#حرب_المشاعر:
💞الحلقة 4💞:
بعدما كملت قرايتها رجعت للدار عيانة ...دخلت لشمبرتها وراحت ديراكت للدوش تنحي تعب النهار ...بعدما كملت ...خرجت بالكاب تنشف فشعرها قدام المراية...سمعت صوت التلفون يصوني فالصاك...حطت واش فيدها ..حكمت الصاك وخرجت التلفون ...فتحاتو ولقات يوسف ياعثلها مساج ...
"أرواحي لبلاصتنا على الربعة عندنا مانهدرو مزال ماكملنا هدرتنا تاع مقبيل لازم نحطو النقاط على الحروف...نحبك❤"
....ضحكت بفرحة و حطت التلفون رايحة تلبس فرحانة راح تتلاقاه ....المرات لي تلاقاو فيها برا ينعدو على الأصابع
********
عند حياة لي هلكها أنس بالخدمة بعد ما جابت دوزانها وستفتهم
وفهمتها نوال الخدمة بعدها راحت ...قعدت فبيروها لي لاصق بيرو أنس و بينهم زجاج يعني هو يقدر يشوفها أما هي ماتقدرش تشوفو ....غاطسة فلورق لي مدهوملها بعد أول يوم خدمة عندو ..
صونا تلفون البيرو ...طلعت راسها ملورق و رفدت السماعة وردت
أنس :جيبيلي قهوة بلا سكر وغلق السماعة بلا مايخليها تنطق ...
حياة وهي تقلد فيه :جيبيلي قهوة بلا سكر ...بلا بلا بلا هفففف ...
ناضت كارهة جيبلو قهوتو المحنونة ...وهو يشوف فيها من الزجاج كيفاه عوجت فمها تقلد فيه ...للحظة حكمو الضحك أما كتم ضحكتو ...خطرتلو فكرة فمخو ناوي يطبقها عليها😏😏
دقدقت فالباب و دخلت مع فنجان القهوة ...مشات حتى لحقت لمكتب ديالو وين قاعد ...حطتلو القهوة قدامو ودارت راجعة وقبل ما توصل للباب سمعت صوتو
أنس: وشنو هاد القهوة باردة كي لاقلاص ...عاودي جيبيلي وحدة سخونة خفي ...الناس يشربو القهوة سخونة ماشي باردة
دارت لعندو حياة بنفاذ صبر وهي شادة روحها عليه باش ماتهجمش عليه وتعضو (كي تتقلق تحكم هاداك العبد وتعضو ههه)
راحت رفدت القهوة من عندو راسمة تبسيمة صفرا على وجهها
رجعت بعد ما جابت وحدة سخونة تغلي حطتها قدامو ...و قبل ما توصل للباب مرة وحدوخرا عاود عيطلها
أنس: شكون قالك تروحي يا لالة ....دارت لعندو وهي مزيرة على يدها من التقلاق وتمتم بين شواربها ...
أنس: أولا كي مانقولكش روحي ماتروحيش ،ثانيا روحي عاوديلي هاد القهوة وجيبيلي وحدة فيها مغرف سكر واحد هيا ....طلعلها الغاز للراس مع اللول قاللها بلا سكر دوك تعاودلو وحدة بسكر
عضت شفتها بغزول باش ماتتلاحش عليه تخنقو ....عاودت رفدتها و داتها .. جابتلو وحدوخرا ...وستناتو كاش مايقول ...أما هو حكم الفنجان وشربها مستمتع بشوفتها حاكمة روحها على شعرة باش متتطرطقش و فنفس الوقت مستمتع بالقهوة الحلوة لي أول مرة يشربها ...حط الفنجان ...تقدري تروحي تكملي شغلك ...ماصدقت قاللها روحي و خرجت تجري من عندو وكان زاد شوية كان خرجت قاع زعافها فيه
بعد يوم طويل وطلبات أنس لي ماتخلاصش ...جابتلو قهوة كاش خمس خطرات فزوج سوايع ...وطلبات أخرى تافهين كما ...جيبيلي ورقة ...ستيلو ...حالف يهبلها من أول يوم
ناضت تكسل فيديها و شافت الساعة راهي الخمسة يكونو الموظفين خرجو قاع فهاد الوقت وهي ما حستش بالوقت من كثر الخدمة لي مدهالها باش تكملها فيوم واحد ...تجمع فأوراقها بعد ما ستفتهم ...حكمت صاكها و خرجت تتمشى جهة المصعد ...لمحت أنس قاعد يستنى قدامو ....تأفأفت راهي عيانة وماتقدرش تحبط فالدروج سلمت امرها لربي وراحت تمشي جيهتو حتى لحقت لعندو كان هاداك وين تحل المصعد .. و دخل أنس ...بعدها دخلت حياة موراه ...تغلق المصعد بعدما ضغطت حياة على الزر ...قاعدين جنب بعض غير نفسهم لي مسموع ..
فجأة تعطل المصعد قبل ما يوصلو وطفا الضو ..هنا حياة خافت وبدات تتنفس بالسيف عندها فوبيا من الأماكن المغلقة والظلام
شعل أنس ضو تليفونو باش يقدر يشوف حتى حس بلطخة دور راسو ولقا حياة مغاشية زرب حبط لعندها ورفدلها راسها وضربها ضربات خفاف على خدها أما لاحياة لمن تنادي هنا عرف بلي بلاك خافت وجاتها نوبة ...هنا ماعرفش واش يدير ...تفكر زر الطوارئ كان راح يضغط عليه ...حوس عليه بضو تاع تليفونو حتى لقاه وضغط عليه بعدها رجع ضو المصعد حمر ...طفا ضو تلفونو وردو للجيب يستنى يسقمو المصعد و يجو يخرجوهم .
أنت تقرأ
حرب المشاعر {من تأليفي Macilia Ch}
Randomهل يجتمع الحب و هوس الإنتقام في آن واحد ؟؟ عقل مريض يقوده مهووس للإنتقام أم سيتغلب الحب الذي تسلل إلى قلبه خفية لتثور داخله حرب مشاعر بين قلبه و عقله و يا ترى من سينتصر في النهاية؟ (باللهجة الجزائرية ) {من تأليفي Macilia Ch} بدأت في أفريل 2019 إن...
