كانت حاسه بعدم الامان ، بس اتعودت على الشعور دا ، البيت كان كبير وهادئ ، وكل عيله مقداد الاسعدي واحفادو كانو متجمعين وبعاينو ليها بإستغراب ..
مقداد: السلام عليكم
رد كلهم: وعليكم السلام ..
مقداد عاين ل مرتو الكانت بتعاين ليه بنفس الطريقه .. اتقدمت خطوات وسلمت على شمس ..
ميمونه: انتي شمس صح
شمس هزت راسها بمعنى اي
جا صوت بنت: شمس؟ دي منو يا جدو ؟ اول مره نشوفها
مقداد : دي شمس المصممه الجديده للمعرض ..
بعدها اتقدموا وسلمو عليها وكل واحد رجع مكانو ..
مقداد: وطبعا حتقعد معانا لحد ماتتعرف على الوضع لانها اول مرة تجي هولندا ..
ميمونه: تنور والله
شمس: شكرا
مقداد طلب من الخادمه توصلها غرفتها .. وشمس رافقتها لجهه السلم .. كان طويل نوعا ما .. طلعت مع الخادمه ووقفت في الطابق التاني .. الخادمه اشرت ليها انو دي غرفتها ونزلت .. شمس فضلت واقفه وبتعاين لتصميم البيت الاقل ما يقال عنه انو رائع .. وكان واضح انو السلم مكمل ل طابق تالت بس الطابق كان مضلم ..
دخلت الغرفه وقفلت الباب ب هدوء وعاينت للغرفه الكانت مرتبه .. همست بصوتها " واضح انو سيد مقداد كان عارف اني حجي معاه " .. تابعت نظراتها واتقدمت لجهه الشباك الكبير الكان ماخد مساحه كبيره من الغرفه .. بس ما حاولت تفتحه ورجعت رمت نفسها في السرير بتعب .. غمضت عيونها ولكن سرعان ما فتحتهم بصوت طرق الباب .. وقفت وراحت تفتحه .. لقتها الخادمه ومعاها شنطه شمس .. ابتسمت وطلعت بهدوء .. اما شمس رجعت استلقت في نفس السرير ..وبدت تفكر في الحيحصل وبتدعي انو مستقبلها يكون احسن .. زفرت انفاسها وهي بتعاين لسقف الغرفه وبسررعه غطت في النوم ..
___
- حلوه يا ماما صح
- اي ما شا الله
صوت تاني: جدو ليه جابها هنا وكان ممكن يسكنها في سكن العاملين ..
رد صوت: نفس سؤالي
ميمونه: بلا اسئله كتيرة ويلا اي زول يشوف مدرستو
صوت طفولي: احنا في اجازه يا حبوبه انتي ليه بتنسي
ميمونه: معناها اي واحد يشوف نشاطو يلا يلا ..
قامو كلهم بنرفزه ..
ميمونه عاينت لنسوان ولادها وزفرت بضيق ..
ميمونه: عرفتوها صح ؟
بشرى: نسخه منها يا خالتو نسخه من امها طج
_
* تخريمه *
مقداد كامل الاسعدي ، سوداني الجنسيه .. جا هولندا قبل سنين طويله وكان مصيرو انو يجتهد ويحب طموحو ويأسس معرض سيارات كبير اسمه ( معرض الاسعدي ) .. زوجته ميمونه صديقته من الطفوله والداعم الاكبر لمقداد .. اولاده سيف الدين الكبير وفياض ومجاهد وبنته ايمان ..
سيف الدين (55 سنه) ممكن نقول يد مقداد اليمين وشغال معاه في المعرض وممشي معظم الشغل .. زوجته بشرى (45 سنه) واولادو شهاب(27) وعلاء(22) ونجمه (19) ..
مجاهد (44) .. دكتور اسنان هادي نوعا ما .. زوجته روضه (37) اولاده .. صهيب ( 25) واياد (19) اثار(17) غصون (12) ..
ايمان (39) زوجها اتوفى اتوفى قبل 4 سنين في انفجار طياره .. اولادها وضاح (20) بسمه (16) وتؤام اصال واصيل (13) ..
احداث كتير حتحصل في الاجزاء الجايه ..
يتبع
