حب مابعد الكره

الفصل الثالث عشر

صفا.. احمد عليك الله والله مجاوبه ليش راسبة
احمد.. يابه هاي بعد رسبتي
ضليت ابجي ممصدكه ليش راسبة واني قارية ومجاوبة
ضحك احمد وكال..
احمد.. شبيج مو مال واحد يتشاقه وياج على اقل شي تبجين يابه ناجحة ومعدلج ٨٩
صفا.. هو كال هيج لو مدري شصار بيه اضحك وابجي وخالتي وزهراء يهلهلن وأية تصفك اجه علي ومحمد والحجي وهم فرحانين مانمت من الفرحة بس يا فرحة ماتمت على خير...

مر شهر تقريبا زهراء حتدخل بشهر الخامس اهلي صار هواي مشايفتهم مرات احجي ويا ماما ومروة مشتاقتلها علاقتي بمحمد عادية لاعبالك هو زوجي ولا اني مرتة بين الدوام والبيت اية يوم عن يوم يزيد حبها لعباس وتبجي ليل ونهار وخايفة لا أبوها يزوجها وهي ممعترفه لعباس أوضاع العراق بدت تتدهور ...

بيوم اجو يمه بيت عمو وعمتي علمود بنت عمتي الجبيرة اجو يخطبونها ف الناس التمت عدنا خطية جانت امها وهي طايرات من الفرحة لان عمرها ٢٠ وعبالها بعد محد يزوجها عود جبيرة متعرف هي بداية عمرها
وجان البيت هوسه بس اية ميتة من الفرحة عبالك خطبتها لان اهل عباس موجودين يمنه....

كملت الهوسه وطلبوا الناس سهى ومشيتها بعد ثلث ايام لليل هدأ البيت ورا العشا كلنا كاعدين مجتمعين بيت عمتي وعمي... وجان الحجي يكول

الشيخ.. خويه حضري بنتج رايدينها
كلنا عبالنه على سهى يقصد بس..
عمتي.. اي خويه انشالله الله يتممها على خير
الشيخ.. اني ما اقصد سهى اقصد سرى رايدها لمحمد ...

كلنا انصدمنا من حجيه لمحمد واني طرطور يم محمد
عمتي.. والله خويه فاجأتني ليش محمد مو متزوج ماصارله هواي
الشيخ.. اي اعرف بس لحد هسه مرته ماحبلت واني اريد اشوف احفادي كلهم قبل لا الله ياخذ امانتة وحتى احمد هالايام اريد اخابر علي واكله يستعجل اريد ازوج ابني اني

جان يحجي واني الحراره كامت تطلع من راسي احسها يعني عينك عينك كاعده يمه وهيج يحجي ومحمد ماكو من وحده يقرر اباوع الكل سكت لمحت سرى شاركه حلكها من النص لنص من زمان هي رايدته احسها اريد يمر الوكت ماكو وكف واني كاعده على أعصابي وكوه لازمه نفسي لا اكتلي حجايه...

مر الوكت بالاعجوبة وراحوا بسرعة صعدت لفوك وكعدت صافنة وحاطة ايدي على خدي المن احجي واكول... اجه محمد ذب نفسه على الفراش

صفا.. سمعت آخر خبر ؟
محمد.. يا خبر
صفا.. ابوك حيزوجك
محمد.. شنو!!! يزوجني
صفا.. اي حيزوك سرى
سكت ... واني هم سكتت مستغربة احجي بهدوء مو طبيعي كل الجان بالي اصيح بس ابد
صفا.. اذا تريد تتزوجها او لا براحتك بس اني اذا تزوجت لحظة مااضل بالبيت تزوج اليوم باجر نتطلك ..

درت وجهي ونمت كعدت الصبح الوضع هادئ بس خالتي ضايجة وعبالها زعلانه لان الحجي هيج حجه بس ابد طمنتها وارتاحت وتكولي مايزوج عليج على كص ركبتي ...
مرت الايام واجت المشيه وتمت على خير وحددوا شوكت يقرون الفاتحة وكص المهر بعد أسبوعين والحجي جان مصر على تزويج محمد اذا ماصار عدنا طفل هالفترة واني ساكتة ومتحملة هم زوجني غصب وهم يريد طفل غصب وهم يريد ينزل عليه ضره غضب ماعرف شنو من طينه طينته..