حب مابعد الكره

الجزء السادس عشر

طلعنا من العيادة واحنه صافنين بعد حجي الدكتور بس جان المرض حميد وكال يروح انشالله لاتخافون  بس نستئصل الورم وهذا هو و انشالله مابيج غير العافية... وجان بعد أسبوع العملية

صفا.. محمد نروح للمشتسفى لمروة
اباوعله صافن و وجه اصفر وخايف الي يشوفه يكول هو المريض

صفا.. محمد
محمد.. ها
صفا.. شبيك شو وجهك اصفر يمعود اذا خالتي شافت وجهك تموت عبالها اكو شي
محمد.. ليش هو ماكو شي انتي مريضة مريضة
صفا.. اي اعرف مريضة بس بهذا ولا غير شي
محمد.. اذا انتي ماخايفه على روحج اني خايف وحاسبلها الف حساب شلون اذا مارجعتيلي
صفا.. هاي بعد سنة الحياة اذا ما متت بمرض اموت بغير شي واني هسه اتمنى اموت بالكي اشوف امي وابوي
محمد.. واني منو الي اذا رحتي
صفا.. الي يسمعك يكول ماينام الا بحضنها محمد ترا اني ازوجتك غصب واني ما احبك وانت تعرف هالشي كلش زين بعد ليش تسوي هيج خاف عبالك من هذا حجيك اكوم احبك لا وهسه اني مريضة وماعرف اذا اطلع زينة من هالمرض لو لا وعندي استعداد اموت ولا اكولك احبك وحتا بالجذب ما اكول احبك لو جنت اتنفس آخر نفس وانت يمي هم ما اكولك حبيتك بفد يوم لو اكولك كلمة حلوه واطيب خاطرك قبل لا اروح ..

حجيت هيج وهو ساكت وبس يهز برأسه وصلنا للمستشفى وراح ماحجه شي رحت للغرفة و  اتفاجأت من شفت مروة كاعده وخالتي يمها الفرحة ماتنوصف هي شافتني وتضحك وتبجي رحت بسرعة وحضنتها وهي تبجي واني ابجي ..

مروة.. شلونج مشتاقتلج
صفا.. الحمدلله انتي شلونج يوجعج شي وشوكت كعدتي
مروة.. زينة مايوجعني شي قبل فترة واجه الدكتور متفاجأ من راحت خالتي عبالك صارلي شهر ماكاعده مو يوم مدري ساعات
صفا.. من كالت يوم صفنت وخالتي تباوعلي واني اباوعلها
مروة.. صدك ماما وبابا شلونهم هم متكسرين (بضحك)
صفا.. هنا انصعقت من سألت وماعرف شنو اجاوبها والدمعة من وحدها نزلت
خالتي.. حبيبتي هسه ارتاحي و بعدين نسولف

صدك سكتت ماكالت شي من شافتني بجيت نوب الدموع اريدها توكف ماكو عبالك هستوني عرفت اهلي ماكو بعد كمت اشهك ماكدر احبس دموعي ومنا خالتي ومنا هي تسأل والأفكار كلها التمت عليه من موت اهلي لحد ماعرفت بمرضي وحجي محمد... ما اكدر بعد اوكف دموعي ونوب خالتي زودتها من كامت تبجي وتمسح دموعها بشيلتها عود متريدنه نشوفها بس هي ماتعرف صوت بجيتها شلون ينسمع...

مروة.. شبيكم ؟ اهلي بيهم شي ليش دتبجون
خالتي.. لا ماكو شي ارتاحي انتي
مروة.. لعد ليش صفا دتبجي
خالتي.. فرحانة لا كعدتي
مروة.. ترا مابيه شي وين ماما
خالتي.. بالغرفة الي بصفنا
مروة.. ليش متجي؟
خالتي.. جانت سهرانه وياج وتعبت قبل شويه نامت خطية
مروة.. وابوي؟
خالتي.. راح هو وعمج للبيت
مروة.. يعني ممتأذي ؟
خالتي.. لا مابي شي ....

صفا.. جنت اسمع الحجي وصافنه وحايره شنو نكوللها وفكرة انو اروح واتركها هسه خوفتني اكثر منو الها اذا متت الحجي ثاني يوم يزوجها...