(ضيغم الغاب)..

Part 18

ورجعت الكم بقصة(ضيغم الغاب)..

#الكاتبة_نمارق_الاسدي

#الكاتبة_N

لم تكن اول حبٌ..
بل كنت اول حياة..

#مقتبس

____________________________________

Part 18

ميان: مره من المرات طخت براسي وملت الا اطلع بالفرسه الجامحه الي عدنا.. هاي محد يكدر الها غير الخيال مالتها الي هو عمي شبل قبل لا يعوفنا اشتراها..

ابويه ميقبل احد يوصل يمها غير الي يوديلها اكل و الماي.. اني كلت الا اطلع بيها بيها و اريد اشوف شتسوي اشو بس ركبت عليها تخبلت..

كامت تركض بيه سريع و اني ما اعرف بالخيول يمكن مرتين بس راكبتهن.. كلت هاهي رح اموت اني نهايتي على الخيول..

اثناء ركضها شفت واحد من بعيد واكف بنص الطريق كمت اغلط عليه علمود يوخر لا يصير بي شي.. وهو ولا يمه واكف صافن واني اصيح عليه..

من وصلت يمه مادري بحركه سريعه منه صار ورايه على الفرس.. و شوية شوية هدئها للفرسه درت وجهي عليه وياريتني ما درته وشفت جماله..

عمري مشفت مثل شكله كلش قريب لشكل بابا وجدي.. واني ما معاشره احد عنده ولد علمود اعرف شكل او جمال الولد غير ابويه..

بحيث صفنت ومن شفته هو هم صفن كلت الوضع مرح يعدي على خير ركعته على صدره وتعاركت وياه..

طبعا اني خفت بس ما بينت خوفي اله لان رح يستضعفني.. اشو هذا مدارلي بال و رزلني و راح.. كبت شياطيني واخذت الفرس ومشيت..

مرت الايام وبابا كال انو هو عازم عمو ابو محمد و ولد وياه لان رح يشتغل بالجديد ويه بابا فيريد يعرف عنه اكثر واكثر بهاي العزيمه.. او ابويه جان عنده خطه لهاي العزيمه بس اني ما فهمتها..

رتبت نفسي لان عمو ابو محمد كلش حباب وحيل طيب وحتى مرات اني وعمتي نروح نزوره لان جان هو وجدي أصدقاء كلشش..

صار يوم العزيمه وبدلت لبست فستان اسود حلو مخصر و مكياج خفيف ورتبت نفسي..

انصدمت من شفته هو الي وكف الفرسه نفسه جاي هسه كل فكري رح يفتن عليه يم بابا واني محد متجرأ و سواها ويايه يجي هذا الي ما اردي منين يسوي هيج..

بعدين عرفت من عمتي هو الي رح يشتغل ويه بابا يعني جبان كلشي ميكدر يسويلي.. و هاي الشغله صارت من صالحي..

مرت الايام وهو بدا شغله ويه بابا وميمر اليوم الي اشوفه بي اذا ما نتعارك مره عمتي من شافت عركتنا و هو راح كالت الي انو كل علاقات الحب بالبداية تبدا بالمشاكل و واحد ميطيق الثاني بعدين يصيرون واحد يعشق الثاني..

هذا كلام عمتي بقى او علق بالي يمكن اول مره اني يعلق بالي هيج كلام لان جنت بدا ما خاله بالي الحب او بالأحرى ما اعرف شنو الحب..

مر هوااي على شغله ويه بابا واني كلش تعلقت بي و اني اذا اتعلق بشي و ما احصل الي اريده اكوم بأي وسيلة ااذي او الفت انتباه اهلي الي علمود يعرفون اني رايده هذا الشيء..

الا ضيغم ما كدرت عليه وكمت ااذي من ما يعبرني او ما يعير الي اهميه وخصوصاً بعد موقف كلاص الماي.. كمت اضغط عليه اريد اشوفه شنو يريد يسويلي..

لحد ما يوم الي دفعته من صدره و هو جان ديشتغل بأوراق بالمطبخ و اجيت دفعته اشو هذا انگلب عليه وحش و رزلني رزاله غسل ولبس محد ما مرزلني هيج من صدك استهضمت على نفسي من رزلني..

ما كدرت اتمالك دموعي و خانتني كدامه بس لحكت ادخل لغرفتي قبل ما يشوفها اتاذيت بوقتها لان اني الي محد يكدر ياذيني او يجرحني يجي هذا وهيج يسوي بيه حتى خفت اكله لبابا مادري ليش..

ومن وقتها عرفت نفسي اني بدات اميل اله يعني قلبي صار مو الي.. كمت اتحاشى لكن من اشوفه ما اكدر اذا ما اتعارك وياه علمود احسسه اني معجبه بي مادري انو هاي الطريقه غلط..

لهنا تعرفتوا عليه وليش اني هيج.. نرجع لضيغم هسه.. 🌹❤️
_______________________

ضيغم... قبل يومين من انتهاء الاتفاقية بينا اني و ضرغام.. اتصل عليه ضرغام رادني بشغله تخص المصنع و رحت اله للبيت..

من كملنا شغل دا اطلع من المكتب مالته.. نزلت من الدرج كارثة ضرغام (ميان😂) اجت باتجاهي اني سويت روحي ما منتبه الها فداعبرها..

قاطعت طريقي بصوتها: ضيغم..

ضيغم: نعم..

ميان: اكدر اطلب منك طلب..

ضيغم: خير..

ميان: ممكن تعلمني على الخيول لان حسب ما سمعت انت مدرب خيول ممكن تعلمني..

ضيغم: اممم شلج بالخيول.. الخيول بس لزلم لان يعرفون شلون يتعاملون وياهن.. مو الج الخيول..

ميان: لا عادي.. حباب علمني..

ضيغم: و إذا ما علمتج شسوين.. تكلين لابوج يطردني موو..

ميان: طبعا لا لان انت وبابا أصدقاء و ما اكدر افرقكم و ازعل بابا..

ضيغم: اممم مبين تردين تتعلمين لان صايره حبابه و اخلاق متغيره..

ميان: اني على طول حبابه بس اكو ناس ميشوفون خيري بس شري..

ضيغم: رجعنا للسان الطويل موو..

ميان: هسه مكلت شي..

ضيغم: يله ماشي باجر الصبح اريدج جاهزه..

ميان: يعني ساعه بيش؟..

ضيغم: ب١٠ الصبح..

ميان: حيل من وگت..

ضيغم: ليش انتي ساعة بيش تكعدين؟..

ميان: حسب مرات ب١٢ لو ب١١..

ضيغم: علمود تتعلمين اكعدي من وكت ماريد كساله..

ميان: تمام..

ضيغم: يله مع السلامه..

ميان: مع السلامه.. احس روحي اريد اتقرب منه لذلك غيرت اسلوبي وياه عسى و لعل يحس بيه....... يتبع
.
.
.
.
.
.
.
.
.
.
.
انتظروني بالبارت القادم من قصة (ضيغم الغاب).. احبكم ❤️🌹😘😍

اهداء لميان.. 🌹❤️