف تغزل تولي حاجة هكة باردة على القلب ذوب فيه كيف نكتت لعسل ...

قامت صباح لقاتو مفماش ... دخلت دوشت و لبست و خرجت تجري تغتنم في الفرصة ... مزالت كيف طلت من الباب و رجال الي يعسو البرة كل جو قدامها ....

_ مدام ممنوع تخرجي وحدك ... هاذي اوامر سي ايهم ...( رجب واقف قدامها )

_ بوكم على بوه ايهم متاعكم على بو المدام اااصباح بعد من وجهي خيرلك ... بعد قتلك (مضيقة عينيها ... دز فيه و هو كيف الحجرة باينه نملة قدام جهامتو)

_ مدام ممنوع ... تعملناش مشاكل مع سي ايهم ...( عرفتوه الرجل الغامض بسلامته هكاكة بضبط كلام بلحساب واقف متمسمر كان نفس )

_ ( بدت تفد ...تمشي و تجي قدامهم تاكل في اظافيرها )....هات لخرا نكلمو في تلفون هات ... وهف يهزكم انتم وياه في نهار واحد قول امين ...( بقت تستنى في ايهم يجاوب )... 

_ شبيك رجب ..

_ منيش رجب انا مهرة نحب نمشي عند ماما و ها نطع ناتن الي عندك قالي لا. .. ماما مريضة ووحدها ...

_ اعطي تلفون لرجب ...

 _ شنية اعطي تلفون لرجب ...قتلك ماما مريضة شبيك طرشت ولى عقلك معادش مستوعب ... ( تصيح كشاكشها طالعة )

_ اصبح ها صباح و مد رب تلفون لرجب صاح فجعها مدت تلفون بساكته و بقت تستنى ...لقاتو حللها باب كرهبة و ركب بجنبها ... من الغزول حدفاتو بلبوش متاعها ...شدو و قعد ساكت يستنى من غيى حتى ردت فعل زادت غزلت ...

وصلت لدار ... هبطت من الكرهبة هبط معاها...قحرتلو و دخلت ... لحقها ساكت حملت امها و باستها ... بقت حضنتها و تشم في ريحتها ... 

_ بنيتي شكونو ها جهامة اللطف ( تشوف لرجب باهته فيه )

_ الكلب متع صيد بو قلاده ... طفيه امي معلكش فيه ايجي نقلك 

وشوشتها و فهمتها لحكاية ..تفاهمو تهربها من باب كوجينه ..حسبت روحها داخلة لتوالات لقاتو في جرتها 

_ اووووه اووووه ...تدخل معايا لتوالات ...لاباس ... يعجبكشي تو ...( هزاتو و حطاتو و دخلت )

حسبت امها روحها طاحت ...مشالها يجري يقوم فيها تسحبت مهرة للكوجينه و خرجت ...حملت ساكها و تعدت تجري لين وصلت لطريق رئيسي هزت تكسي و مشت ...