(ضيغم الغاب)..

Part 10

ورجعت الكم بقصة (ضيغم الغاب)..

#الكاتبة_نمارق_الاسدي

#الكاتبة_N

لا اعرف لماذا اختارنا القدر..
لماذا انا.. ولماذا هي؟؟..

______________________

Part 10

الحجية: الله يجازيك بالافراح يا ابو محمد و ينور طريقك ربي بس اني كاعده بمكاني و هذاك بيتي ما أريد اتحرك منه..

ضيغم: هاهي عمي مثل ما تريد الحجية..

طبعا كلكم رح تكلون شلون و ثقت بهيج شخص فجأة و حتى انت مو كل شي تعرف عنه..

ايي صح ما اعرفه اني بس انطاني حقائق و طلع ما مكذب عليه بشيء و تأكدت من جدتي على كلامه لان نفس الكلام..

سولفته الي يعني كلامه صحيح و هو الشخص الوحيد الي يكدر يساعدني علمود انتقم من عمي و بنفس الوقت اخذ حقي منه..

طبعا حاولت ويه جدتي انو تقبل نروح نكعد يم ابو محمد لكن هي ما قبلت وكالت هذا بيتي و ما اتحرك منه و خصوصاً بعد ما عرفت بانتقامي من عمي ما رضت...

بس من شافتني مصر على الإنتقام كالت علمود ما اسبب الك مشاكل روح وحدك هناك و هم اظمئن عليك لان يم ابو محمد..

كلتلها انو اني رح اجيها كل ميصير وقت فارغ عندي اجي و اشوفج شنو تحتاجين...

وصلت لبيت ابو محمد و اخذت غراضي.. انطتني ام يوسف غرفه صايره بالطابق الثاني مطله على البستان من البالكون و بصف غرفة ابو محمد..

و الولد الي يشتغلون يم ابو محمد عدهم مثل البيت بنص البستان يعني يكونون مثل الحماية للبستان و بنفس الوقت يشتغلون بي.. اما يوسف فبالبيت ويانا غرفته يم امه و اخته..

بعد العشاء كل واحد راح بغرفته و ام يوسف كالت رح تروح يم جدتي..

لكن اني و ابو محمد رحنا لغرفة المكتب مالته علمود نتفق شلون نقتحم عمي او باي طريقة رح ندخل اله.. رحت يمه بالمكتب و جابت بنت ام يوسف النا گهوه علمود نسولف..

اتفقنا اني و ابو محمد على الخطة الي رح ندخل بيها لعمي..

صار ثاني يوم الصبح طلعت للبستان اشوفه و افتريت بالمنطقة و صافن على جمالها و على الطبيعة الخلابة الي مشاعر بيها قبل...

فجأة سمعت صوت صهيل مال حصان اعرف صوت الحصان و حافظه من كثر حبي الهن و لان مدرب عليهن..

بس الصوت بعيد وكأنما ديجي بسرعة و كفت اشوف منين الصوت وچان اشوفه الحصان جوزي و ديركض بسرعة جنونيه عرفته حصان جامح و اسمع صوت بنيه ناعم وتصيح وتغلط عليه لان واكف بنص طريقهم..

كلت لنفسي هاي الخبله صاعده على حصان جامح ومبينه هي متعرف تتعامل وياه الي هيج مخبلته و اي وكفه مفاجئة منه احتمال يكسرها تكسير.. وهاي بعدها تصيح وتغلط..

وصلوا قريب مني و بحركة سريعة مني صعدت على ظهر الحصان.. اخذت اللجام من ايديها و شويه شويه هدئت الحصان و وكفته...

من وكف دارت وجها عليه هذه البنيه و التقت عيونه عيونها صغار وسود و رموشها طوال وثخان بهاي الدقائق انتبهت على اقل تفسيله بعيونها..

و هي مثل المخبله ركعتني بايدها على صدري..

...... :انت منو سمحلك توكف الحصان يا غبي..

ضيغم: احترمي نفسج لجج شنو غبي لعد اعوفج انتي الغبيه ويه هذا الحصان الجامح هااا علمود يكسر عظامج..

...... : حتى لو انت مدخلك عسى ما اموت انت ميخصك..

ضيغم: هو اصلا منو معبرج چان لازم اعوفج انتي وياه علمود يكسرج چان لازم اعوفه علمود يكسرج ويتوبج تركبين احصنه متعرفين تمشيها..

...... : استغفر الله مستفز يله ولي منا...

ضيغم: اظاهر اهلج ما مربيج زين موو وبعدين اني ما اشتغل عند الخلفج علمود هيج تحجين ويايه..

عفتها ونزلت من الحصان هي هم نزلت راسن وراي عرفتها خايفه بس بومه مسويه روحها سبعه.. اسمعها بعدها دردم ورايه وتصيح بعدين عفتها ومشيت بعد ما سمعت كلمه منها درت وجهي شفتها اخذت الحصان مشي ودتروح.. بس حلوة هاي الخبله..

وصلت لبيت ابو محمد و دخلت للبيت سلمت على ام يوسف و صبحت عليها چانت هستوها مكمله الريوك دخل ابو محمد للمطبخ غسل ايده و راح كعد على الطاوله اجيت كعدت بصفه واجت ام يوسف صبت النا جاي وكعدت ويانا تتريك..

ضيغم: عمي ان شاء الله اليوم عليها موو؟؟

ابو محمد: ان شاء الله وليدي حضر نفسك العصر نروح...

ضيغم: أن شاء الله.. رجعنا نكمل اكل ابو محمد طلع عنده شغله اني رجعت لغرفتي طلعت صور لامي و أبويه و وعدتهم اخذ حقهم...

كمت بدلت و رحت لبيت جدتي و چانت ام يوسف مسويه الغده مال جدتي وكالت بس صبوا و اكلوا صبينا وتغدينا سويه..

و العصريه سوينا چاي و كعك و نسولف اني وياها و هم رجعت نصحتني انو اعوف سالفة الانتقام من عمي لكن اني چنت ساكت و ما لحيت وياها بالموضوع...

اتصل عليه ابو محمد وكالي يله تعال علمود نروح لموعدنا...

ودعت جدتي ورجعت للبيت غسلت و لبست اسود من فوك ليجوه و رتبت لحيتي و شواربي و عدلت شعري لان چانن يحتاج الهن ترتيب و تعديل و حضرت نفسي للمواجهة..

نزلت يم ابو محمد لصاله وكلتله: يله عمي اني جاهز

ابو محمد: يله وليدي لازم نروح و نخل كل شيء ويه عمك..... يتبع
.
.
.
.
.
.
.
.
.
.
.
.
.
انتظروني بالبارت القادم من قصة (ضيغم الغاب)... احبكم 🥰😍😘

موعد التنزيل مال القصة كل يوم ما عدى الجمعة الي استراحة و التنزيل رح يكون ساعة ١٢:٠٠ احبكم.. 🥰🥰🥰

رأيكم بالبارت 😍..