بعد ايام ..
شمس اتعودت اكتر على وجودها في بيت الاسعدي رغم عدم اهتمام البعض بوجودها ، اتعلمت اكتر خلال شغلها في المعرض وكل مرة بزيد اهتمامها بالشغل ، ميمونه دايماً كانت بتحاول مع مقداد عشان يورو شمس الحقيقه بس كان رافض وبختمو حديثهم ( في الوقت المناسب) مافي زول كان عارف لسه انها حفيده البيت دا وبت فياض
القصه شنو وراء فياض وام شمس وشنو الحصل قبل 19 سنه ؟ حنعرف ؟
اما شهاب ما قادر يفسر شعرو تجاه شمس ، كانت كل يوم بتتملك تفكيرو اكتر عن اليوم البعدو .. عكس شمس الكان كل همها انها تنجح وتحقق الجات عشانو ..
الساعه كانت 9:00 مساءاً
متجمعين في الصاله كلهم.. حتى شمس معاهم جزء بيلعب وجزء بيتونس ..
بسمه جات نازله وملامح بتوضح انها متنرفزة
بسمه: في حد شاف تلفوني؟
ردو كلهم: لا
بسمه: لا كيف انا لي ساعتين بفتش فيه ..
ايمان: شوفيه في غرفتك يا بسمه ما تصدعينا
بسمه: اكيد شفتو ياماما مافي
اثار: اتصلي عليه من تلفون تاني
بسمه: جيبي تلفونك يا اثار
شالت تلفونها واتصلت وكلهم كانو مترقبين صوتو ..
بسمه: ما سامعه شي
اثار: في صوت جاي من فوق ..
شمس: اي انا سامعه
نجمه: شكلو في غرفتك بتحبي تكبري المواضيع
بسمه: لانو ما تلفونك ما حتفهمي ..
طلعت وفجاءة بقت تنادي الكل ..
امها طلعت وراها ب خوف ونجمه وميمونه ومعظمهم طلعو بسرعه لانو صوتها كان عالي ..
كانت واقفه جنب غرفه شمس ومكتفه ايديها ..
ميمونه: في شنو يابت بتكوركي كدا
بسمه بتعاين لشمس بحدة: أسالو شمس تلفوني بعمل شنو في غرفتها وكمان دولابها ؟
شمس: شنو ؟ اكيد غلطانه
بسمه: وليك عين تبرري
نجمه: بسمه انتي جنيتي عيب كدا
بسمه: انتي اكتر وحدة ما بتعرف العيب عشان كدا ما تتكلمي واصلا من جات البت دي انتي بتدافعي عنها
شمس اتقدمت: انا ماشلت حاجه اكيد في سوء فهم
اثار بتعاين ل بسمه ومستمتعه ..
وايمان امها كانت ساكته ..
بسمه: اقولك انا لقيت تلفوني في دولابك معناه انتي السرقتيه
ميمونه بصوت عالي: بسمه احترمي نفسك
بسمه: احترم نفسي؟ جايبنها بيتنا وقاعدة بتسرق ولسه ما معروف تعمل شنو وكمان ماعايزين تغلطوها ؟
ايمان: ليه عملتي كدا يا شمس؟ ابوي مقصر معاك في شي؟
بسمه بضحكه: حقها تسرق من وين تشوف تلفون ذي دا ؟ ..
ميمونه اتقدمت وادت بسمه كف ..
شمس كانت بتعاين بغرابه للوضع مع انو كان مألوف وعادي الكل بيتهمها بحاجات ما عملتها ، بس المرة دي زعلت من قلبها .. ختت يدها في راسها وما كان قدامها غير تنزل وهي جاريه .. كانت نازله في السلم بسرعه وطلعت من البيت وهي لسه جاريه ..
شهاب كان راجع من شغلو وشافها .. ما كان قدامو غير يتبعها ..
اما بسمه كانت واقفه وما رفا ليها رمش بعد كف ميمونه ..
ميمونه: شكلك ما ربيتي بتك يا ايمان
ونزلت بزعل عشان تلحق شمس ..
ايمان مسكت بتها ودخلتها غرفتها ووراها اثار ..
نجمه كانت واقفه هي وروضه وامها ..
نجمه عاينت لامها: شمس ما بتعمل كدا والله
بشرى ماردت عليها ونزلت ..
روضه: ليه ما بتعمل كدا في النهايه غريبه احسن تعملي حسابك منها يا نجمه ..
ولحقتهم تحت ..
