#حرب_المشاعر:
💘الحلقة 11💘:
كانت راقدة فسابع نومة ....حاطة يدها تحت خدها
اما فلحظة حست شكون يخنق فيها
فتحت عينيها على وسعهم تحاول تتنفس قابلها انس فوقها
يديه على رقبتها يخنق فيها حاولت تعيط اما صوتها محبش
يخرج.... حطت يديها تنحي فيديه لي على رقبتها اما مقدرتش
قعدت تفرفط تحتو كي الجاجة المذبوحة وجهها رجع زرق مافيه
ولا نقطة دم فلحظة إستسلمت و طاحو يديها على الفراش
لحظتها انس بعد يديه من على رقبتها.... ناضت تجري بالزربة من على السرير
طاحت فلرض ترد فالنفس بصعوبة شوي و كان حايقتلها
لوكان زاد دقيقة كانت ماتت و شبعت موت
حاطة يديها على رقبتها تجبد فالنفس و هو قاعد ملهيك يشوف فيها... تقدم خطوات منها و جبدها من الشعر قربها منها
وجهو في وجهها حاولت تنحي يدو من شعرها اما هو قاعد
غير يزيد يزيرلها على شعرها و هي تتوجع
نطقت بسيف: أطلقني اطلق شعري وجعتني... واش درتلك... بواش ضريتك باه ديرلي هاك!!!
أنس: مزال الخير للقدام حسابتلك راح نخليك تتهناي
قربها لعندو كثر قريب يلصق وجهو في وجهها و نطق بحقد و غل عينيه فعينيها: غدوة تستناك مفاجأة حلوة من عندي بمناسبة زواجك يا حلوة... شد شعرها كثر وهي ماقدرتش تتحمل الوجيعة
و هبطو دموعها يحرقوا على خدها
ضحك انس: نضمنلك انو مراحش تنساي نهار غدوة طول حياتك... طلقها و خرج من الشمبرا اما هي فطاحت بكامل ثقلها على القاعة تبكي و تمخط و تشهق بالبكا على زهرها الراقد
ناضت بسيف مسحت دموعها و دخلت للدوش تسقم حالتها
و تغسل وجهها قبل مايجي لؤي و يلقاها فهاد الحالة
لا عندها جهد تحكي ولا تفسر و آخر حاجة تتمناها تفرق بين
الخاوة ولا تفسد علاقتهم بسبتها و تنشأ عداوة بيناتهم.
دخلت للدوش و غسلت وجهها نشفاتو مليح
و خرجت تتمشى بالسيف قابلها لؤي عاطيها بظهرو..
دار لعندها كي حس بخطواتها شافها و تبسم
قرب لعندها وشدها من يدها مقربها لسرير
لؤي: واش رايك؟
نحات حياة عينيها منو و شافت فالسرير لقات محطوط فوقو
روبة بيضا شابة تاع عرس مع خمار بيض و طالون بيض يهبل
تغرغرو عينيها بالدموع و شافت فيه بإمتنان و راحت عنقاتو بقوة
حياة: شابة و تاخذ العقل بعدت عليه و عينيها يشعو بفرحة
مرسي مرسي بزاف متعرفش قدما فرحتني بالجاست
لؤي: هههه مابيناتناش.... شفتي عروسة نهار عرسها بلا الروبة البيضا!! صح عرس ماشي بالطبع و الشان اما سكتاتو حياة كي حطت يدها على فمو... مايهمش لمهم خممت فيا
غاس لؤي فعينيها و حمحم كي دق الباب ودخلت نور طل منو
نور: أهلا بالعرايس هههه هيا العشا واجد نستناوكم لتحت ماتبطاوش غمزتهم و حبطت فالدروج تتبسم فرحانة لخوها
شافت لمعة فعينيه....لمعة اول مرة تشوفها كانو لقا واش يحوس... الشيى المفقود داخلو
راحت حياة علقت الروبة و خرجت هي و لؤي حابطين لتحت باه يتعشاو
غير دخلو للصالة قابلهم وجه أنس و ضحكتو المستفزة لي على وجهو
صفاء: أهلا ولادي اقعدو تتعشاو حياة حاسة روحك أحسن؟ قالي لؤي انو مريضة
حياة بلعت اللقمة لي ففمها و نطقت: مليحة تحسنت شوية
صفاء: حمدالله يا بنتي... غدوة يستناكم يوم طويل و أخيرا شفت لؤي مزوج بعد ما فقدنا كلنا الأمل أنو يتزوج ولا واش قال؟
نور: هههه صح ماما معاك في هادي خصوصا لي طايحين فيه
راح ينجلطو كي يسمعوا بيه تزوج هههه هههه
لؤي: نوووور
بعد ما تعشاو و ضحكو طلعو كل واحد لشمبرتو اما انس خرج للجنينة يتكيف.... عينيه حمورا ووجهو حمر من الزعاف....كمل و رما القارو فالأرض بغل و عفس عليه بسباطو و سحقوا كأنو متخيلو شخص ويحاول يقتل فيه
حياة مكسلة فالفراش بعدما لبست بيجامتها لي هي عبارة على تريكو و سروال... حاطة راسها على المخدة و راقدة على ظهرها تشوف فالسقف... خرج لؤي من الدوش لابس شورط وحدو
حاولت حياة متركزش معاه ولا تشوف فعضلاتو و أكتافو المرسومين هاكذاك و وجهها طلع حمر من الحشمة انو تكون متزوجة و راقدة قدام راجل ماتعرف عليه والو صح حنين و مليح معاها اما يبقى غريب و مزال متعرفت عليه مليح و علاه لازم تتعرف عليه مع اللخر كل واحد راح ينفصل على الآخر عاجلا أم آجلا و كل واحد يروح فطريق .... خذات نفس بعدما تنهدت بحزن
لؤي قعد على السرير رايح يطفي الضو.... تصبحي على خير
حياة: ونتا من اهلو
طفا الضو وتكا يرقد حاط يدو تحت راسو و الأخرى فوق عينيه
لحظات إستسلم للنوم و حياة ماحبش يجيها نوم خايفة من واش حايصرا غدوة و خايفة من انس و عمايلو زادت شوية و رقدت حتى هيا من التعب.
أنت تقرأ
حرب المشاعر {من تأليفي Macilia Ch}
Randomهل يجتمع الحب و هوس الإنتقام في آن واحد ؟؟ عقل مريض يقوده مهووس للإنتقام أم سيتغلب الحب الذي تسلل إلى قلبه خفية لتثور داخله حرب مشاعر بين قلبه و عقله و يا ترى من سينتصر في النهاية؟ (باللهجة الجزائرية ) {من تأليفي Macilia Ch} بدأت في أفريل 2019 إن...
