حب مابعد الكره

الجزء العاشر

محمد.. طول فترة الاربع الايام الراحت ماشفتها بس من رحنا للمحكمة ولسه ماشايفها ومنتظر هذا اليوم علمود اشوفها مشتاقلها دخلت وتلكني النسوان بالهلاهل والجكليت والضحكة وكلها فرحانة وجان اشوفها واكفه بنص الاستقبال واني روحي ردتلي من لمحتها اباوعلها  منبهر بجمالها وحسنها واحجي ويا روحي نظرة من عيونها انسى كلشي سوته تقربت ليها واني اشبع عيوني بيها جانت منزلة رأسها رفعته وباوعت بعيوني واني اشوف عيونها حمره  و وجها ذبلان من البجي ضجت و اني أردد بداخلي اوعدج ماخليج تبجين بعد بس جان الدمع محليها نطتني امي الحلقة واريد البسها بس جانت ماترفع ايدها امها جانت واكفه يمها وهي رفعت ايدها الها لبستها الحلقة وانطتها الحلقة امها عود تلبسني بس لازمتها وامي دخلتها باصبعي جنت البسها واباوعلها مانطت اي ردة فعل ولا ضحكت ولا حجت ملامحها هادية وبس تباوع لايدها الي بيها الحلقة كملت وبستها من رأسها وطلعت شكد جنت فرحان بس من شفتها هيج كرهت حتى روحي بس ماكرهتها...

صفا.. طلع واني رجعت كعدت واباوع على الحلقة وافكر هاي هيه صرت مرته شرعا وقانونا كلما افكر بالموضوع يزيد كرهي وحقدي تجاها كملت الحفلة ورحت للغرفة انزع بالذهب وابجي بدلت وأذن الأذان رحت صليت وبعدها نمت كعدتني امي من الصبح علمود نروح نختار البدلات ماحجيت شي لان مليت وحتلو احجي وياهم منا لبعد سنة ماراح يتغير شي استسلمت لواقعي وكمت وياهم هالمرة طلعت روحهم كل الي ندخلة ما يعجبني من ساعة ب٨ الصبح لحد ال١٢ اني بس افرفر بيهن وماختاريت شي رجعنا للبيت بدون بدلات وهم طلعنا العصر اختاريت بدلتين وحده لونها بيجي فاتح وبيها لمع شوية والثانية وردي كلش فاتح مبين لونها ابيض من فوك عادية ومن جوا كلها ورد ناعم جانن كلش نازكات واني احب هاي الالوان ماحب الالوان الفاقعة وبدلت العرس كالت خالتي الشيخ جايبها من الكويت قبل لاتجونه وضامها لعرسكم رجعنا ونمت لان جنت تعبانة ...

ثاني يوم كعدتني امي الصبح كالت كومي تريكي علمود نروح لصالون واني جنت كالبة خلقتي كمت بالكوه كملنا رحنا تقريب ب١١ اني وامي وزهراء خذانا علي دخلنا للصالون لزمتني ام الصالون تنظيف وتوخر شعر جسمي واني متفاجأة ومستحية ماحب احد يشوف جسمي تريد توخر شعر ايدي جان ناعم عافت كلشي يوخر الشعر وكعدت توخره الي بالخيط متت هلستني هلس كملت واجت لوجهي نوب تحفحف بيه وترجع رادت تحف حواجبي ماقبلت كلتلها بس الزوادات وخريهن كملت نوب اجت لشعري ماقبلت تسويله اي شي لان شعري كلش طويل ولونه جوزي وحلو بدون كلشي بس غسلته الي ومكيجتني هي تمكيج واني ابجي وترجع تمسح وتخلي وتمسح شلعت كلبها خلتلي مكياج رادت تطوخ واني ماقبلت لان المكياج يكبر مايصغر كلتلها شي خفيف ماريد طوخ خلتلي وكل ما تطوخ امسحه مادري متعمدة لو هو شغلها هيج كمت غسلت وجهي واجيت اني امكيج نفسي مكياج ابسط منه ماكو خليت ايلاينر جنه نسمي رميل وكحلة ومورد خدود وحمره لونها ترابي بس كلشي ماخليت بعد وامي وزهراء وهي متعجبات كلتلها سويلي شعري تسريحة بسيطة ماريد عالية كامت تسويلي وصافنه سوتلي شعري حلوه جانت لبست البدلة البيجي واباوع لنفسي بالمرايا الحمالة طالعة وعود امي اختارتلي نفس اللون وجانت صدك نشاز رحت نزعتها وصدري يوجعني حاولت ماهتم لبست البدلة وطلعت امي تصلي على النبي هي وزهراء واني اي فرحة بداخلي ماكو خابرت زهراء على علي اجه واسمع ام الصالون تحجي ويا صديقتها وتكول الله يساعد الي راح يتزوجها...